ប្រាសាទកោះកេរ ជារាជនី ដ៏សំខាន់មួយនាសម័យចក្រភពអង្គ និងមានរឿងព្រេងនិទាន ប្រឌិតឡើងថា ការស្លាប់ស្តេចដំរីស ទាក់ទងទៅនឹង ប្រាសាទកោះកេរ
ដោយ៖ សេង ស៊ីដារ៉ូ
ប្រាសាទកោះកេរ ជារាជនី
ដ៏សំខាន់មួយនាសម័យចក្រភពអង្គ នៅចន្លោះឆ្នាំ៩២១-៩៤៤ ដោយព្រះបាទជ័យវ្ម័នទី៤
បានគ្រងរាជ ចន្លោះពីឆ្នាំ៩២៨-៩៤១។ រាជធានីនេះ មានចម្ងាយប្រមាណ ១៤០ គីឡូម៉ែត្រនាភាគឦសាននៃទីក្រុងយសោធបុរៈ
(រាជធានីអង្គរ)។
បច្ចុប្បន្នអតីតរាជធានីនេះ
ស្ថិតនៅក្នុងភូមិកោះកេរ ឃុំស្រសង់ ស្រុកគូលែន ខេត្តព្រះវិហារ។ ព្រះបាទជ័យវរ្ម័នទី៤
បានកសាងប្រាសាទតូចធំ ជាច្រើននៅតំបន់នេះ ដូចជាប្រាសាទប្រាង្គ ប្រាសាទក្រហម
ប្រាសាទលិង្គ ប្រាសាទក្រចាប់ ប្រាសាទបន្ទាយពីរជាន់
ប្រាសាទដំរី ប្រាសាទប្រាំ និងប្រាសាទនាងខ្មៅ។
ក្នុងចំណោមប្រាសាទទាំងអស់នោះ
មានប្រាសាទមួយធំជាងគេ គឺប្រាសាទប្រាង្គ ដូច្នេះគេនាំគ្នាហៅប្រាសាទនោះថា
ប្រាសាទធំ តែក៏មានអ្នកខ្លះហៅថា ប្រាសាទកំពែង ដោយសារមានកំពែងធំវែងព័ទ្ធជុំវិញទើបយើងនិយមហៅថា
ប្រាសាទកោះកេរ គឺជាកោះនៃកិត្តិយស ឬកេរឈ្មោះ។ ប្រាសាទកោះកេរ មានទម្រង់ជាពីរ៉ាមីត
ឬជាសាជីជ្រុង ដែលមានលក្ខណៈខុសប្លែងពីប្រាសាទមុនៗទាំងអស់ ដែលកសាងឡើងដោយបុព្វបុរសខ្មែរ។
ប្រាសាទនេះមានកម្ពស់រហូតដល់
៣៥ម៉ែត្រ ជាប្រាសាទមួយខ្ពស់ បន្ទាប់ពីប្រាសាទអង្គរវត្ត។ ប្រាសាទធំ
ឬប្រាសាទប្រាង្គជាប្រាសាទភ្នំ និងជាទម្រទ្រលិង្គទេវរាជដ៏ធំមួយ ដែលមានកម្ពស់ ១៨ម៉ែត្រ
និងអង្កត់ផ្ចិតប្រវែង ៥ម៉ែត្រ (សាងពីលោហធាតុ ឬស្រោបលោហធាតុ)។
ប្រាសាទកោះកេរ មានរឿងព្រេងនិទានខ្មែរប្រឌិត
ដែលជាប់ទាក់ទិនទៅនឹងស្តេចដំរីស ដែលបានដំណាលថាពេលស្រទន់សាស្ត្រា ពេញវ័យក្រមុំ ក៏មានរូបឆោមល្អពន់ពេក
ធ្វើឲ្យស្តេចដំរីស មានការព្រួយបារម្ភពីកូន យ៉ាងខ្លាំង។ ស្តេចដំរីស ពិចារណសព្វគ្រប់ទៅ
ក៏សង់ប្រាសាទសសរមួយ ឲ្យកូនស្រីស្នាក់នៅ ព្រោះមិនចង់ឲ្យកូនចុះពីលើប្រាសាទដើរផ្តេសផ្តាស់
ហើយស្តេចដំរីស តែងតែទំនុកបម្រុងកូនមិនដែលឲ្យខ្វះខាតឡើយ អ្វីដែលស្តេចដំរីស យកចិត្តទុកដាក់ជាងគេនោះ
គឺសំអាងសក់។
ស្តេចដំរីសស្រលាញ់ពេញចិត្តចំពោះកូនណាស់
តែងតែសំអាងសក់របស់កូន ឲ្យមានសម្រស់ភ្លឺរលោង។ រាល់ពេលដែលស្តេចដំរីស មកដល់ប្រាសាទ
តែងតែពោលពាក្យយ៉ាងពិរោះមករកកូណថា “ស្រទន់សាស្ត្រា ទម្លាក់សក់មករ៉ា បិតាមកហើយ សៀតផ្កាខាងមុខ
សិតសក់ខាងក្រោយ បិតាអប់ឲ្យ ស្រទន់សាស្ត្រា” បន្ទាប់មកស្តេចដំរីស បានមកដល់ព្រះរាជដំណាក់របស់ព្រះអង្គម្ចាស់ដែលនាំនាង
ស្រទន់សាស្ត្រា មកលាក់។ នាងស្រទន់សាស្ត្រា និងព្រះអង្គម្ចាស់
កាលបើបានឮសំឡេងឪពុកស្រែកហៅ ក៏នាំគ្នាស្ទុះចេញមកលុតជង្គង់ថ្វាយបង្គំអង្វរបិតាថា
“សូមក្រាបថ្វាយបង្គំព្រះបិតា សូមព្រះបិតាមេត្តាប្រោសប្រទានទោស ដល់បុត្រទាំងពីរផង”
។
ស្តេចដំរីស ឃើញដូច្នោះ
ក៏មានអារម្មណ៍តក់ស្លុតស្រយុតស្រយង់កាយ រហូតដល់ដួលក្រាបបង្ហូរទឹកភ្នែករហាម
ហើយពោលពាក្យទាំងអួលអាក់ទៅរកកូនស្រីថា “ស្រទន់សាស្ត្រា” បើកូនស្រឡាញ់បិតា ហេតុអ្វីក៏កូនធ្វើអំពើខុសគន្លងប្រពៃណីដូច្នេះ
ធ្វើឲ្យបិតាអស់សង្ឃឹមចំពោះកូន ហើយខ្មាសគេខ្លាំងណាស់។ ចូលកូនយកផ្លែឈើ បំពងទឹក
និងផ្កាបិតាជាលើកចុងក្រោយ។ ចូរកូនទាំងពីរចេះថែរក្សាគ្នាឲ្យបានសុខបិតាលាកូនហើយ ។
និយាយពីព្រានព្រៃម្នាក់
បានដើរប្រមាញ់រហូតទៅដល់ប្រាសាទ ស្រទន់សាស្ត្រា បានឮពាក្យពេជន៍ដ៏ពិរោះរបស់ស្តេចដំរីស។
ព្រានព្រៃនោះ ក៏បាននាំរឿងនេះ ទៅក្រាបទូលព្រះអង្គម្ចាស់មួយយអង្គ។ ពេលព្រះអង្គម្ចាស់
បានទទួលដំណឹងនេះហើយ ក៏យាងមកប្រពាតព្រៃ ហើយបានមកលបមើលឃើញស្តេចដំរីស ពោល ពាក្យយ៉ាងពិរោះ
ហើយក៏បានទតឃើញនាងស្រទន់សាស្ត្រា មានរូបល្អពន់ពេក ក៏ចាប់ចិត្តស្រាលាញ់នាងយ៉ាងក្រៃលែង។
ព្រះអង្គម្ចាស់ បានទន្ទេញពាក្យស្តេចដំរីសចាំហើយ ក៏ឆ្លៀងឱកាសយកពាក្យទាំងនោះ ពោលក្រែប្រាសាទនាង
នៅពេលដែលស្តេចដំរីសមិននៅ។ រីឯស្រទន់សាស្ត្រា កាលបើឮពំនោលនោះស្មានថាឪពុកមកដល់ក៏ទម្លាក់សក់ចុះ។
ចំណែកព្រះអង្គម្ចាស់ ឃើញឱកាសល្អហុចឲ្យ ក៏សម្រាលព្រះកាយឡើងតាមសក់របស់នាងរហូតដល់លើប្រាសាទ
ហើយលួងលោមនាង សុំសេចក្តីស្នេហារហូតយល់ចិត្តគ្នាទៅវិញទៅមក
រួចហើយក៏នាំនាងយកទៅទុកនៅឯប្រាសាទរបស់ព្រះអង្គ។
ថ្លែងពីស្តេចដំរីសវិញ
បានស្វែងរកផ្លែឈើ និងផ្កាក្រអូបគ្រប់ប្រភេទ ដើម្បីយកទៅផ្គត់ផ្គង់បុត្រីបណ្តូលចិត្តអស់រយៈពេលបីថ្ងៃកន្លងមកហើយ។
លុះរកបានគ្រាន់ហើយ ក៏ធ្វើដំណើរដោយរលេះរលាំងទៅរកកូន។
ស្តេចដំរីសទៅដល់ប្រាសាទ
ក៏បន្លឺសម្តីដូចសព្វដង ប៉ុន្តែមានសភាពស្ងប់ស្ងាត់ឈឹង មិនឃើញកូនទម្លាក់សក់មកសោះ
ទើបគិតថា ប្រហែលជានាងដេកលក់ ក៏បន្លឺសំលេងដដែលៗ ម្តងហើយម្តងទៀត កាន់តែខ្លាំងឡើងៗ
នៅតែមិនឃើញកូន ក៏មានសេចក្តីភិតភ័យព្រួយបារម្ភកាន់តែខ្លាំងឡើងៗ ក៏សម្រេចចិត្តចេញដំណើរយ៉ាងតក់ក្រហល់
ដោយស្វែងរកកូនយ៉ាងវក់វីពីប្រាសាទមួយទៅប្រាសាទមួយ ហើយស្រែកហៅកូនរំពងពេញព្រៃ
ព្រមទាំងកាច់កំពូលប្រាសាទនិមួយៗ ដើម្បីអើតមើលកូន។
ដោយក្តីអាម៉ាស់
និងការខកចិត្តខ្លាំងពេក បណ្តាលឲ្យស្តេចដំរី ដួលស្លាប់ភ្លាមមួយពេញ នៅខាងក្រោយប្រាសាទនោះ។
បច្ចុប្បន្ននេះ
នៅខាងក្រោយពេលភ្ញៀវទេសចរណ៍ ទៅទស្សនាប្រាសាទកោះកេរ អាច ឆ្លៀតដើរទៅប្រាសាទធំ ដើម្បីពិនិត្យមើលទីទួលមួយដែលចាស់បុរាណបានលើក
ជានិមិត្តរូបស្តេចដំរីស។ សព្វថ្ងៃមានដើមឈើដុះជា ច្រើនរាងដូចដំរីស្រុត បែរក្បាលទៅទិសខាងត្បូង។
ម្យ៉ាងទៀតអ្នកស្រុកបានយកទង់ក្រពើ មកដោតនៅក្បែរ ជើងភ្នំប៉ែកខាងជើង ដើម្បីជានិមិត្តរូប
របស់ស្តេចដំរីស៕
Post a Comment