ខេត្តបាត់ដំបងៈ
ដោយ៖ ហុង ចំណាប់
ពូជដំណាំលម៉ើ ដែលប្រជាពលរដ្ឋយើង ទន្ទឹងចង់ដាំនោះ ឥឡូវបានហូរចូលមកដល់ ខេត្តបាត់ដំបង រយៈ១ឆ្នាំមកហើយ តាមរយៈក្រុមបណ្តាញអភិវឌ្ឍន៍លម៉ើកម្ពុជា បាននាំពូជលម៉ើ មានពូជបាហ៊ី (ញុំាំស្រស់) ពូជK1 (ញុំាំស្រស់) ពូជដឹកលេកន័រ (ដំណាប់) និងពូជមេជជុល (ដំណាប់)។
កសិករយើង អាចរកទិញបាននៅពូជលម៉ើនេះ នៅក្នុងឃុំអូតាគី ខេត្តបាត់ដំបង ដោយមានការលក់ចេញ ជាគ្រាប់ពូជ ភាគច្រើនក្នុងនោះជាពូជបណ្តុះដើម ហើយក្នុង១ដើមថ្លៃ ៥ដុល្លារ។
លោក សែម វាសនា តំណាងអ្នកចែកចាយលក់ពូជលម៉ើ បានឲ្យដឹងថាក្នុងរយៈពេល១ឆ្នាំនេះ បានបញ្ចេញពូជលម៉ើ ដែលជាកូន ចំនួន ៧០០០កូន ទៅតាមបណ្តាខេត្តកំពង់ស្ពឺ ភ្នំពេញ បាត់ដំបង សៀមរាប។ ដើមលម៉ើនេះដាំក្នុងរយៈពេល៣ឆ្នាំ តែនៅក្នុងឆ្នាំទី១ទី២ អាចមានផ្កា និងផ្លែ ជាបណ្តើរៗហើយដោយដើមនេះ មានដើម ឈ្មោល និងដើមញី បើមានតែឈ្មោល ក៏មិនមានផ្លែដែរ ទាល់តែមានដើមញីទើបមានផ្លែបាន បច្ចុប្បន្នភាគច្រើន គ្រាប់លម៉ើលក់ជាគ្រាប់ ហើយចំពោះពូជដើមបណ្តុះទាល់តែបណ្តុះចាប់ពី ៧ខែ ទៅដល់១ឆ្នាំទើបអាចលក់ចេញបាន ក្នុង១ដើមថ្លៃ៥ដុល្លារ។ លោកវាសនា បានបន្តថា ពូជដំណាំលម៉ើនេះ មានពូជញុំានៅខ្ចី មានពូជបាហ៊ី ពូជK1 និងពូជដំណាប់ ដែលបានមកពីផ្លែក្រៀមពីដើមតែម្តង។ ពូជដំណាំលម៉ើនេះ នាំចូលពីប្រទេសអេហ្ស៊ីប ប្រទេសគូវ៉ែត និងប្រទេសទុយណេស៊ី៕
Post a Comment