រចនាបថភ្នំដា កើតមុនអង្គរ សុទ្ធតែបានទទួលឥទ្ធិពល ពីចរន្តវប្បធម៌ នៃសិល្បៈឥណ្ឌា
ដោយ៖ សេង ស៊ីដារ៉ូ
តាមការសិក្សាស្រាវជ្រាវ ប្រាសាទអាស្រមមហាឫសី សង់នៅលើភ្នំមួយជាប់នឹងភ្នំដា មានចម្ងាយប្រមាណជា ៣០០ម៉ែត្រ នៅបែកនីរតីនៃប្រាសាទភ្នំដា។ ប្រាសាទនេះ បន្សល់ទុកបដិមា ក្នុងរចនាបថភ្នំដា «A» បានសាងឡើងក្នុងរវាងឆ្នាំ៥១៤ រហូតដល់ឆ្នាំ៥៣៩ នៃគ្រឹស្តសករាជ ស្ថិតក្នុងរជ្ជកាលរបស់ព្រះបាទរុទ្រវរ្ម័ន។
បដិមា ដែលស្ថិតនៅក្នុងរចនាបថនេះ មានព្រះគ្រឹស្ណៈទ្រភ្នំគោវធ៌ន ដែលប្រភពពីវត្តកោះ ព្រះវិស្ណុដៃប្រាំបី ព្រះពលរាម ព្រះបរសុរាម មានប្រភពពីភ្នំដាព្រះពុទ្ធរូប មានប្រភពពីវត្តរំលក និងព្រះពុទ្ធ អវលោកិតេស្វរសំរឹទ្ធ មានប្រភពពីវត្តកំពង់លួង។ សព្វថ្ងៃនេះ បដិមាទាំងអស់បានយកមករក្សាទុកដាក់តាំងបង្ហាញ នៅសារមន្ទីរជាតិទីក្រុងភ្នំពេញ ។ បដិមាក្នុងរចនាបថភ្នំដា «A» សាងឡើងពីថ្មភក់ មានរបៀបតុបតែលម្អប្រហាក់ប្រហែលគ្នា រង្វង់មុខរាងមូលទ្រវែងភ្នែកក្រឡោត ត្របកភ្នែករាងកោងស្រួច ចង្ការាងខ្លី ស្លឹកត្រចៀកវែង សក់រួញរមូលដូចគូទខ្យង ពាក់មកុដរាងបំពង់ (ចំពោះតែបដិមាព្រះវិស្ណុប៉ុណ្ណោះ) ចង្កេះរាងរៀវ ស្មាបើកធំ ស្លៀកសំពង់ខ្លី ខ្លះជាសំពង់ចងក្បិន សារបាប់ (ឬចរបាប់) ចាប់ភ្លីចេញពីប្រភពតែមួយ ក្បាលភ្លីរបស់សំពត់មួល ញាត់ចូលក្នុងខ្សែក្រវាត់ តូចឆ្មារ មានក្បាលរាងកំប៉ោងបន្តិច ពីខាងមុខ មានជាយផ្នត់ធ្លាក់សំយ៉ុងចុះ។ បដិមាខ្លះទៀតស្លៀកសំពត់លាតគ្មានចាប់ភ្លី ឯពុទ្ធប្បដិមាវិញ គ្រងចីវរលាតស្តើង ធម្មតាមិនមានពាក់មកុដ មិនមានប្រើចន្ទល់ទប់ដងខ្លួនបដិមាទេ។
បដិមាក្នុងរចនាបថភ្នំដា «B» បានកសាងឡើងក្នុងរវាងឆ្នាំ៥៤០ រហូតដល់ឆ្នាំ៦០០ នៃគ្រិស្តសករាជ ស្ថិតក្នុងរជ្ជកាលរបស់ព្រះបាទភវរ្ម័នទី១។ បដិមាសំខាន់ៗ ដែលបានរកឃើញ មានព្រះវិស្ណុ ដែលមានប្រភពពីកំពង់ចាមដាក់តាំងនៅសារមន្ទីរជាតិទីក្នុងភ្នំពេញ ព្រះហរិហរៈ ដែលមានប្រភពពីអាស្រមមហាឬសី ដាក់តាំងនៅសារមន្ទីរហ្គីមេ នៃប្រទេសបារាំង។
បដិមាក្នុងរចនាបថភ្នំដា «B» កសាងឡើងពីថ្មភក់ មានរបៀបតុបតែងលម្អប្រហាក់ប្រហែលគ្នា នឹងរចនាបថភ្នំដា «A» ដែរ តែច្រើនតែមានមាឌធំ រាងមាំ ទឹកមុខញញឹម ច្រមុះរាងកោង រង្វង់មុខមូលទូលាយ ចង្កាខ្លី ភ្នែកបើកធំប្រឡោត ត្របកភ្នែកកោង ត្រចៀកវែង ពាក់មកុដរាងបំពង់ សក់រួញរមូលដូចគូទខ្យង តែរាងធំបន្តិច។ ចន្ទល់ដែលប្រើសម្រាប់ទប់បដិមា រាងដូចដែកក្រចកសេះ នៅខាងទ្រង់ទ្រាយល្អបរិបូរ អាចឲ្យគេសិក្សាវិភាគបាន។ តាមលក្ខណៈស្ថាបត្យកម្ម ប្រាសាទអាស្រមមហាឫសី សាងសង់នៅលើភ្នំ មានប្លង់ជាការ៉េ។ ថ្មដែលយកមកសាងសង់ប្រាសាទ ជាប្រភេទថ្មរឹងមួយប្រភេទហៅថា «ថ្មបាសាល់»។ ប្រភេទថ្មនេះ គេឃើញមានច្រើននៅខេត្តកំពង់ចាម។
ប្រាសាទអស្រមមហាឫសី មានទ្វារចូលតែមួយគត់ គ្មានទ្វារបញ្ឆោតទេ។ នៅអមសងខាងទ្វារចូល មានសសរពេជ្ររាងមូលលម្អដោយក្បាច់រំយោល និងក្បាច់ពងត្រី។ ពីខាងលើទ្វារចូល មានផ្តែរតូចមួយ ទ្រដោយសសរពេជ្រ លម្អដោយក្បាច់រំយោលប្រទាក់គ្នា ដូចជាទឹករលក។ ហោជាងគ្មានក្បាច់ ចម្លាក់អ្វីទេ វាមានប្រហោងរាងបួនជ្រុងតូចមួយ ដូចជាប្រហោងខ្យល់នៅចំកណ្តាល។ តាមជញ្ជាំងពីខាងមុខ និងពីចំហៀងទាំងសងខាង មានបង្អួចចំហ ដែលតុបតែងលម្អដោយក្របពីខាងក្រៅ តែគ្មានចម្រឹងទេ។ ខាងក្នុងប្រាសាទ មានបន្ទប់នៅចំកណ្តាល ហើយមានធ្លាព័ទ្ធជុំវិញខាងក្រៅបន្ទប់។ ជារួមប្រាសាទអាស្រមមហាឫសី គ្មានក្បួរក្បាច់ចម្លាក់អ្វីនៅតាមជញ្ជាំងទេ ប៉ុន្តែប្រការដែល គួរអោយចាប់អារម្មណ៍ គឺប្រាសាទនេះ មានរូបរាងដូចគ្នា ទៅនឹងប្រាសាទនៅឥណ្ឌាខ្លាំងណាស់។
ចំពោះរូបបដិមា ក្នុងរចនាបថភ្នំដា គេឃើញមានទាំងបដិមាខាងលទ្ធិព្រហ្មញ្ញសាសនា និងព្រះពុទ្ធសាសនា។ បដិមាទាំងនោះ សាងឡើងពីថ្ម លោកហៈ និងឈើ។ ជាទូទៅលក្ខណៈបដិមា ក្នុងរចនាបថភ្នំដា មានរាងកាច់ចង្កេះ មានស្លៀកសំពត់ ឯរូបឈរត្រង់។ លក្ខណៈបែបនេះ បានចម្លងតាមគំរូសិល្បៈ ឬទទួលឥទ្ធិពលពីសិល្បៈឥណ្ឌា។ ក្នុងរចនាបថភ្នំដា សិល្បករមានបច្ចេកទេសទប់លំនឹងបដិមារទោល ដោយប្រើជន្ទល់។
ដូចជាធ្លាក់ជន្ទល់រាងកោង ដូចដែកក្រចកសេះ នៅជាប់នឹងដងខ្លួនបដិមា ពីខាងក្រោយខ្នង ឆ្លាក់ដោយសំពង់ ឲ្យធ្លាក់ដល់ក្រោមដើម្បីទប់លំនឹង ឆ្លាក់ដំបងដែលកាន់ក្នុងដៃទាំងពីរ ពីខាងមុខឲ្យធំសម្រាប់ទ្រដងខ្លួន។ អ្នកសិក្សាពីប្រវត្តិសិល្បៈខ្មែរ បានបែងចែកបដិមា ក្នុងរចនាបថភ្នំដា ជាពីរក្រុមគឺ រចនាបថភ្នំដា «A» និងរចនាបថភ្នំដា «B» រចនាបថទាំងពីរនេះ មានលក្ខណៈខុសប្លែកពីគ្នាបន្តិចបន្តួចប៉ុណ្ណោះ។ ក្រោយខ្នងជាប់នឹងដងខ្លួន តាំងពីព្រះកេសរហូតមកដល់ខាងក្រោម ឥឡូវត្រូវរួញនៅសល់ ចាប់ពីត្រឹមព្រះកេស មកដល់ត្រឹមព្រះហស្តខាងលើប៉ុណ្ណោះ។
រាល់ប្រាសាទ និងបដិមា ដែលស្ថិតនៅក្នុងរចនាបថភ្នំដា សុទ្ធតែបានទទួលឥទ្ធិពល ពីចរន្តវប្បធម៌នៃសិល្បៈឥណ្ឌា ។ សិល្បករ មានភាពប៉ិនប្រសប់ក្នុងការកែច្នៃ និងបញ្ចេញរូបរាងរចនាបថ បានច្រើនបែបច្រើនយ៉ាង ក្នុងការកសាងប្រាសាទនិងបដិមា ដើម្បីបម្រើអោយវិស័យសាសនា និងការគោរពបូជា៕
Post a Comment