ក្រុមហ៊ុនរ៉ូយ៉ាល់គ្រុប និងសែលកាត ចែកស៊ីមឥតគិតថ្លៃ ដល់គ្រូពេទ្យ និងបុគ្គលិកពេទ្យ ក្នុងក្រុង​ព្រះ​សីហនុ

ភ្នំពេញៈ

ដោយ៖ ហុង ចំណាប់

ក្រុមហ៊ុនសែលកាត ដែលមានសម្ព័ន្ធភាពជាមួយក្រុមហ៊ុនរ៉ូយ៉ាល់គ្រុប បានធ្វើការចែកស៊ីមដោយឥតគិតថ្លៃ ជូនដល់គ្រូពេទ្យ និងបុគ្គលិកពេទ្យ នៅក្នុងក្រុងព្រះសីហនុចំនួន ៨០នាក់ ដោយអនុញ្ញាត​ឲ្យពួកគាត់អាច​ហៅ​ទូរស័ព្ទចេញ និងផ្ញើសារដោយឥតគិតថ្លៃ រហូតដល់ស្ថានភាពនៃជម្ងឺ Covid-19 ត្រូវបានបញ្ចប់ទៅវិញ។

ការផ្តល់ជូននេះ ត្រូវបានធ្វើឡើង បន្ទាប់ពីក្រុមហ៊ុនសែលកាត បានប្រកាសកាលពីថ្ងៃសុក្រកន្លងទៅថា ខ្លួន​នឹងសហការជាមួយក្រសួងសុខាភិបាល នូវរាល់វេជ្ជបណ្ឌិត និងបុគ្គលិកពេទ្យទូទាំងប្រទេសកម្ពុជា ត្រូវបាន​ផ្តល់​ជូន​នូវការហៅទូរស័ព្ទចេញ និងផ្ញើសារដោយឥតគិតថ្លៃ ទៅតាមតម្រូវការប្រើប្រាស់របស់ពួកគាត់។

វេជ្ជបណ្ឌិត និងបុគ្គលិកពេទ្យ ជាង១២០០នាក់ ដែលកំពុងប្រើប្រាស់បណ្តាញទូរស័ព្ទចល័តសែលកាត ត្រូវ​បានផ្តល់ជូនដោយមិនគិតថ្លៃលើការហៅទូរស័ព្ទចេញក្នុងប្រព័ន្ធ និងផ្ញើសារ។ ​រាល់វេជ្ជបណ្ឌិត​ដែលបានចុះ​បញ្ជី​នៅក្រសួងសុខាភិបាលទាំងអស់ នឹងមានសិទ្ធិទទួលបានការផ្តល់ជូននេះ ហើយក្នុងករណីមិនទាន់​មាន​ស៊ីមសែលកាតសម្រាប់ប្រើប្រាស់ ក្រុមហ៊ុននឹងរៀបចំយកទៅជូនពួកគាត់ដោយឥតគិតថ្លៃ។

លោក ឧកញ៉ា គិតម៉េង ជាអគ្គនាយក ក្រុមហ៊ុនរ៉ូយ៉ាល់គ្រុប មានគំនិតផ្តួចផ្តើម ដើម្បីប្រយុទ្ធប្រឆាំង ចំពោះ​មេរោគ Covid-19 នេះ លោកឧកញ្ញាកំពុងតែសហការយ៉ាងជិតស្និទ្ធជាមួយក្រសួងសុខាភិបាល ​និងក្រសួង​ប្រៃ​​ស​ណីយ៍ ​និងទូរគមនាគមន៍។

ផ្នែក ICT ទាំងមូលរបស់ក្រុមហ៊ុនរ៉ូយ៉ាល់គ្រុប រួមមានក្រុមហ៊ុនសែលកាត អ៊ីហ្សីខម​ វីង ក្រុមហ៊ុន CBS និង Digital Sky បានចាប់ផ្តើមនូវការឆ្លើយតបទូទាំងប្រទេស នៃគម្រោងគាំទ្រ ការបញ្ចុះតម្លៃ និងសេវាកម្មថ្មីៗ​ដើម្បី​បម្រើដល់អតិថិជន។

លោក Ian Watson នាយកប្រតិបត្តិក្រុមហ៊ុនសែលកាត មានប្រសាសន៍ថា ការឆ្លើយតបនេះ ត្រូវតែរួម​បញ្ចូល​​ទាំងវេជ្ជបណ្ឌិត និងគិលានុបដ្ឋាយិកានៅជួរមុខទាំងអស់ ព្រោះពួកគេកំពុងធ្វើការ​ដើម្បីប្រយុទ្ធ​ប្រឆាំង​នឹងមេរោគ Covid-19 និងព្យាបាលអ្នកជម្ងឺដែលកំពុងមានបញ្ហាស្រាប់។

លោក Watson បានបន្តទៀតថា ក្រោមការណែនាំរបស់លោកអគ្គនាយក យើងបានចាប់ផ្តើមគំនិតផ្តួចផ្តើម​នៃការបង្កើតសហគមន៍វេជ្ជសាស្រ្ត ជាមួយនឹងក្រសួងសុខាភិបាល កាលពីថ្ងៃសុក្រកន្លងទៅ ហើយយើងក៏​បាន​​ឃើញនូវតម្រូវការបន្ទាន់នៅក្នុងក្រុងព្រះសីហនុ។

លោក Watson បានលើកឡើងថា គំនិតផ្តួចផ្តើមនេះ គឺជាការបន្ថែមលើសេវាកម្មទូរវេជ្ជសាស្រ្ត​តាមបច្ចេក​វិទ្យា 5G (Telemedicince) ដែលកំពុងចាប់ផ្តើមដំណើរការ នៅទីតាំងចំនួនបួននៅទូទាំងរាជធានីភ្នំពេញ។


ការប្រើប្រាស់ 5G ដំបូងគេបង្អស់នៅក្នុងប្រទេសកម្ពុជា នឹងអនុញ្ញាតឲ្យវេជ្ជបណ្ឌិតឈានមុខគេទូទាំង​ប្រទេ​ស​កម្ពុជា អាចធ្វើការវាយតម្លៃ និងពិគ្រោះជាមួយអ្នកជំងឺនៅគ្រប់ទីកន្លែងបានភ្លាមៗ តាមរយៈទូរស័ព្ទដៃ ​និង​ឧបករណ៍ផ្សេងៗ ដើម្បីជួយសម្របសម្រួលដល់ក្រុមគ្រូពេទ្យ ដែលកំពុងធ្វើការនៅនឹងកន្លែងផ្ទាល់។

សែលកាត នឹងចាំផ្តល់ការគាំទ្រដល់សហគមន៍វេជ្ជសាស្រ្ត និងអតិថិជនទាំងអស់របស់ខ្លួន ក្នុងកំឡុង​ពេល​ដ៏​ពិបាកនេះ ហើយយើងនឹងបន្តការសម្របសម្រួលយ៉ាងជិតស្និទ្ធ ​ជាមួយក្រសួងសុខាភិបាល ដើម្បីជួយពួកគេ ក្នុងការគ្រប់គ្រងវិបត្តិនេះ៕