រដ្ឋមន្រ្តីក្រសួងអភិវឌ្ឍន៍ជនបទ អញ្ជើញជាអធិបតី បិទសន្និបាតបូកសរុបលទ្ធផលការងារឆ្នាំ២០១៩ និង​លើក​​​​ទិសដៅការងារឆ្នាំ២០២០ របស់រដ្ឋបាលខេត្តកំពង់ឆ្នាំង

​ខេត្តកំពង់ឆ្នាំងៈ

ដោយ៖ ឌឹម គឹមហាក់

 

លោក អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ និងជាប្រធានក្រុមការងាររាជរដ្ឋាភិបាល​ចុះមូលដ្ឋាន​ ខេត្ត​កំពង់ឆ្នាំង​ បានអញ្ជើញជាអធិបតី បិទសន្និបាតបូកសរុបលទ្ធផលការងារឆ្នាំ២០១៩ និងលើកទិសដៅការងារ​ឆ្នាំ២០២០ របស់រដ្ឋបាលខេត្ត និងការងាររាជរដ្ឋាភិបាលចុះមូលដ្ឋាន ខេត្តកំពង់ឆ្នាំង។

បិទសន្និបាតបូកសរុបលទ្ធផលការងារនេះ មានការចូលរួមពីឯកឧត្តម លោកជំទាវ ក្រុមការងាររាជរដ្ឋាភិបាល ក្រុមប្រឹក្សាខេត្ត គណៈអភិបាលខេត្ត ក្រុមប្រឹក្សា អភិបាលក្រុង ស្រុក កងកំលាំងប្រដាប់អាវុធទាំងបី ​ប្រធាន​អង្គ​ភាពជុំវិញខេត្ត និងអាជ្ញាធរមូលដ្ឋាន ឃុំ សង្កាត់ កាលពីថ្ងៃទី២៧ ខែកុម្ភៈ ឆ្នាំ២០២០ នៅសណ្ឋាគារសុខ​ថៃ​សាន្ត ទីរួមខេត្តកំពង់ឆ្នាំង។

លោក ឈួរ ច័ន្ឌឌឿន អភិបាលខេត្តកំពង់ឆ្នាំង បានឲ្យដឹងថា អង្គសន្និបាតបានប្រព្រឹតទៅរយៈពេលពេញ​មួយថ្ងៃ ដោយបានធ្វើការពិភាក្សាយ៉ាងផុសផុលពីសំណាក់សមាជិក សមាជិកាអង្គសន្និបាតនូវរាល់ ចំណុច​ខ្លាំង ចំណុចខ្សោយ និងបញ្ហាប្រឈមនានា ដែលរដ្ឋបាលខេត្ត ក៏ដូចជាក្រុមការងាររាជរដ្ឋាភិបាល ចុះមូល​ដ្ឋានខេត្ត បានអនុវត្តន៍ក្នុងឆ្នាំ២០១៩  ហើយអង្គសន្និបាតបានដាក់ចេញ នូវផែនការយុទ្ធសាស្រ្ដសម្រាប់​អនុ​វត្តន៍​​នៅឆ្នាំ២០២០ ដើមី្បឆ្លើយតបទៅនឹងសំណូមពរ និងតម្រូវការស្របតាមគោលនយោបាយ របស់រាជរដ្ឋា​ភិ​​បាល ក្នុងក្របខ័ណ្ឌយុទ្ធសាស្ត្រ ស្តីពីកំណែទម្រង់វិមជ្ឈការ និងវិសហមជ្ឈការនៅថ្នាក់ក្រោមជាតិ និង​ដើមី្បឲ្យរដ្ឋបាលថ្នាក់ក្រោមជាតិ ក្លាយជាស្ថាប័នអភិបាលកិច្ចមូលដ្ឋានរឹងម៉ាំ សំដៅចូលរួមកាត់​បន្ថយ​ភាព​ក្រី​​ក្រ និងធ្វើឲ្យមានចីរភាពដល់ការអភិវឌ្ឍ តាមបែបប្រជាធិបតេយ្យ ក្នុងបរិបទនៃការកំណែទម្រង់រដ្ឋបាល​សា​ធា​រ​ណៈតាមបែបវិមជ្ឈការ និងសហវិមជ្ឈការរបស់រាជរដ្ឋាភិបាល ។ 

លោក អ៊ុក រ៉ាប៊ុន  រដ្ឋមន្រ្តីក្រសួងអភិវឌ្ឍន៍ជនបទ បានសម្តែងនូវការកោតសរសើរ និងវាយតម្លៃខ្ពស់​ចំពោះ​កិច្ច​ខិតខំប្រឹងប្រែង និងកិច្ចសហការគ្នាបានយ៉ាងល្អរវាងថ្នាក់ដឹកនាំ និងមន្ត្រីរាជការ កងកម្លាំងប្រដាប់អាវុធ​គ្រប់​លំ​​ដាប់​ថ្នាក់ ដែលបានបំពេញតួនាទីភារកិច្ចរបស់ខ្លួន រហូតទទួលបានលទ្ធផលល្អក្នុងឆ្នាំ២០១៩ ដោយ​ឡែក​ឆ្នាំ២០២០នេះ ទាំងផែនការរដ្ឋបាលខេត្ត និងផែនការការងាររបស់រាជរដ្ឋាភិបាលចុះមូលដ្ឋាន យើងត្រូវ​បន្តរួមគ្នាសម្រេចឲ្យបាននូវទិសដៅជាយុទ្ធសាស្ត្រសំខាន់ៗ របស់រាជរដ្ឋាភិបាល ដើម្បីបម្រើប្រជាពលរដ្ឋ​ទាំង​សេវាសំណូមពរ និងសេវាតម្រូវការឲ្យបានទាន់ពេលវេលា។

លោករដ្ឋមន្ត្រី បានរំលឹកដល់ថ្នាក់ដឹកនាំ មន្រ្ដីរាជការ កងកម្លាំងប្រដាប់អាវុធគ្រប់ផ្នែក គ្រប់ថ្នាក់ ត្រូវរួម​សាម​គ្គី​​គ្នាក្នុងការខិតខំថែរក្សាសន្តិភាព សេ្ថរភាពនយោបាយ សន្តិសុខសណ្តាប់ធ្នាប់សាធារណៈ​ គឺសំដៅបង្ក​លក្ខណៈ​​សម្បត្តិដល់ការរីកចម្រើននៃលទ្ធិប្រជាធិបតេយ្យ សេរីពហុបក្ស និងការអភិវឌ្ឍសេដ្ឋកិច្ច និងសង្គម​កិច្ច​សង្គម។ 

បន្តាប់មក គណៈអធិបតី បានបំពាក់គ្រឿងឥស្សរិយយសការងារ ជូនដល់មន្រ្តីរាជការចំនួន ២២រូប និងជូន​រង្វាន់​ជ័យលាភីចលនាប្រឡងប្រណាំងភូមិ ឃុំមានសុវត្ថិភាពផងដែរ៕