​គណៈប្រតិភូជាន់ខ្ពស់រាជរដ្ឋាភិបាល អញ្ជើញទស្សនកិច្ច នៅ​ក្រុមហ៊ុនសែលកាត ​ដើម្បីធ្វើតេស្តបច្ចេកវិទ្យា 5G

​ភ្នំពេញៈ


ដោយ៖ ហុង ចំណាប់

ក្រុមហ៊ុនសែលកាត បានរៀបចំទទួលស្វាគមន៍ដំណើរទស្សនកិច្ចផ្លូវការ របស់រាជរដ្ឋាភិបាល មកកាន់ទីតាំង​ដំ​​ឡើងគ្រឿងបច្ចេកវិទ្យា 5G ដើម្បីបង្ហាញជូននូវអ៊ីនធឺណិតល្បឿនលឿនអស្ចារ្យបំផុត សម្រាប់ដាក់បម្រើជូន​អតិ​ថិជន នាពេលឆាប់ៗខាងមុខនេះ នៅក្នុងរាជធានីភ្នំពេញ។

ដំណើរទស្សនកិច្ចផ្លូវការនេះ ត្រូវបានដឹកនាំដោយអគ្គនាយកក្រុមហ៊ុនសែលកាត អ្នកឧកញ៉ា គិត ម៉េង និង​អមដំណើរដោយភ្ញៀវកិត្តិយស ឯកឧត្តម ត្រាំ អ៊ីវតឹក រដ្ឋមន្រ្តីក្រសួងប្រៃសណីយ៍ និងទូរគមនាគមន៍ (MPTC) ​និង​គណៈប្រតិភូមន្ត្រីជាន់ខ្ពស់របស់រាជរដ្ឋាភិបាល ជាច្រើនរូបទៀត រួមមាន ឯកឧត្តម ខាន់ សារ៉ាក់ រដ្ឋលេខាធិការប្រចាំការ ឯកឧត្តម សុខ ពុទ្ធិវុធ រដ្ឋលេខាធិការ ឯកឧត្តម ជា ម៉ានិត រដ្ឋលេខាធិការ និងជានាយកខុទ្ទកាល័យរដ្ឋមន្រ្តី និងឯកឧត្តម ម៉ៅ ចរិយា ប្រធាននិយ័តករទូរគមនាគមន៍កម្ពុជា។

ក្រុមប្រតិភូបានអញ្ជើញទស្សនាផ្ទាល់នូវការធ្វើតេស្តបច្ចេកវិទ្យា 5G នៅក្រុមហ៊ុនសែលកាត ដោយលទ្ធផល​ធ្វើ​​តេស្ត​នេះ បានបង្ហាញនូវកម្រិត អ៊ីនធឺណិត ល្បឿនលឿនដ៏អស្ចារ្យបំផុត រហូតដល់ទៅ 1.6GB ឯណោះ។
ការធ្វើតេស្តបង្ហាញជូននេះ បានបង្ហាញឲ្យឃើញច្បាស់នូវការត្រៀមលក្ខណៈរួចរាល់ ទៅលើផ្នែកបច្ចេកទេស និង​ការប្តេជ្ញាចិត្តដ៏មុតម៉ាំរបស់ក្រុមហ៊ុនសែលកាត ក្នុងការនាំយកបច្ចេកវិទ្យាថ្មីនេះ ​មកបម្រើជូនអតិថិជន​នៅ​ក្នុងឆ្នាំ​ ២០២០។

ឯកឧត្តម ត្រាំ អ៊ីវតឹក បានមានប្រសាសន៍ថា ខ្ញុំពិតជាមានការចាប់អារម្មណ៍យ៉ាងខ្លាំង ​ជាមួយដំណើរ​វិវត្តន៍​នៃ​គម្រោងបច្ចេកវិទ្យា 5G របស់ក្រុមហ៊ុនសែលកាត ក្នុងការជួយគាំទ្រដល់គំនិតផ្តួចផ្តើម ​នៃគម្រោងសេដ្ឋកិច្ច​ឌីជីថល របស់រាជរដ្ឋាភិបាលកម្ពុជា។

ប្រាកដណាស់ 5G នឹងក្លាយជាបច្ចេកវិទ្យាឈានមុខគេ ក្នុងការជួយជំរុញសេដ្ឋកិច្ចប្រទេសកម្ពុជា ហើយ  យើង​ក៏ត្រូវត្រៀមខ្លួនឲ្យបានរួចរាល់ ដើម្បីចាប់យករាល់អត្ថប្រយោជន៍របស់វា និងធានាថា បច្ចេកវិទ្យានេះ ពិតជា​​ជួយជំរុញដល់ការអភិវឌ្ឍសេដ្ឋកិច្ចជាតិ ក៏ដូចជាជួយលើកស្ទួយដល់វិស័យឧស្សាហកម្មក្នុងស្រុក និង ជី​វភាពរបស់ប្រជាពលរដ្ឋយើងផងដែរ។

យើងចង់ឲ្យប្រទេសកម្ពុជា ក្លាយជាគោលដៅលេចធ្លោជាងគេបំផុត ផ្នែកបច្ចេកវិទ្យា 5G នៅក្នុងតំបន់អាស៊ាន និងសម្រាប់ក្រុមហ៊ុនទាំងអស់ ដែលមានបំណងចង់ក្លាយជាអ្នកឈានមុខគេ ក្នុងការប្រើប្រាស់បច្ចេកវិទ្យា ដ៏​អស្ចារ្យមួយនេះ។

អ្នកឧកញ៉ា គិត ម៉េង ប្រធានក្រុមហ៊ុនសែលកាត បានលើកឡើងឲ្យដឹងថា លោកពិតជាមានក្តីសោមនស្ស​រីករាយ​បំផុត ដែលបានបង្ហាញនូវសមត្ថភាព និងល្បឿនអ៊ីនធឺណិតរបស់បច្ចេកវិទ្យា 5G ជូនដល់ឯកឧត្តមរដ្ឋ​មន្រ្តី និងគណៈប្រតិភូទាំងមូល។ ហើយដំណើរទស្សនកិច្ចនេះ បានបង្ហាញនូវការយល់ដឹង និងការប្តេជ្ញាចិត្ត​របស់ MPTC ក្នុងការជួយគាំទ្រដល់ការនាំយកបច្ចេកវិទ្យា 5G មកប្រើប្រាស់នៅក្នុងប្រទេសកម្ពុជា ក៏ដូចជា​ឆន្ទៈរបស់ក្រសួង ក្នុងការសហការយ៉ាងជិតស្និទ្ធជាមួយប្រតិបត្តិករ ទៅលើបដិវត្តឧស្សាហកម្មដ៏ទំនើប​អស្ចារ្យ​មួយនេះ។

យើងបានធ្វើការសហការគ្នាយ៉ាងជិតស្និទ្ធបំផុត វាងក្រុមហ៊ុនបុត្រសម្ព័ន្ធទាំងអស់ នៅក្នុងក្រុមហ៊ុនរ៉ូយ៉ាល់​គ្រុប ជាពិសេសផ្នែក ICT ដោយពួកយើងកំពុងផ្តោតការយកចិត្តទុកដាក់យ៉ាងខ្លាំង ទៅលើគុណប្រយោជន៍ នៃ​ការផ្តល់សេវាកម្មអ៊ីនធឺណិត (Internet Service Provision)  មាតិកាឌីជីថល (Digital Content) និង​សេវាទូទាត់ប្រាក់តាមឌីជីថល Digital Payment តាមរយៈការប្រើប្រាស់បច្ចេកវិទ្យា 5G នៅក្នុងថ្ងៃអនាគត។

ក្រុមហ៊ុនរ៉ូយ៉ាល់គ្រុប បានរៀបចំពិធីចុះហត្ថលេខា លើអនុស្សរណៈនៃការយោគយល់ជាមួយ MPTC លើ​ការ​សហការ និងការរៀបចំផែនការសម្រាប់បច្ចេកវិទ្យា 5G និងការអភិវឌ្ឍវិស័យឌីជីថល ​នៅក្នុងប្រទេសកម្ពុជា នាថ្ងៃទី២៧ ខែកុម្ភៈ ឆ្នាំ២០២០៕