ក្រសួងអភិវឌ្ឍន៍ជនបទ ប្រកាសឲ្យដំណើរការគម្រោងគាំទ្រនិរន្តរភាព ហេដ្ឋារចនាសម្ព័ន្ធជនបទ ដើម្បីទីផ្សារ​កសិករ របស់ខេត្តគោលដៅ​ទាំង១២

ភ្នំពេញៈ

ដោយ៖ ឌឹម គឹមហាក់

ក្រសួងអភិវឌ្ឍន៍ជនបទ ប្រកាសឲ្យដំណើរការគម្រោង កែលម្អផ្លូវជនបទប្រវែងសរុប ៤៥០គីឡូ​ម៉ែត្រ ផ្សារ​ជន​បទ ៥០កន្លែង និងហេដ្ឋារចនាសម្ព័ន្ធសម្រួលដល់ច្រវ៉ាក់ផលិតកម្មកសិកម្មផ្សេងៗ​របស់ខេត្តគោលដៅ​ទាំង១២ ។

ក្នុងពិធីប្រកាស ដាក់ឲ្យដំណើរការគម្រោងជាផ្លូវការ “គាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារ​កសិករ  និងពាណិជ្ជូបនីយកម្មកសិកម្ម “​ ហៅកាត់ថា សម្បត្តិ (SAAMBAT)។

លោក សួស គង់ រដ្ឋលេខាធិការប្រចាំការ តំណាងលោករដ្ឋមន្រ្ដី ក្រសួងអភិវឌ្ឍន៍ជនបទ បានបញ្ជាក់ថា ​ខេត្ត​គោលដៅទាំង១២ គឺខេត្តកណ្តាល ស្វាយរៀង កំពង់ចាម កំពង់ឆ្នាំង ពោធិសាត់ បាត់ដំបង បន្ទាយមានជ័យ កំពង់ធំ ព្រះវិហារ ស្ទឹងត្រែង តាកែវ និងខេត្តកំពត នឹងទទួលបានការកែលម្អផ្លូវជនបទប្រវែងសរុប ៤៥០ គីឡូម៉ែត្រ ផ្សារជនបទ ៥០កន្លែង និងហេដ្ឋារចនាសម្ព័ន្ធសម្រួល​ដល់ច្រវ៉ាក់ផលិតកម្មកសិកម្មផ្សេងៗ​ទៀតពី​គម្រោងនេះ។

លោកលេខាធិការ បានបន្តទៀតថា គម្រោង SAAMBAT នេះ ជាគម្រោងថ្មីមួយ ដែលទទួលការគាំទ្រ​ហិរញ្ញ​វត្ថុ​ពហុភាគី រួមមានបដិភាគពីរាជរដ្ឋាភិបាលកម្ពុជា មូលនិធិអន្តរជាតិអភិវឌ្ឍន៍វិស័យកសិកម្ម (IFAD) ធនា​គារ​វិនិយោគអឺរ៉ុប (EIB) និងសហគមន៍អឺរ៉ុប ដែលត្រូវបានរៀបចំឡើងក្រោមកម្មវិធីសហប្រតិបត្តិការ​បំពេញ​បន្ថែម ទៅលើគម្រោងកំពុងដំណើរការក្រោមហិរញ្ញប្បទានរបស់ IFAD ដូចជាគម្រោង ASPIRE អនុ​វត្តន៍​ដោយក្រសួងកសិកម្ម រុក្ខាប្រមាញ់ និងនេសាទ គម្រោងAIMS ដែលអនុវត្តន៍ដោយក្រសួងពាណិកម្ម ដើម្បីបង្កើតឲ្យមានការគាំទ្ររួមគ្នាដល់ការអភិវឌ្ឍកសិកម្មខ្នាតតូចនៅកម្ពុជា។

គម្រោង“គាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករ  និងពាណិជ្ជូបនីយកម្មកសិកម្ម“​ ហៅ​កាត់​ថា សម្បត្តិ​ នឹងចាប់ផ្ដើមអនុវត្តន៍ក្នុងរយៈពេល ៦ឆ្នាំ ចាប់ពីឆ្នាំ២០១៩ ដល់ ២០២៥  ក្រោមហិរញ្ញប្ប​ទាន ​​​សហប្រតិបត្តិការរបស់រាជរដ្ឋាភិបាលកម្ពុជា IFAD EIB និង EU សរុបចំនួន១២៤,២៤ លានដុល្លារ ក្នុង​គោល​បំណងបង្កើនផលិតភាពរបស់យុវជនជនបទ សហគ្រិនភាព និងសេដ្ឋកិច្ចជនបទប្រកបដោយ​និរន្ត​ភាព ដើម្បីរួមចំណែកដល់គោលដៅកាត់បន្ថយភាពក្រីក្រ និងលើកកម្ពស់សន្តិសុខស្បៀង ក្នុងនោះមាន៖ សមាស ភាគទី១ អនុវត្តន៍ដោយក្រសួងអភិវឌ្ឍន៍ជនបទ ផ្នែកហេដ្ឋារចនាសម្ព័ន្ធសម្រាប់គាំទ្រច្រវ៉ាក់ផលិតកម្ម ដែលគ្រោងនឹងកែលម្អផ្លូវជនបទប្រវែង ៤៥០គ.ម ផ្សារជនបទចំនួន ៥០ និងហេដ្ឋារចនាសម្ព័ន្ធសម្រួល​ដល់​ច្រវ៉ាក់ផលិតកម្មកសិកម្មផ្សេងៗទៀត នៅក្នុងខេត្តគោលដៅ។ សមាសភាគទី ២ អនុវត្តន៍ដោយក្រសួងសេដ្ឋ​កិច្ច និង ហិរញ្ញវត្ថុផ្នែក ជំនាញបច្ចេកវិទ្យា  និងសហគ្រិន​ភាពដែលគ្រោងបណ្តុះបណ្តាលជំនាញ ដល់សហ​គ្រិន​ជន បទ និងការរៀបចំបង្កើតឲ្យមានប្រព័ន្ធ​ឌីជីថល ដើម្បីសេដ្ឋកិច្ចជនបទ។ យុវជននៅជនបទជិត ៧០០០ នាក់ នឹងទទួលបានការបណ្តុះបណ្តាលជំនាញ  និង ៥០០ សហគ្រាសអាជីវកម្មធុនតូច និងមធ្យម នឹង​បាន​ភ្ជាប់ទៅនឹងកម្មវិធីបណ្តុះបណ្តាល។ 

លោកលេខាធិការប្រចាំការ បានអំពាវនាវដល់តំណាងក្រសួង-ស្ថាប័ន ដៃគូអភិវឌ្ឍន៍ជាតិ នឹងអន្តរជាតិ ឲ្យចូលរួមសហប្រតិបត្តិការឲ្យបានល្អប្រសើរដើម្បីដំណើរការអនុវត្តគម្រោង SAAMBAT នេះមានភាពរលូន និងទទួលបានជោគជ័យតាមការគ្រោងទុក៕