ទីផ្សារអំពៅស្ករ លក់បានថ្លៃខ្ពស់ ​មុនឱកាសចូលឆ្នាំខ្មែរ

 ខេត្តកណ្តាលៈ

ដោយ៖ សេង ស៊ីដារ៉ូ

 

អ្នកស្រី វ៉ន ជាអ្នកលក់អំពៅ នៅស្តង់ផ្សារតាខ្មៅ បានឲ្យដឹងថា អំពៅនាំចូលពីស្រុកកៀនស្វាយ និងស្រុក​ស្អាង ដែលអាចលក់ចេញបានក្នុងមួយថ្ងៃ ៥០ ទៅ ៦០បាច់ ដោយក្នុងមួយបាច់លក់បានពី ១០០០០រៀល​ឡើងទៅ។ ពូជអំពៅស្ករ ឬហៅថា អំពៅម្រេចនេះ ដែលអ្នកទិញបន្តយកទៅកិនកៀបយកទឹក​លក់បន្តទៀត ។ អ្នក វ៉ន បានបន្តថា មិនថាអំពៅនាំចូលពីខេត្តណាទេ គឺមានតម្លៃដូចៗគ្នា ហើយតម្លៃលក់ចេញក្នុងឆ្នាំនេះ​បានខ្ពស់បន្តិច ដោយក្នុងមួយបាច់អាចលក់បាន ចាប់ពី ១២០០០រៀល ទៅដល់ ១៥០០០រៀល ។

លោក លីហួត ជាកសិករអ្នកដាំអំពៅ បានបញ្ជាក់ថា ទីផ្សារអំពៅស្ករនេះ ចាប់ផ្តើមពីខែកក្កដា ដល់ខែតុលា រូបលោក មានផ្ទៃដីទំហំ ២០អា អាចដាំបានអំពៅជាង ១០០០ដើម ហើយក្នុងគុម្ពនីមួយៗ​​​អាចទទួល​បាន​ផល​ចាប់ពី ១៣ដើម ទៅ ១៥ដើម តែត្រូវការថែទាំទឹកច្រើនទើបអាចទទួលបានផលល្អប្រសើរ។

អ្នកលក់អំពៅក្នុងស្តង់ផ្សារតាខ្មៅផ្សេងទៀត បា​នលើកឡើងថា អំពៅស្ករនេះ​មិនត្រឹមតែមានក្នុងខែកុម្ភៈនេះ​ទេ គឺអាចមានរហូតដល់ខែមេសា ជារដូវចូលឆ្នាំខ្មែរ ដែលមានទិន្នផលខ្ពស់ ​ដោយការលូតលាស់ដើម​អំពៅ​រហូត​​ដល់កំពស់ ៣ម៉ែត្រក៏មានដែរ ដែលក្នុងនោះមួយបាច់អាចលក់បានទៅដល់ ៣០០០០រៀល។

លោក ផុន អ្នកដឹកជញ្ជូនអំពៅបោះដុំលក់ក្នុងទីផ្សារតាខ្មៅ បានឲ្យ​​​ដឹងទៀតថា រដូវអំពៅពីខែកក្កដា ដល់​

ខែ​​តុលា ក៏នៅមាន រដូវប្រមូលផលអំពៅ ក្នុងខេត្តមួយចំនួនទៀត គឺខេត្តកំពង់ចាម និងខេត្តព្រៃវែង ចាប់ពី​ខែវិច្ឆិកា ដល់ខែធ្នូ នឹងឈានបន្តរហូតដល់ចូលឆ្នាំខ្មែរ ដើម្បីតម្រូវការទីផ្សារក្នុងស្រុក បានគ្រប់រដូវកាល៕