រដ្ឋមន្រ្ដីក្រសួងអភិវឌ្ឍន៍ជនបទ បានជួបឯកអគ្គរដ្ឋទូតថ្មី នៃសាធារណរដ្ឋសហព័ន្ធអាល្លឺម៉ង់ ប្រចាំកម្ពុជា ដើម្បី​បន្តការស្ដារ និងកសាងហេដ្ឋារចនាសម្ព័ន្ធ​គមនាគមន៍ ជំហានទី៧

ភ្នំពេញៈ

ដោយ៖ ហុង ចំណាប់

 

លោក អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ បានជួបសម្ដែងការគួរសម និងពិភាក្សាការងារជាមួយ ឯកឧត្ដម  Christian Berger ឯកអគ្គរដ្ឋទូតថ្មី សាធារណរដ្ឋសហព័ន្ធអាល្លឺម៉ង់ ប្រចាំកម្ពុជា នារសៀលថ្ងៃទី ១៩ ខែកុម្ភៈ ឆ្នាំ២០២០ នៅទីស្ដីការក្រសួង។

រដ្ឋាភិបាលនៃសាធារណរដ្ឋសហព័ន្ធអាល្លឺម៉ង់ នឹងបន្តជួយគាំទ្រដល់ការស្ដារ និងកសាងហេដ្ឋារចនាសម្ព័ន្ធ​គមនាគមន៍ ជំហានទី ៧ បន្តទៀត។

លោកChristian Berger​ បានថ្លែងថា រូបលោកមានបំណងដ៏ធំមួយ គឺដើម្បីស្វែងយល់អំពីគោល​នយោ​បាយ និង​យុទ្ធ​សាស្រ្ដ​អភិវឌ្ឍន៍ជនបទ របស់ក្រសួងអភិវឌ្ឍន៍ជនបទ និងបន្តពង្រឹងកិច្ចសហប្រតិបត្តិការជាមួយ​ក្រសួង​អភិវឌ្ឍន៍ជនបទ។

លោក អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានសម្ដែងនូវការស្វាគមន៍ចំពោះ ឯកឧត្ដម  Christian Berger​ និងបានថ្លែងអំណរគុណដល់ ​រដ្ឋាភិបាលនៃសាធារណរដ្ឋសហព័ន្ធអាល្លឺម៉ង់ ដែលតែងតែជួយគាំទ្រ ដល់រាជរដ្ឋាភិបាលកម្ពុជា ជាពិសេសបានផ្ដល់នូវកិច្ចសហប្រតិបត្តិការល្អ ជាមួយថ្នាក់ដឹកនាំ ​និងមន្រ្ដីអនុវត្តន៍ គម្រោងរបស់ក្រសួងអភិវឌ្ឍន៍ជនបទ និងបានជម្រាបជូន ឯកអគ្គរដ្ឋទូតអំពីតួនាទី និងភារកិច្ចរបស់ក្រសួង​អភិ​​វឌ្ឍន៍​​​ជនបទ គឺ លើកកំរិតកម្ពស់ជីវភាពរស់នៅរបស់ប្រជាពលរដ្ឋនៅតំបន់ជនបទ ទាំងផ្នែកសេដ្ឋកិច្ច និង​សង្គមកិច្ច ដោយផ្អែកទៅលើកម្មវិធីជាយុទ្ធសាស្រ្ដទាំង​ ៤ រួមមាន៖ ទី១ ការពង្រឹងស្ថាប័ន អភិវឌ្ឍន៍​សមត្ថ​ភាព និងធនធានមនុស្ស ទី២/ ការអភិវឌ្ឍហេដ្ឋារចនាសម្ព័ន្ធរូបវ័ន្ដ និងគមនាគមន៍ ទី៣/ ការកែលម្អ​លក្ខ​ខណ្ឌ​​រស់នៅ និងលើកកម្ពស់ជីវភាពរបស់សហគមន៍ជនបទ និងទី៤/ ពិពិធកម្មសកម្មភាពសេដ្ឋកិច្ចជនបទ។

លោក​ រដ្ឋមន្រ្ដី បានបន្តទៀតថា ក្រសួងអភិវឌ្ឍន៍ជនបទ ​បានធ្វើការបណ្ដុះបណ្ដាលជំនាញវិជ្ជាជីវៈ និងបាន ជួយគាំទ្រឲ្យមានមុខរបរបន្ថែមក្រៅពីការបង្កបង្កើនផលស្រូវ។ ក្រសួងអភិវឌ្ឍន៍ជនបទ បានស្នើសុំឲ្យភាគី អាល្លឺ​ម៉ង់ ជួយគាំទ្រផ្នែក​​សម្ភារៈ និងបច្ចេកទេសដល់មន្ទីរពិសោធន៍ របស់ក្រសួងអភិវឌ្ឍន៍ជនបទផងដែរ។

លោក ឯកអគ្គរដ្ឋទូត បានវាយតម្លៃខ្ពស់ចំពោះតួនាទី និងភារកិច្ចរបស់ក្រសួងអភិវឌ្ឍន៍ជនបទ ព្រោះថា ក្រសួងមានកម្មវិធីអភិវឌ្ឍន៍ជនបទបែបចម្រុះ គ្រប់វិស័យ។  រដ្ឋាភិបាលអាល្លឺម៉ង់ បានជួយដល់រាជរដ្ឋា​ភិបាល​​​កម្ពុជា តាមរយៈអង្គការ GTZ និងធនាគារអភិវឌ្ឍន៍អាល្លឺម៉ង់ KFW ក្នុងកម្មវិធីស្ដារហេដ្ឋារចនាសម្ព័ន្ធ ហៅកាត់​ថា RIP ដែលមកដល់ពេលនេះ បានអនុវត្តជំហានទី៦ ហើយត្រូវបញ្ចប់នៅបំណាច់ខែមីនា ខាង​មុខនេះ។ លោក ឯកអគ្គរដ្ឋទូត បានបន្តទៀតថា រដ្ឋាភិបាលនៃសាធារណរដ្ឋសហព័ន្ធអាល្លឺម៉ង់ នឹងបន្តជួយ​គាំទ្រដល់ការស្ដារ និងកសាងហេដ្ឋារចនាសម្ព័ន្ធ ជំហានទី ៧បន្តទៀត ចំពោះមន្ទីរពិសោធន៍ ឯកឧត្ដម​ បាន​ទទួលយកសំណើនេះ ដើម្បីយកទៅពិចារណាផងដែរ ៕