លោក ឈាន រដ្ឋា ប្រធានស្តីទី​នាយកដ្ឋានអភិរក្សប្រាសាទ ថា កំណាយស្រាវជ្រាវរចនាសម្ពន្ធផ្លូ​វបុរាណ​ពី​តំបន់​​អង្គរ ទៅតំបន់រលួស គឺដើម្បីលើកតម្លៃកំណាត់ផ្លូវបុរាណ ឲ្យក្លាយជាបេតិក​ភណ្ឌ​​រស់

 ខេត្តសៀមរាបៈ

ដោយ៖ សេង ស៊ីដារ៉ូ

 

ផ្លូវបុរាណមួយខ្សែ ដែលតភ្ជាប់រាជធានីពីរ នៅសម័យអង្គរ គឺរាជធានីយសោធរ (អង្គរ) និងរាជធានី​ហរិហរា​ល័យ (រលួស) ស្ថិតនៅភូមិស្ពានក្អែក ឃុំកណ្តែក ស្រុកប្រាសាទបាគង ខេត្តសៀមរាប ត្រូវបានអាជ្ញាធរជាតិ​(អប្សរា​)ធ្វើការស្រាវជ្រាវរកឃើញ កាលពីថ្ងៃទី២០ ខែវិច្ឆិកា ដល់ថ្ងៃទី១៧ ខែធ្នូ ឆ្នាំ២០១៩ កន្លងទៅនេះ។

ក្នុងការស្រាវជ្រាវឲ្យបានច្បាស់អំពីរចនាសម្ពន្ធផ្លូវបុរាណ ក្រុមការងារបានចុះសិក្សាសម្រង់ប្លង់ វាស់វែង និង​បើក​រណ្តៅកំណាយចំនួន៥ ដើម្បីដឹងពីបច្ចេកទេសនៃការសាងសង់ផ្លូវរបស់បុព្វបុរសខ្មែរ។ លទ្ធផលនៃការ​ស្រាវ​​ជ្រា​វនេះ បាន​​បង្ហាញថា ផ្លូវបុរាណដែលកសាងឡើងដោយការចាក់បង្ហាប់ដី មានបីស្រទាប់ គឺស្រទាប់​ក្រោមប្រើល្បាយដីខ្សាច់ជាមួយដីឥដ្ឋ ស្រទាប់កណ្តាលប្រើល្បាយកម្ទេចថ្មបាយក្រៀម ដីខ្សាច់ និងដីឥដ្ឋ និង​ស្រទាប់ខាងលើបង្អស់ជាល្បាយដីឥដ្ឋលាយជាមួយដីខ្សាច់ភាគច្រើន ។

ក្រសួងវប្បធម៌ និងវិចិត្រសិល្បៈ លោក ឈាន រដ្ឋា ប្រធានស្តីទី​នាយកដ្ឋានអភិរក្សប្រាសាទ ក្រៅឧទ្យានអង្គរ​បានឱ្យដឹងថា ការធ្វើកំណាយស្រាវជ្រាវរចនាសម្ពន្ធផ្លូ​វបុរាណពីតំបន់អង្គរ ទៅតំបន់រលួសនេះ គឺក្នុងគោល​បំណង​ប្រៀបធៀបទៅនឹងរចនាសម្ពន្ធនៃផ្លូវបុរាណ​ដទៃទៀត ដែលស្ថិតនៅទីតាំងផ្សេង និងពិចារណាក្នុងការ​លើកគម្រោង​អភិរក្ស និងអភិវឌ្ឍន៍ ដើម្បីលើកតម្លៃកំណាត់ផ្លូវបុរាណនេះឡើងវិញ ឲ្យក្លាយជាបេតិក​ភណ្ឌ​​រស់។

ផ្លូវនេះមានទំហំសរុប ពី៥៦ទៅ៦៦ម៉ែត្រ ដោយចែកជាទ្រូងផ្លូវទំហំ ពី៣០ទៅ៤០ម៉ែត្រ ជើងទេរ៣ម៉ែត្រ​សងខាង ប្រឡាយទឹកប្រវែងពី៧ទៅ១០ម៉ែត្រសងខាង និងកម្ពស់ផ្លូវពី១,២០ទៅ១,៥០ម៉ែត្រ។ ក្រៅពី​លទ្ធ​ផល​បានពីកំណាយខាងលើ តាមរយៈការវាស់វែងលើទីតាំងផ្សេងៗគ្នា នៅលើកំណាត់ផ្លូវបុរាណនេះ បញ្ជាក់​ថា ជាទូទៅផ្លូវមានទំហំសរុបចន្លោះពី៧០ទៅ១០០ម៉ែត្រ គិតទាំងប្រឡាយអមផ្លូវផង ដោយឡែកនៅជិត​នឹង​​គល់ស្ពាន ​​តួផ្លួវមានទំហំរួមតូចចន្លោះពី៥៦ទៅ៦៦ម៉ែត្រ៕