ផ្កាអង្គាសិល្ប៍ មានតម្លៃខ្ពស់ ក្នុងឱកាសចូលឆ្នាំចិន

 ខេត្តកណ្តាលៈ

ដោយ៖ ហុង ចំណាប់

 

ផ្កាអង្គារសិល្ប៍ គឺជាផ្កាដែលមានតម្លៃខ្ពស់ជាងគេ ក្នុងពេលចូលឆ្នាំចិននេះ ហើយផ្កានេះ​វាពិបាកដើររក វាដុះ​នៅតាមព្រៃភ្នំឆ្ងាយៗ នៅពេលចូលឆ្នាំចិនម្តងៗ មានប្រជាពលរដ្ឋខ្មែរ ចិន វៀតណាម ជាច្រើន​តែងតែនាំគ្នា​មក​​ទិញផ្កាអង្គារសិល្ប៍នេះ​ យ៉ាងភ្លូកទឹកភ្លូកដី ព្រោះគេមានជំនឿថា ជាផ្កាលើករាសីដ៏ល្អបំផុត។

លោក ផាត រស់នៅសង្កាត់តាក្តុល ក្រុងតាខ្មៅ ខេត្តកណ្តាល បានឲ្យដឹងថា រូបលោក តែងតែលក់​ផ្កាអង្គារ​សីល្ប៍​​ជារៀងរាល់ឆ្នាំ ក្នុងឆ្នាំនេះនឹងឆ្នាំទៅ ផ្កាអង្គារសិល្ប៍នៅមានតម្លៃមិនខ្ពស់ខុសគ្នាឡើយ ដោយឆ្នាំទៅ​លោកផាត អាចលក់បានចំនួន ៥០ដើម ក្នុងរយៈពេលមុនចូលឆ្នាំចិន។

លោកផាត បានទិញផ្កាអង្គារសិល្ប៍នេះ ពីភ្នំក្រវ៉ាញ ខេត្តពោធិសាត់ យកមកទុកមុនពេលចូលឆ្នាំចិន ចាប់ពី ១០ទៅ១២ថ្ងៃ ទើបរូបលោកលក់ចេញទៅវិញ ព្រោះជាផ្កាមានសំណាង ​បើសិនផ្កានេះ​ចេញមុនកាល​កំណត់​ មានន័យថា ពេលចូលឆ្នាំចិន​មក​​​ដល់ អ្នកលក់ផ្កាអង្គារសិល្ប៍អាចខាតបង់ច្រើន ក៏ព្រោះពុំមានអ្នកទិញ បើមាន​អ្នកទិញក៏តម្លៃថោកដែរ។ ដើមផ្កាអង្គារសិល្ប៍តូចបំផុតតម្លៃ ១២០០០រៀល ហើយធំខ្ពស់បំផុតតម្លៃ​រហូត​ដល់ ១២០ដុល្លារ។

ក្នុងឆ្នាំនេះ ប្រជាពលរដ្ឋអាចមកទិញផ្កាអង្គាសិល្ប៍ច្រើន គឺចាប់ពីថ្ងៃទី២០ រហូតដល់ថ្ងៃទី២៤ មករា។  ជន​ជាតិ​ចិន មានជំនឿនិងកត់សម្គាល់ទៅលើផ្កាអង្គា​​សិល្ប៍នេះឲ្យឃើញថា នៅពេលផ្កានេះចាប់ផ្តើមរីកល្អ ក្នុង​ថ្ងៃ​​ចូលឆ្នាំចិន គ្រួសារនោះ ទទួលបាននូវលាភសក្ការៈ ត្រជាក់ត្រជុំ រកស៊ីកាកកប ជាដើម៕