ផលិតផលគ្រាប់ស្វាយចន្ទី ចំអិន របស់អ្នកនាង ឡឹង ម៉ានុត មានការទទួលស្គាល់​ពីអតិថិជនក្នុងស្រុក និង​ក្រៅប្រទេស ទៅលើរសជាតិ និងអនាម័យ

 ខេត្តកំពង់ចាមៈ

ដោយ៖ ឌឹម​​ គឹមហាក់

 

សិប្បកម្មគ្រាប់ស្វាយចន្ទីចំការលើ កំពុងពង្រីកអាជីវកម្ម ដោយធ្វើការកែច្នៃ និងវេចខ្ចប់ជាកំប៉ុង ឲ្យកាន់តែ​ទំនើប​ជាងមុន ដើម្បីរក្សាគុណភាព និងរសជាតិឈានមុខគេ ដើម្បីទាក់ទាញ អតិថិជននៅទូទាំងក្នុង និង​ក្រៅប្រទេសផងដែរ។

អ្នកនាង ឡឹង ម៉ានុត ម្ចាស់សិប្បកម្មគ្រាប់ស្វាយចន្ទីចំការលើ ដែលស្ថិតនៅក្នុងឃុំតាអុង ស្រុកចំការលើ ខេត្តកំពង់ចាម បានឲ្យដឹងបន្ថែមទៀតថា រូបនាង មានគំនិតបង្កើតការកែច្នៃ និងការវេចខ្ចប់នេះឡើង​តាំងពី​ឆ្នាំ២០១៦ (វេចខ្ចប់ជាថង់) លុះដល់ឆ្នាំ២០១៧ ទើបរូបនាង បានកែច្នៃយកទៅដាក់ក្នុងកំវិញ។

អ្នកនាង ម៉ានុត បានបន្តទៀតថា ក្រោយពេល រូបនាង បានទៅសិក្សាយកបទពិសោធនិ៍ ​នៅប្រទេស​វៀត​ណាម រូបនាង ក៏បានឃើញការវិវិត្តន៍ជឿនលឿនក្នុងប្រទេសគេ មានការវេចខ្ចប់ត្រឹមត្រូវ ទើបមានគំនិត​​ធ្វើការកែលំអរវេចខ្ចប់គ្រាប់ស្វាយចន្ទីនេះឡើងវិញ ហើយបន្ទាប់មក រូបនាង ក៏ទទួលបានការគាំទ្រច្រើន​ពី​អ្នក​ទទួលទាន និងសរសើរថា គ្រប់ស្វាយចន្ទីរបស់នាងគុណភាពល្អ។

បច្ចុប្បន្នទីផ្សារគ្រាប់ស្វាយចន្ទីចំអិនហើយនេះ បានពង្រីកចែកចាយលក់ទៅដល់ ទីក្រុងភ្នំពេញ សៀមរាប បាត់ដំបង កំពង់ធំ កំពង់ចាម…។ បើយើងនិយាយពីរសជាតិគ្រាប់ស្វាយចន្ទីនេះវិញ ដែលអ្នកទទួលទាន មានការគាំទ្រច្រើន ព្រោះវាមានរស​ជាតិ​ឆ្ងាញ់ខុសប្លែងពីគ្រាប់ស្វាយចន្ទីនាំចូលពីក្រៅប្រទេស។

ហើយអ្វីដែលគួរឲ្យកត់សម្គាល់នោះ ក្នុងឆ្នាំ២០១៩ថ្មីៗនេះ គ្រាប់ស្វាយចន្ទីចំអិនហើយនេះ មានការកើន​ឡើង​​ច្រើន​រហូតដល់ ១៥% ដែលអតិថិជនក្នុងស្រុកទទួលស្គាល់ ជាពិសេស​ភ្ញៀវទេសចរណ៍ ជាជនជាតិចិន តែម្តងដែលទទួលស្គាល់ពីគុណភាពគ្រប់ស្វាយចន្ទីចំអិននេះ៕