ឧបនាយករដ្ឋមន្ត្រី យឹម ឆៃលី បានផ្តល់អនុសាសន៍ ១២ចំណុច ដល់ក្រសួងអភិវឌ្ឍនជនបទ

ភ្នំពេញៈ

ដោយ៖ ហុង ចំណាប់

 

ឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍ វិស័យកសិកម្ម និងជនបទ តំណាង​ដ៏ខ្ពង់​ខ្ពស់​របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុង​ឱកាស​បិទ​សន្និបាតបូកសរុបការងារឆ្នាំ២០១៩ និងលើកទិសដៅការងារឆ្នាំ២០២០ របស់ក្រសួង​អភិវឌ្ឍន៍​ជនបទ នូវ​អនុ​​សាសន៍ ១២ចំនុច ដើម្បីបន្តជម្រុញខិតខំសម្រេច ឲ្យខានតែបាននូវទិសដៅដែលបានដាក់​ចេញសម្រាប់​ឆ្នាំ​២០២០ និងឆ្នាំបន្តបន្ទាប់ ដល់ក្រសួងអភិវឌ្ឍន៍ជនបទ កាលពីថ្ងៃទី២៩ ខែមករា ឆ្នាំ២០២០ នៅសណ្ឋា​គារ​​សុខាភ្នំពេញ​។

លោក អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍​ជនបទ បានលើឡើង​អំពី​លទ្ធ​ផល​ដែលក្រសួងសម្រេចបាន​ក្នុង​ឆ្នាំ២០១៩ ឲ្យឃើញថា តំបន់ជនបទ នៅកម្ពុជា មាន​ការ​ប្រែ​ប្រួល​ផ្លាស់​ប្តូរមុខមាត់គួរឲ្យកត់សម្គាល់់់។

លោកឧបនាយករដ្ឋមន្ត្រី បានមានប្រសាសន៍ថា សហគមន៍​ជនបទ​កម្ពុជា ​ជាតំបន់កំពុងឈានឆ្ពោះ ទៅរក​ការ​​​​អភិវឌ្ឍ​ និង​ភាព​ស៊ីវិល័យ មានជាអាទិ៍​(១).ប្រព័ន្ធផ្លូវគមនាគមន៍​គ្រប​ដណ្តប់ដោយផ្លូវ ស្ពាន និង សំណង់​​​ សិល្បការ្យគ្រប់ប្រភេទ បានទូលំទូលាយ និងគ្រប់ច្រកល្ហក ដែល​បង្ក​ភាពងាយស្រួល​ក្នុង​ការ​ដឹក​ជញ្ជូន និងការធ្វើដំណើរ បានផ្តល់អត្ថប្រយោជន៍កាន់តែមានប្រសិទ្ធភាព ដល់​សកម្មភាពសេដ្ឋកិច្ច​ និង​សង្គម​កិច្ច បង្ខឹតតំបន់ជនបទឲ្យស្ថិតមកកាន់តែជិតទីប្រជុំជន (២).ប្រព័ន្ធផ្គត់​ផ្គង់ទឹកស្អាតនៅជនបទ ត្រូវបាន​សាង​សង់ ជាជំហានៗ​យ៉ាងឆាប់រហ័សនូវអណ្តូងទឹក ស្រះទឹក ប្រព័ន្ធ​ចម្រោះ​ទឹក និងបណ្តាញផ្គត់ផ្គង់ទឹក, (៣).ការសម្អាត និងអនាម័យកាន់តែត្រូវបានយកចិត្តទុកដាក់ តាម​រយៈ​កា​រអប់រំ ផ្សព្វផ្សាយការយល់ដឹងអំពី​គុណប្រយោជន៍ នៃភាពស្អាតបាតក្នុងការរស់នៅ នោះប្រជាជនជន​បទ​បានគាំទ្រនឹងចូលរួមយ៉ាងសកម្មក្នុង​ចលនា​សម្អាតខ្លួន ប្រាណ និងលំនៅឋាន និងការលប់បំបាត់ការ​បន្ទោរ​បង់ពាសវាលពាសកាល ដែលប្រមូល​ផ្តុំ ជាសំខាន់លើការសាងសង់ប​ន្ទប់ទឹក ​និងបង្គន់អនាម័យ នៅតាមគេហស្ថាន និងនៅតាមគ្រឹះស្ថាន​សា​ធារណៈ​​នានា។

យោងតាមការអង្កេតសេដ្ឋកិច្ចសង្គម​កិច្ចកម្ពុជា អាត្រា​នៃ​ការ​ទទួល​បាន​សេវា​​អនាម័យ ​បាន​កើនឡើង​គួរឲ្យ​កត់​សម្គាល់​ ពោលគឺ​កើនឡើងពី ២៩,២% នៅឆ្នាំ២០១០ ដល់ ៧១,២% នៅឆ្នាំ២០១៧។ អត្រា​នៃ​ការ​បន្ទោរបង់ពាសវាលពាសកាល​បាន​ថយចុះ​ជិត​៤០% ដោយ​ធ្លាក់ចុះពី ៦៥,៧% នៅឆ្នាំ២០១០ មកត្រឹម ២៥,៤% នៅឆ្នាំ២០១៧។ ការ​ផ្តត់ផ្គង់ទឹកស្អាត​​បាន​កើន​ឡើង​​​ប្រមាណ​ ១២,១ % ពោលគឺ​​កើនពី ៤៦,៦% ទៅ​ ៥៨,៧% នៅឆ្នាំ២០១៧។

យោងតាមការប៉ាន់ស្មាន គិតដល់ដំណាច់ឆ្នាំ២០១៩នេះ ប្រជាជន​ជនបទប្រមាណ ៧០% ទទួលបាន​ទឹក​ស្អាត និង៨០% មានបង្គន់អនាម័យប្រើប្រាស់, ​(៤).ការបង្កើតការងារ មុខរបរ សហគ្រិនភាព និងសកម្ម​ភាព​សេដ្ឋកិច្ចគ្រួសារ បានរួមចំណែកយ៉ាងសកម្ម លើកកម្ពស់ជីវភាពរស់នៅ កាត់បន្ថយភាពក្រីក្ររបស់​ប្រជា​ជន ​​ដែលភាគច្រើនរស់នៅទីជនបទ តាមរយៈការធ្វើពិពិធកម្មសកម្មភាពសេដ្ឋកិច្ចជនបទ ដូចជាការបណ្តុះ បណ្តាលជំនាញវិជ្ជាជីវៈ ខាងកសិកម្ម សិប្បកម្ម សេវាកម្មតូចតាច និងមុខរបរដទៃទៀត បង្ក​ឲ្យមាននិរន្តភាព និងបង្កើតបានភាពសុខដុមរម្យនាក្នុងសង្គម គ្រួសារជនបទ។

លោកឧបនាយករដ្ឋមន្ត្រី យឹម ឆៃលី មានប្រសាសន៍បន្តទៀតថា ទោះបីជា​ក្រសួង​សម្រេច​បានជោគជ័យ​ជា​ច្រើន ក៏ដោយក៏នៅមានបញ្ហាមួយចំនួន ពុំទាន់​ដោះ​ស្រាយ​អស់នៅឡើយ ​ដូចជា​ការកើន​ឡើង​យ៉ាងគំហុក​នូវតម្រូវការប្រើប្រាស់ផ្លូវជនបទ ​ការដឹកជញ្ជូនលើសទម្ងន់កម្រិត កំណត់ ​ការអភិវឌ្ឍ​នៅ​ទី​ដាច់ស្រយាល ចំណេះ​​ជំនាញ​មូលដ្ឋាន​នៅពុំទាន់គ្រប់គ្រាន់ ការយល់ដឹង​អំពីការរស់នៅស្អាត និងសុខភាព​អនាម័យនៅខ្វះ​ចន្លោះ​​ជាច្រើននៅតំបន់ជនបទដាច់ស្រយាល។ លើសពីនេះ កត្តាប្រែប្រួល អាកាស​ធាតុ​នៅ​តែជា​បញ្ហា​ប្រឈម​​មួយផងដែរ សម្រាប់ហេដ្ឋារចនាសម្ព័ន្ធផ្លូវថ្នល់ជនបទ និងហេដ្ឋរចនាសម្ព័ន្ធ រូបវ័ន្ត​ដទៃ​ទៀត ដែល​ទាម​​ទារឲ្យមានការជំរុញ និងយកចិត្តទុកដាក់បន្ថែមទៀត។

ឧបនាយករដ្ឋមន្ត្រី យឹម ឆៃលី បានផ្តល់អនុសាសន៍ ១២ចំនុច ដល់ក្រសួងអភិវឌ្ឍន៍ជនបទមាន ៖

ទី១-ខ្ញុំសូមអបអរសាទរ និងកោតសរសើរចំពោះសមិទ្ធផល ដែលសម្រេចបានគួរជាទីមោទនៈទាំងនេះ ពិសេស គឺគោលដៅយុទ្ធសាស្រ្តស្នូលទាំង ០៤ របស់ក្រសួង គឺ៖ (១).ពង្រឹងស្ថាប័ន អភិវឌ្ឍន៍ សមត្ថភាព និង​​ធនធាន​មនុស្ស, (២).អភិវឌ្ឍន៍ហេដ្ឋារចនាសម្ព័ន្ធរូបវ័ន្ត និងគមនាគមន៍, (៣).កែលម្អលក្ខខណ្ឌរស់នៅ និង​លើកកម្ពស់ជីវភាពរបស់សហគមន៍ជនបទ និង(៤).ពិពិធកម្មសកម្មភាពសេដ្ឋកិច្ចជនបទ។ គោលដៅ​​ស្នូល​ទាំងនេះ មានលក្ខណៈគ្របដណ្តប់ទាំងស្រុង លើសមត្ថកិច្ច ក្រសួងផង និងកម្មវិធីកំណែ​ទម្រង់​​របស់រាជរដ្ឋាភិបាលផង។

ទី២-បន្តគាំទ្ររាជរដ្ឋាភិបាលធានានូវសុខសន្តិភាព និងស្ថិរភាពនយោបាយនៅកម្ពុជា។

ទី៣-បន្តគាំទ្រ និងចូលរួមអនុវត្តន៍ឲ្យកាន់តែសកម្មលើកម្មវិធីកំណែទម្រង់ស៊ីជម្រៅ យុទ្ធសាស្រ្ត ចតុកោណ​ដំណាក់កាលទី៤ របស់រាជរដ្ឋាភិបាល។

ទី៤-បន្តជំរុញការអភិវឌ្ឍសមត្ថភាពមន្រ្តីរាជការ និងអភិវឌ្ឍន៍ស្ថាប័នឲ្យកាន់តែប្រសើរឡើង ថែមទៀត ដើម្បី​លើកកម្ពស់ប្រសិទ្ធភាពការងារទទួលបានភាពរីកចំរើនជាបន្តទៀត។​

ទី៥-បន្តខិតខំសិក្សាស្រាវជ្រាវបច្ចេកវិជ្ជាថ្មីៗ ដើម្បីកែច្នៃសម្ភារប្រើប្រាស់មួយចំនួន ជំនួសឲ្យ ការថយចុះ​យ៉ាង​គំហុកនូវវត្ថុធាតុដើម រួមមាន៖ ក្រួសក្រហម ខ្សាច់ភ្នំ។ល។ សម្រាប់បម្រើដល់ការ ស្ថាបនា ស្តារឡើងវិញ ថែទាំ និងជួសជុលផ្លូវជនបទ។​

ទី៦-បន្តលើកកម្ពស់គុណភាព គុណតម្លៃជីវិតរស់នៅរបស់ប្រជាពលរដ្ឋជនបទ និងខិតខំ សម្រេចឲ្យបាន​ទស្សន​វិស័យនៃគោលនយោបាយជាតិ ស្តីពីការផ្គត់ផ្គង់ទឹកស្អាត និងអនាម័យជនបទ ឆ្នាំ២០២៥ ប្រជាជន​ជន​បទគ្រប់រូប ត្រូវទទួលបានសេវាផ្គត់ផ្គង់ទឹកស្អាត និងអនាម័យគ្រប់គ្រាន់ និង រស់នៅក្នុងបរិស្ថាន​ដែល​មាន​​អនាម័យប្រកបដោយនិរន្តរភាព។​

ទី៧-បន្តយកចិត្តទុកដាក់កែប្រែឥរិយាបទនៃការរស់នៅ ឲ្យយល់ដឹងអំពីបញ្ហាសុខភាព ការរស់នៅស្អាត និង​បញ្ឈប់​ការបន្ទោបង់ពាសវាលពាសកាល (ODF) ឆ្នាំ២០២៥ បានទូទាំងប្រទេស។​

ទី៨-បន្តជំរុញសកម្មភាពសេដ្ឋកិច្ចជនបទ តាមរយៈសកម្មភាពចលនាភូមិមួយផលិតផលមួយ និងសហគ្រិន​ភាព ដើម្បីគាំទ្រដល់ការបង្កើនប្រាក់ចំណូលគ្រួសារ និងទប់ស្កាត់ការធ្វើចំណាកស្រុក ដោយប្រថុយប្រថាន។​

ទី៩-បន្តអនុវត្តកំណែទម្រង់វិមជ្ឈការ និងវិសហមជ្ឈការ ដោយខិតខំធ្វើសមាហរណកម្ម មន្រ្តីរាជការ ធនធាន និងទ្រព្យសម្បត្តិទៅថ្នាក់ក្រោមជាតិ ដើម្បីរក្សាឲ្យបាននូវស្ថិរភាពនៃការអភិវឌ្ឍ មូលដ្ឋានប្រកបដោយបរិយា​ប័ន្ន តាមបែបប្រជាធិបតេយ្យនៅថ្នាក់ក្រោមជាតិ។​

ទី១០-បន្តពង្រឹង និងពង្រីកកិច្ចសហប្រតិបត្តិការជាមួយបណ្តាអង្គការដៃគូ វិស័យឯកជន និងបណ្តាប្រទេស​ជាមិត្តនានា ដើម្បីកៀងគរប្រភពធនធានហិរញ្ញវត្ថុ បច្ចេកទេស និងបច្ចេកវិទ្យាថ្មីៗ សម្រាប់ទ្រទ្រង់​វិស័យ​អភិវឌ្ឍន៍ជនឲ្យមានការរីកចំរើន។

ទី១១-បន្តសហការណ៍ជាមួយក្រសួងសាធារណការ និងដឹកជញ្ជូន រៀបចំស្នើសុំរាជរដ្ឋាភិបាល ធ្វើវិសោធន៍​កម្ម អនុក្រឹត្យលេខ ១៤១ អនក្រ.បក ចុះថ្ងៃទី៣១ ខែសីហា ឆ្នាំ២០០៩ ស្តីពីការបង្កើត គណៈកម្មាធិការដឹក​នាំ​ការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ និងអនុក្រឹត្យលេខ ១៩៧ អនក្រ.បក ចុះថ្ងៃ​ទី​២៣ ខែវិច្ឆិកា ឆ្នាំ២០០៩ ស្តីពីការគ្រប់គ្រងដីចំណីតាមបណ្តាញផ្លូវជាតិ និងផ្លូវរថភ្លើង ដើម្បីដាក់បញ្ចូល​បន្ថែមសមត្ថកិច្ចរបស់ក្រសួងអភិវឌ្ឍន៍ជនបទ។

ទី១២-សហការណ៍ជាមួយក្រសួងសាធារណការ និងដឹកជញ្ជូន រៀបចំបែបបទ និងវិធីសាស្រ្ត នៃការបង្កើត​ផែន​​ការមេផ្លូវថ្នល់ ការរៀបចំគម្រោងប្លង់ និងការកំណត់អាទិភាពគម្រោង៕