ក្រសួងអភិវឌ្ឍន៍ជនបទ ធ្វើសន្និបាតបូកសរុបលទ្ធផលការងារឆ្នាំ២០១៩ និងលើទិសដៅការងារឆ្នាំ២០២០

ភ្នំពេញៈ

ដោយ៖ ហុង ចំណាប់

 

លោក អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍនជនបទ បានបើកសន្និបាតបូកសរុបលទ្ធផលការងារឆ្នាំ២០១៩ និងលើទិសដៅការងារឆ្នាំ២០២០ របស់ក្រសួងអភិវឌ្ឍន៍ជនបទ នៅសណ្ឋាគារ សុខាភ្នំពេញនា​​ថ្ងៃទី២៩​មករា។

លោក អ៊ុក រ៉ាប៊ុន រដ្ឋមន្ត្រី​ក្រសួង​អភិវឌ្ឍន៍ជនបទ បានមានប្រសាសន៍ថា សម្តេច ហ៊ុន សែន នាយករដ្ឋមន្ត្រី បានបង្ហាញជូនរដ្ឋសភាកាលពីសម័យប្រជុំនាដើមនីតិកាលទី៦ បានកំណត់ដាក់ចេញនូវគោលដៅ​ ជាយុទ្ធ​សាស្ត្រគោលនយោបាយធំៗជាអាទិភាព គឺ​​គោលនយោបាយអភិវឌ្ឍតាមវិស័យ ​និងវិធានការជាក់ស្តែង​ជាអា​ទិភាព សម្រាប់អនុវត្តន៍ចាប់ពីឆ្នាំ២០១៩ទៅ ដែលជាត្រីវិស័យសម្រាប់តម្រង់ទិសសកម្មភាព ​របស់រាជរដ្ឋាភិ​បាល ក្នុងការបន្តបំពេញភារកិច្ចបម្រើជាតិ និងប្រជាជនក្នុងនីតិកាលទី៦នេះ។

ក្នុងសម័យប្រជុំគណៈរដ្ឋមន្ត្រីលើកដំបូង សម្តេចតេជោនាយករដ្ឋមន្ត្រី បាន ដាក់ចេញនូវយុទ្ធសាស្ត្រចតុកោណ​ដំណាក់​កាលទី៤ ដែលជារបៀបវារៈគោលនយោបាយសង្គម-សេដ្ឋកិច្ច នៃកម្មវិធីនយោបាយខាងលើ ដោយ​កំណត់វិធានការ គោលនយោបាយជាយុទ្ធសាស្ត្រ ជាក់ស្តែង សម្រាប់អនុវត្តន៍កម្មវិធីនយោបាយនោះ សំដៅ​ឆ្លើយតបទៅនឹងបំណងប្រាថ្នាដ៏ពិសិដ្ឋ របស់ប្រជាជនផង ព្រមទាំង សំដៅកសាងមូលដ្ឋានគ្រឹះចាំបាច់​ទាំង​ឡាយឆ្ពោះទៅគោលដៅ នៃចក្ខុវិស័យកម្ពុជាឆ្នាំ២០៣០ ជាប្រទេសមានចំណូលមធ្យមកម្រឹតខ្ពស់ និង​ឈាន​​ទៅសម្រេច ចក្ខុវិស័យជាប្រទេសមានចំណូលខ្ពស់នៅ ឆ្នាំ២០៥០ផង។

លោករដ្ឋមន្ត្រី បានបន្តថា  លើមូលដ្ឋាននៃឯកសារក្របខណ្ឌគោលនយោបាយគ្រប់ជ្រុងជ្រោយ ទាំងពីរខាង​លើ​នេះ រាជរដ្ឋាភិបាលបានប្រកាសដាក់ឲ្យអនុវត្តន៍ផែនការយុទ្ធសាស្ត្រអភិវឌ្ឍន៍ជាតិ ឆ្នាំ២០១៩-២០២៣ និងក្របខណ្ឌគោលដៅអភិវឌ្ឍន៍ ប្រកបដោយភាពល្អប្រសើរសម្រាប់កម្ពុជាឆ្នាំ២០១៦-២០៣០ ដែលកំណត់ លម្អិត​បន្ថែមនូវវិធានការផែនការសកម្មភាព តាមវិស័យ និងបញ្ជាក់អំពីការទទួលខុសត្រូវ អនុវត្តន៍​របស់​ក្រសួង ស្ថាប័នទាំងនៅថ្នាក់ជាតិ និងនៅថ្នាក់ក្រោមជាតិ។ ចំពោះក្រសួងអភិវឌ្ឍន៍ជនបទ ដោយផ្អែកលើគោល​ការណ៍​ដឹកនាំទាំងអស់ខាងលើនេះរបស់រាជរដ្ឋាភិបាល នោះ​ក្រសួង​បាន​បំផុស និងប្រមូលផ្តុំគំនិតច្នៃ​ប្រឌិតនិង បទពិសោធន៍នានា ពីសំណាក់ថ្នាក់ដឹកនាំ និង​មន្ត្រី​ជំនាញគ្រប់លំដាប់ថ្នាក់ រួមគ្នាចងក្រងបានជា ផែនការយុទ្ធសាស្ត្រអភិវឌ្ឍន៍ជនបទ សម្រាប់​រយៈពេល៥ឆ្នាំ (២០១៩-២០២៣) ដែលមាន ទិសដៅ​ចម្បង​​គឺ បន្តលើក​កម្ពស់​គុណភាព ​និងគុណតម្លៃនៃជីវិតរស់នៅរបស់ប្រជាជនជនបទ ដោយផ្តោតលើ​កម្ម​​វិធី​៤ មានជាអាទិ៍៖

ទី១-ពង្រឹងស្ថាប័ន អភិវឌ្ឍន៍សមត្ថភាព និងធនធានមនុស្ស ដើម្បីធានាប្រសិទ្ធភាព នៃការគ្រប់គ្រងក្រសួង​គាំទ្រ​ដល់កម្មវិធីអភិវឌ្ឍធនធានមនុស្ស និងអភិបាលកិច្ចល្អ ការអភិវឌ្ឍ ប្រកបដោយនិរន្តរភាពទាំងនៅ​ថ្នាក់​ជាតិ និងនៅថ្នាក់ក្រោមជាតិ សំដៅរួមចំណែក្នុងការអនុវត្ត កម្មវិធីកំណែទម្រង់រដ្ឋបាលសាធារណៈ កំណែ​ទម្រង់ការគ្រប់គ្រងហិរញ្ញវត្ថុសាធារណៈ កំណែទម្រង់ វិមជ្ឈការ និងវិសហមជ្ឈការ និងកំណែទម្រង់ដ៏ទៃទៀត​ឲ្យកាន់តែមានប្រសិទ្ធភាពខ្ពស់។

ទី២-អភិវឌ្ឍហេដ្ឋារចនាសម្ព័ន្ធរូបវ័ន្ត និងគមនាគមន៍ បន្ថែមទៀតឲ្យដល់គ្រប់ច្រកល្ហក នៃតំបន់ជនបទ ជាពិ​សេស​​​តំបន់​ដែលមានសក្តានុពលសេដ្ឋកិច្ចខ្ពស់។

ទី៣-កែលម្អលក្ខខណ្ឌនៃការរស់នៅរបស់សហគមន៍ជនបទ សំដៅធ្វើឲ្យប្រសើរ ឡើងនូវគុណភាពនៃការរស់​នៅ​ប្រកបដោយផាសុខភាព។ តំបន់ជនបទនឹងគ្របដណ្តប់ទៅដោយ ភូមិឃុំមានបរិស្ថានរស់នៅស្អាត​បាត​ទទួលបានសេវាចាំបាច់ជាច្រើន ដែលជាផ្នែកមួយជួយជំរុញ ឲ្យមានរបៀបរស់នៅបែបទំនើប។

ទី៤-សកម្មភាពសេដ្ឋកិច្ចជនបទ  ក្នុងន័យបង្កើតការងារ មុខរបរ សហគ្រិនភាព និងសកម្មភាពសេដ្ឋកិច្ច​ឲ្យមាន​រូប​ភាព​ចម្រុះដោយគិតតាំងពីរបរកសិកម្ម និងមិនមែនកសិកម្មនៅ តាមសហគមន៍ជនបទ​ ដើម្បីចូលរួម​ដោះ​ស្រាយបញ្ហាជីវភាពរស់នៅប្រចាំថ្ងៃ បង្កើនប្រាក់ចំណូល គ្រួសារនីមួយៗនៅជនបទ។   

ក្នុងជំហានបន្ទាប់ ដើម្បីឲ្យស្របតាមយុទ្ធសាស្ត្រនៃការកែទម្រង់ប្រព័ន្ធថវិកានោះ ក្រសួងបានរៀបចំធ្វើផែន​ការ​​​យុទ្ធសាស្ត្រថវិកា ​រយៈពេលបីឆ្នាំរំកិល ដោយផ្អែកលើរចនាសម្ព័ន្ធ កម្មវិធីទាំង៤ខាងលើ សំដៅធានាការ​ផ្សារ​​ភ្ជាប់​ថវិការបស់ក្រសួង ទៅនឹងអាទិភាពនៃគោលនយោបាយ របស់រាជរដ្ឋាភិបាល រួចហើយកំណត់កញ្ចប់​ថវិកាប្រចាំឆ្នាំ២០១៩ ដែលក្រសួងអភិវឌ្ឍន៍ជនបទ យកមកអនុវត្តន៍តាមការវិភាគជាក់ស្តែង សម្រាប់​ចង្កោម​​​សកម្មភាពនីមួយៗនៃអនុកម្មវិធីទាំង២១ របស់កម្មវិធីអាទិភាពទាំង៤ ដោយទទួលបាននូវលទ្ធផលធំៗ​សំខាន់ៗគួរឲ្យកត់សម្គាល់ដូចតទៅ ៖

ផ្លូវជនបទជាច្រើនខ្សែនៅរាជធានី និងគ្រប់ខេត្តត្រូវបានលើកកម្រិតធ្វើឲ្យប្រែក្លាយ ពីផ្លូវដីសនិងផ្លូវក្រាល​ក្រួស​ក្រហម ឬក្រាលខ្សាច់ភ្នំ ទៅជារូបភាពថ្មីដូចក្តីសង្ឃឹមនោះគឺផ្លូវក្រាលកៅស៊ូ ឬក្រាលបេតុង ហើយឥឡូវ​​នេះ ផ្លូវដែលមានឈ្មោះថា “វិថីតេជោសែនតស៊ូ” តភ្ជាប់ពីក្បាលស្ពានគីស៊ូណា ឃុំទន្លេបិទ​ទៅដល់ក្បាល​ស្ពានស្ទឹងត្រង់​ឃុំជំនីក ប្រវែង៧៥គ.ម ក្នុងខេត្តត្បូងឃ្មុំ ជាផ្លូវបេតុង ហើយផ្លូវនៅលើកោះចំនួន៥ ក្នុងខេត្ត​កំពង់ចាម និងខេត្តត្បូងឃ្មុំ ក៏សុទ្ធតែជាផ្លូវបេតុងដែរ។ ស្ពានបេតុង និងលូប្រអប់ជាច្រើន​បានផុសឡើងព្រោង​ព្រាត​​ជំនួសស្ពានឈើ និងស្ពានបែលឡេ។

យោងតាមការអង្កេតសេដ្ឋកិច្ច សង្គមកិច្ចកម្ពុជា ការផ្តគ់ផ្គង់ទឹកស្អាតបានកើនឡើង ដល់ប្រមាណជា ៥៨,​៧%​ នៅឆ្នាំ ២០១៧។ តាមការវាយតម្លៃ គិតដល់ដំណាច់ឆ្នាំ២០១៩នេះ ប្រជាជនជនបទប្រមាណ ៧០% ទទួលបានទឹកស្អាត។ អាត្រានៃការទទួលបានសេវាសំអាត និងអនាម័យ បានកើនឡើងគួរឲ្យកត់​​សម្គាល់ ពោលគឺកើនឡើងពី ២៩,២% នៅឆ្នាំ២០១០ ដល់ ៧១,២% នៅឆ្នាំ ២០១៧។ ដោយឡែក អត្រានៃ​ការ​បន្ទោរបង់ពាសវាលពាសកាលបានថយចុះ ជិត៤០% ដោយធ្លាក់ចុះពី ៦៥,៧% នៅឆ្នាំ២០១០ មកត្រឹម ២៥,៤% នៅឆ្នាំ២០១៧ ហើយនៅ ឆ្នាំ២០១៩នេះ ប្រជាជនជនបទ ៨០% មានបង្គន់អនាម័យប្រើប្រាស់។

ក្នុងចំណោមខេត្តគោលដៅទាំង៥ ខេត្តស្វាយរៀង លុបបំបាត់ការបន្ទោរបង់ពាសវាលពាសកាល បានស្រុក​ចំនួន​២ ខេត្តកំពង់ស្ពឺលុបបំបាត់បានស្រុកចំនួន១ ហើយខេត្តដ៏ទៃក៏កំពុងសម្រុកអនុវត្តន៍ ប្រកបដោយស្មារតី​សុទិដ្ឋិ​​និយមដែរ។ យ៉ាងហោចណាស់នៅឆ្នាំ២០២៣ ខេត្តស្វាយរៀង ខេត្តព្រៃវែង ខេត្តកែប ខេត្តកំពង់ស្ពឺ និង​​​ខេ​ត្តកំពង់ឆ្នាំង អាចនឹងក្លាយទៅជាខេត្ត ដែលគ្មានការបន្ទោរបង់ពាសវាលពាសកាល។

ក្រៅពីនេះ ការបង្កើតការងារ មុខរបរ សហគ្រិនភាព និងសកម្មភាពសេដ្ឋកិច្ច បានរួមចំណែកលើក​កម្ពស់​ជីវ​ភាព​​រស់នៅ កាត់បន្ថយភាពក្រីក្ររបស់ប្រជាជនដែលភាគច្រើនរស់នៅ ទីជនបទ តាមរយៈការធ្វើពិពិធកម្ម​​​​​​​​​​​​​​​​​​​​​​​​​​​​​​​​​​​​​​​​សកម្មភាពសេដ្ឋកិច្ចជនបទ និងតាមរយៈការបណ្តុះបណ្តាល ជំនាញវិជ្ជាជីវៈ ខាងកសិកម្ម សិប្បកម្ម សេវា​កម្ម​តូចតាច និងមុខរបរដទៃទៀត បង្កឲ្យគ្រួសារ នីមួយៗទទួលបាននូវប្រាក់ចំណូលបន្ថែម និងបង្កើតបាន​នូវ​​ភាពសុខដុមរម្យនាក្នុងសង្គមជនបទ កាត់បន្ថយការធ្វើចំណាកស្រុកទៅកាន់ទីក្រុង ឬឆ្លងដែនដោយ​ប្រថុយ​ប្រថានទៅប្រទេសដ៏ទៃ។

ជាទិសដៅ នៅឆ្នាំ២០២០នេះ ក្រសួងអភិវឌ្ឍន៍ជនបទបែរឆ្ពោះទៅរកភាពចាំបាច់ ក្នុង​ការ​បន្ត លើកកម្ពស់​គុណភាព​និងការថែទាំហេដ្ឋារចនាសម្ព័ន្ធជនបទ ការទទួលបានទឹក​ស្អាត​ប្រកប​ដោយ សុវត្ថិភាព​​និងការ​លើក​កម្ពស់ការសម្អាត និងអនាម័យជនបទ ការរៀបចំភូមិ និង​លំនៅឋាន​ឲ្យ​បាន​ស្អាតបាត ដើម្បីឆ្លើយតប​នឹង​ទស្សនវិស័យឆ្នាំ២០២៥ ដែលប្រជាជនជនបទគ្រប់រូបត្រូវទទួល បានសេវាផ្គត់ផ្គង់ទឹកស្អាត​និងអនាម័យគ្រ​ប់​​​គ្រាន់ និងរស់នៅក្នុងបរិស្ថានមា​នអ​នាម័យ​ប្រកបដោយនិរន្តរភាព សម្រាប់ជាបុរេលក្ខខណ្ឌ​នៃកាត់បន្ថយ​​​​​​​​​​បញ្ហាកង្វះអាហារូបត្ថម្ភគ្រប់​ទម្រង់​ព្រម​ទាំង ការលើកកម្ពស់ជីវភាពប្រជាជន តាមរយៈការអនុវត្តចលនាភូមិថ្មី និងការបង្កើន​ការ​ងារ​មុខ​របរ សហគ្រិនភាព និងការធ្វើពិពិធកម្មសកម្មភាពសេដ្ឋកិច្ចជនបទ សំដៅរួមចំណែក​ដល់​ការ​អភិវឌ្ឍសេដ្ឋកិច្ចជាតិនិងកាត់បន្ថយភាពក្រីក្ររបស់ប្រជាជនទូទាំងប្រទេស៕