ឯកអគ្គរដ្ឋទូតសហរដ្ឋអាមេរិកថ្មី ប្រចាំកម្ពុជា ថា ចង់ឲ្យក្រសួងអភិវឌ្ឍន៍ជនបទ ​​​ចាត់ទុកសហរដ្ឋអាមេរិកជា​ដៃគូរដ៏ល្អ ​ដែល​អាច​​ជឿជាក់​ក្នុងការអភិវឌ្ឍ

ភ្នំពេញៈ


ដោយ៖ សេង ស៊ីដារ៉ូ

លោក អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ ជួបពិភាក្សាការងារជាមួយ ឯកឧត្ដម  Patrick Murphy ឯកអគ្គរដ្ឋទូតថ្មីសហរដ្ឋអាមេរិក ប្រចាំនៅព្រះរាជាណាចក្រកម្ពុជា​ ចំពោះ​ការថែរក្សាសុខសន្តិ​ភាព​របស់​ប្រជា​ពលរដ្ឋ និងប្រទេសកម្ពុជា។

ឯកអគ្គរដ្ឋទូតថ្មីសហរដ្ឋអាមេរិក ចង់ឲ្យក្រសួងអភិវឌ្ឍន៍ជនបទ ​​​ចាត់ទុកសហរដ្ឋអាមេរិកជា​ដៃគូរដ៏ល្អ ​ដែល​អាច​​ជឿជាក់​ក្នុងការអភិវឌ្ឍសម្រាប់ប្រទេសកម្ពុជា ហើយកាលើកឡើងនេះ គឺកាលពីថ្ងៃទី២៣ ខែមករា ឆ្នាំ២០​២០។

លោក Patrick Murphy​​ បានវាយតម្លៃខ្ពស់ចំពោះតួនាទី និងភារកិច្ចរបស់ក្រសួងអភិវឌ្ឍន៍ជនបទ ព្រោះថា​ប្រជាពលរដ្ឋកម្ពុជាប្រមាណ ៨០% កំពុងរស់នៅទីជនបទ។ ហើយក្រសួងក៏មានបញ្ហាប្រឈមខ្លះ ដូចជា​បញ្ហា​​បម្រែបម្រួល​អាកាសធាតុ  ការចំណាកស្រុក  ការផ្គត់ផ្គង់ទឹក បញ្ហាពុករលួយ  ការបោះឆ្នោតជាដើម។

លោក អ៊ុក រ៉ាប៊ុនរដ្ឋមន្រ្ដីក្រសួងអភិវឌ្ឍន៍ជនបទ បានសម្ដែងនូវការស្វាគមន៍ចំពោះឯកឧត្ដម  Patrick Murphy ដែលត្រូវបានរដ្ឋាភិបាលសហរដ្ឋអាមេរិក តែងតាំងជាឯកអគ្គរដ្ឋទូតថ្មី ​ប្រចាំនៅព្រះរាជាណាចក្រ​កម្ពុជា​  និងបានជម្រាបជូន ឯកអគ្គរដ្ឋទូតអំពីតួនាទី និងភារកិច្ចរបស់ក្រសួងអភិវឌ្ឍន៍ជនបទ គឺបានលើក​កម្ពស់​ជីវភាពរស់នៅរបស់ប្រជាពលរដ្ឋ រួមទាំងបងប្អូនជនជាតិដើមភាគតិច ដែលកំពុងរស់នៅតំបន់ជនបទ ឲ្យកាន់តែល្អប្រសើរឡើង ដោយផ្ដោតទៅលើការស្ដារ និងកសាងហេដ្ឋារចនាសម្ព័ន្ធ រូបវ័ន្ដ រួមមាន ផ្លូវ ស្ពាន សាលារៀន មណ្ឌលសុខភាព និងផ្ដល់សេវាសាធារណៈផ្សេងៗទៀត ដែលជាការបំពេញបន្ថែម ទៅលើមុខ​ងាររបស់​ក្រសួង ស្ថាប័នផ្សេងៗរបស់រាជរដ្ឋាភិបាល។ លោករដ្ឋមន្រ្ដី ក៏បានលើកយកមុខងារ និងភាពខុសគ្នា​រវាង​ក្រសួងសាធារណៈការ និងដឹកជញ្ជូន និងក្រសួងអភិវឌ្ឍន៍ជនបទ ក្នុនោះក្រសួងសាធារណៈការ​ធ្វើការ​គ្រប់គ្រងផ្លូវជាតិ និងផ្លូវខេត្ត ដោយឡែកក្រសួងអភិវឌ្ឍន៍ជនបទ បានធ្វើការគ្រប់គ្រងបណ្ដាញផ្លូវ នៅជន​បទ​ប្រមាណជាង ៤ម៉ឺនគីឡូម៉ែត្រ  ដូចគ្នានឹងការអនុវត្តគម្រោងផ្គត់ផ្គង់ទឹកស្អាត និងអនាម័យជនបទផងដែរ។​

ក្រសួងអភិវឌ្ឍន៍ជនបទ បានធ្វើការងារសង្គមកិច្ចផងដែរ ដូចជា ការបង្កើតមុខរបរជូនប្រជាពលរដ្ឋ​នៅជន​បទ​​ តាមរយៈការបណ្ដុះបណ្ដាលមុខជំនាញវិជ្ជាជីវៈបន្ថែម ក្រៅពីការបង្កបង្កើនផលស្រូវ ដែលការងារនេះ បានអនុវត្ត​នៅមជ្ឈមណ្ឌលអភិវឌ្ឍន៍ជនបទ នៅតាមបណ្ដាខេត្ត។
          
លោករដ្ឋមន្រ្ដី បានជម្រាបជូនឯកអគ្គរដ្ឋទូត អំពីផែនការយុទ្ធសាស្រ្ដអភិវឌ្ឍន៍ជនបទ ឆ្នាំ២០១៩-២០២៣ ដោយផ្ដោតទៅលើការពង្រឹងស្ថាប័ន និងកសាងសមត្ថភាពមន្រ្ដីរាជការ ,​ កែលម្អលក្ខខណ្ឌ​នៃការរស់​នៅរបស់​សហគមន៍ជនបទ, ជំរុញសកម្មភាពសេដ្ឋកិច្ចជនបទ និងអភិវឌ្ឍន៍ហេដ្ឋារចនាសម្ព័ន្ធគមនាគមន៍ ដោយធ្វើ​ការ​​កែ​លម្អផ្លូវនៅជនបទជាបណ្ដើរៗ ពីផ្លូវក្រាលក្រួសក្រហម ឲ្យទៅជាផ្លូវក្រាលកៅស៊ូពីរជាន់ប្រភេទ DBST និងផ្លូវបេតុង ចំពោះតំបន់ដែលងាយរងគ្រោះ។​

ក្រសួងអភិវឌ្ឍន៍ជនបទ បាននឹងកំពុងបន្តសហប្រតិបត្តិការជាមួយដៃគូរផ្សេងៗទៀត រួមមាន ធនាគារអភិ​វឌ្ឍន៍​អាស៊ី ADB ធនាគារពិភពលោក WB មូលនិធិអន្ដរជាតិសម្រាប់អភិវឌ្ឍន៍កសិកម្ម IFAD និងអង្គការ​មិនមែនរដ្ឋាភិបាលចំនួន ៥៣ អង្គការទៀត។ ក្រសួងបានទទួលការគាំទ្រពីភាគីចំនួន ៣ គឺ មូលនិធិគ្រួសារ​ស្តូន, អង្គការ IDE និង USID កំពុងអនុវត្តន៍គម្រោងលើកកម្ពស់អនាម័យជនបទ នៅក្នុងភូមិគោលដៅ ១ ៦០០ភូមិ ក្នុងខេត្តព្រៃវែង,សៀមរាប,កំពង់ធំ,កណ្ដាល និងខេត្តឧត្ដរមានជ័យ ក្នុងនោះ USID នឹងផ្ដល់ថវិកា ១០លានដុល្លារអាមេរិក ក្នុងគម្រោងដែលអនុវត្តន៍ដោយ មូលនិធិគ្រួសារស្តូន, អង្គការ IDE​ ទទួលបានជោគ​ជ័យ។

ឯកឧត្ដមឯកអគ្គរដ្ឋទូតថ្មី ប្រចាំនៅកម្ពុជា បានបន្តថា សហរដ្ឋអាមេរិកគាំទ្រ​ចំពោះការថែរក្សាសុខសន្តិភាព​របស់​​ប្រជាពលរដ្ឋ និងប្រទេសកម្ពុជា​ ហើយចង់ឲ្យក្រសួងអភិវឌ្ឍន៍ជនបទចាត់ទុក​សហរដ្ឋអាមេរិកជា​ដៃគូរ​ដែល​អាចជឿជាក់ក្នុងការអភិវឌ្ឍន៍ប្រទេសកម្ពុជា។

លោករដ្ឋមន្រ្ដី​ បានថ្លែងអំណរគុណដល់រដ្ឋាភិបាលអាមេរិក និងបានជូនពរ លោក Patrick Murphy ទទួល​បាន​ជោគជ័យ​ក្នុងបេសកកម្មការទូត​ប្រចាំ នៅព្រះរាជាណាចក្រកម្ពុជា៕​​