ប្រជាកសិករក្នុងឃុំស្រង់ សូមឲ្យរាជរដ្ឋាភិបាល ជួយបង្កើតច្បាប់ ដើម្បីរក្សាតម្លៃទំនិញនៅក្នុងទីផ្សារ

 ខេត្តកំពង់ស្ពឺៈ

ដោយ៖ សេង​ ស៊ីដារ៉ូ

 

ប្រជាកសិករ រស់នៅក្នុងឃុំស្រង់ ស្រុកគងពិសី ខេត្តកំពង់ស្ពឺ បានដាំដំណាំប៉េងប៉ោះជារៀងរាល់ឆ្នាំ ហើយ​ពួក​គាត់ តែងតែមានការបញ្ហាប្រឈម ទៅនឹងតម្លៃនៃការលក់ចេញថោកខ្លាំងពេក ពីព្រោះហាងឆេង​នៅតែ​លើ​​ទីផ្សារ​មាត់ឈ្មួញតែប៉ុណ្ណោះ។

 ​

លោក សាំង ទី ជាអ្នកដាំប៉េងប៉ោះ ក្នុងឃុំស្រង់ ស្រុកគងពិសី ខេត្តកំពង់ស្ពឺ បានឲ្យដឹងថា គាត់ដាំបន្លែ​ប៉េង​ប៉ោះនេះលើផ្ទៃដី ៤០អា ទទួលបានទិន្នផលប្រមាណ ៨តោន ជារៀងរាល់ឆ្នាំ ហើយការដាំប៉េងប៉ោះនេះ មាន​ផល​លំបាកក្នុងការលក់ចេញ ព្រោះវាបានតម្លៃថោកពេក។ ដោយឆ្នាំខ្លះបានថ្លៃ រហូតដល់ ១គីឡូ ១០០០​រៀល តែឆ្នាំខ្លះទៀត ធ្លាក់ដល់បាតដាលក្នុង ១គីឡូបានថ្លៃតែ ៥០០រៀងប៉ុណ្ណោះ ដែលធ្វើឲ្យខាតបង់ទន់ ពេល​វេលា ថែមទាំងចំណាយកម្លាំងអត់ប្រយោជន៍។

លោក សាំង ទី បានបន្តទៀតថា បន្លែប៉េងប៉ោះនេះ គាត់ដាំមិនប្រើជាតិគីមីនោះទេ គឺដាំទៅតាមធម្មជាតិ សុទ្ធសាធ អាស្រ័យហេតុនេះ សូមឲ្យបងប្អូនជួយលើស្ទួយ និងឲ្យតម្លៃទៅលើកសិកម្មរបស់ខ្មែរយើងផង​ គ្មាន​អ្វី​ល្អជាងជាតិយើងទេ។ បន្លែប៉េងប៉ោះ ដែលដាំតាមបែបធម្មជាតិនេះ មានរសជាតិ មានវិតាមីនល្អ គួរណាតែ​ប្រជាពល​រដ្ឋក្នុងស្រុង ងាកមកគាំទ្រទទួលទានបន្លែធម្មជាតិរបស់ខ្មែរយើង ដែលដាំដោយផ្ទាល់ដៃ។

ចុងក្រោយនេះ​ ប្រជាកសិករក្នុងឃុំស្រង់ សូមឲ្យរាជរដ្ឋាភិបាល ជួយបង្កើតច្បាប់ ដើម្បីរក្សាតម្លៃទំនិញនៅក្នុង ទីផ្សារ ឲ្យបានថេរ កុំឲ្យមានឈ្មួញខិលខូចមួយចំនួន ចេះតែបំប៉ោងតម្លៃស្រេចតែចិត្ត  ធ្វើឲ្យមានផលលំ​បាក​ដល់អ្នកដំដុះ និងបាត់បង់ចំណូល អាចប៉ះពាល់ដល់ជីវភាពប្រចាំថ្ងៃពួកគាត់៕