លោក ឡុង ឈុនឡៃ បានប្រកាសតែងតាំងជាប្រធានក្រុមប្រឹក្សាខេត្តកំពង់ឆ្នាំង អាណត្តិទី៣

​ខេត្តកំពង់ឆ្នាំៈ

ដោយ៖ ឌឹម​ គឹមហាក់

 

នៅសាលាខេត្តកំពង់ឆ្នាំង បានរៀបចំពិធីប្រកាសចូលកាន់តំណែងក្រុមប្រឹក្សាខេត្តកំពង់ឆ្នាំង អាណត្តិទី៣ ក្រោម​​អធិបតីភាពលោក អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ​ និងជាប្រធានក្រុមការងារថ្នាក់ជាតិ​ចុះមូលដ្ឋានដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្រ្ដចតុកោណដំណាក់​កាល​​ទី៤ របស់រាជរដ្ឋាភិបាលប្រចាំខេត្តកំពង់ឆ្នាំង កាលពីថ្ងៃទី១៣ ខែមិថុនា ឆ្នាំ២០១៩។

លោក បួន ហេង  ប្រធាននាយកដ្ឋានមុខងារ និងប្រធាននៃអគ្គនាយកដ្ឋានមុខងាររដ្ឋបាល​ក្រសួងមហា​ផ្ទៃ បានអានព្រះរាជក្រឹត្យលេខ នស/រកត/០១៦១៩/៧៤៧ ចុះថ្ងៃទី៨ ខែមិថុនា ឆ្នាំ២០១៩ ត្រូវបាន​ត្រាស់បង្គាប់តែងតាំង លោក ឡុង ឈុនឡៃ ជាប្រធានក្រុមប្រឹក្សាខេត្តកំពង់ឆ្នាំង អាណត្តិទី៣ និង​សមាជិក​ចំនួន២២នាក់ ក្នុនោះស្រ្ដីចំនួន ៣រូប។

​

លោក ឡុង ឈុនឡៃ ប្រធានក្រុមប្រឹក្សាខេត្ត​ ទើបតែងតាំងថ្មី​បានឡើងធ្វើការប្តេជ្ញាចិត្តថា​ នឹងខិត​ខំប្រឹងប្រែងធ្វើការឲ្យអស់ពីកម្លាំងកាយចិត្ត ដើម្បីផលប្រយោជន៍ប្រជាជន នឹងប្តេជ្ញាគោរពច្បាប់ រដ្ឋធម្ម​នុញ្ញនៃព្រះរាជា​ណាចក្រកម្ពុជា និងប្តេជ្ញាចូលរួមថែរក្សាការពារអធិបតេយ្យភាព បូរណភាពទឹកដី នៃព្រះ​រាជាណាចក្រកម្ពុជា។ប្តេជ្ញា អនុវត្តឲ្យបានតាមច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ។ ប្តេជ្ញា បំពេញភារកិច្ចដោយអនុលោមតាមគោលការណ៍ លិខិតបទដ្ឋានពាក់ព័ន្ធរបស់ រាជរដ្ឋា​ភិបាលកម្ពុជា ឲ្យមានប្រសិទ្ធភាពខ្ពស់។ ប្តេជ្ញា ចូលរួមពង្រឹងសាមគ្គីភាព ឯកភាពផ្ទៃក្នុង​ឲ្យបានល្អ​ប្រសើរ។

លោក អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានសម្ដែងនូវការអបអរសាទរ ចំពោះ ឯកឧត្ដម លោកជំទាវ ដែលទទួលបានមុខដំណែងថ្មីនិងបាន វាយតម្លៃខ្ពស់ចំពោះសមាជិក សមាជិកា ក្រុមប្រឹ​ក្សាខេត្តកំពង់ឆ្នាំង ដែលត្រូវបានតំណាងប្រជាពលរដ្ឋ ដែលជាសមាជិកក្រុមប្រឹក្សាឃុំ-សង្កាត់ បោះឆ្នោត​ផ្តល់សេចក្តីទុកចិត្ត ដើម្បីបន្តដឹកនាំខេត្តកំពង់ឆ្នាំង ឲ្យកាន់តែរីកចម្រើនលើគ្រប់វិស័យថែមទៀត ដោយ​ត្រូវ​តែខិតខំបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋទាំងអស់ ដោយស្មើភាព យុត្តិធម៌​មិនរើសអើមពូជសាសន៍ និងប្រកាន់និន្នាការនយោបាយ។

​លោកបណ្ឌិត បានបន្តថាៈការពង្រឹងសាមគ្គីភាព ឯកភាពផ្ទៃក្នុង ឲ្យបានល្អនៅក្នុងក្រុមប្រឹក្សា

គណៈអភិបាល មន្រ្តីរាជការ និងកងកម្លាំងមានសមត្ថកិច្ច គ្រប់លំដាប់ថ្នាក់ ដោយឈរលើមូលដ្ឋានលើក​កម្ពស់​​ប្រសិទ្ធភាពការងារ ការគោរពច្បាប់ គោលការណ៍នានា របស់រដ្ឋ និងពង្រឹងរបៀបរបបធ្វើការ​ដើម្បីលើកកម្ពស់ការទទួលខុសត្រូវ និងនៅក្នុងការបំពេញតួនាទី ភារកិច្ចរបស់ខ្លួន៕