រដ្ឋមន្រ្ដីក្រសួងអភិវឌ្ឍន៍ជនបទ បើកសិក្ខាសាលាបញ្ចប់គម្រោងផ្គត់ផ្គង់ទឹកស្អាត និងអនាម័យជន បទ ជំហានទី ២ ​

​ភ្នំពេញៈ


ដោយ៖ ឌឹម គឹមហាក់

រដ្ឋមន្រ្ដីក្រសួងអភិវឌ្ឍន៍ជនបទ ​បានអញ្ជើញជាអធិបតីភាព បើកសិក្ខាសាលាបញ្ចប់គម្រោងស្ដីពី​ការ​អភិវឌ្ឍសមត្ថភាពដើម្បីគាំទ្រ ដល់គំនិតផ្ដួចផ្ដើមថ្មី សម្រាប់អនុវត្តគម្រោងផ្គត់ផ្គង់ទឹកស្អាត និងអនាម័យ​ជនបទ ជំហានទី២ ក្រោមហិរញ្ញប្បទានបន្ថែម ពីធនាគាអភិវឌ្ឍន៍អាស៊ីនៅថ្ងៃទី១២ ខែមិថុនា ឆ្នាំ២០១៩​ ​នៅសណ្ឋាគារភ្នំពេញ រាជធានីភ្នំពេញ ។

សិក្ខាសាលាថ្ងៃនេះ នឹងពិភាក្សាលើបញ្ហាពាក់ព័ន្ធនឹងឧបសគ្គ ដែលបានជួបកន្លងមក និងពិភាក្សា​លើគំ​និតផ្ដួចផ្ដើមរបស់ក្រុមទីប្រឹក្សាបច្ចេកទេស ដើម្បីត្រៀមរៀបចំឯកសារគតិយុត្តិ សម្រាប់អនុវត្តគម្រោង​ផ្គត់ផ្គង់ទឹកស្អាត និងអនាម័យជនបទ ជំហានទី២ ដែលមានរយៈពេល ២៣ខែ ចាប់ពីខែកញ្ញា ឆ្នាំ​២០១៩ តទៅ។ ហើយ​គម្រោងនេះ ក៏បានរៀបចំផែនការ និងកម្មវិធីអប់រំដល់សិស្ស​តាមសាលារៀន​អំពី​សុវត្តិ​​​ភាពទឹក និងអនាម័យជនបទ និងការបន្សាំទៅនឹងការបម្រែបម្រួលអាកាសធាតុ ព្រមទាំងការគ្រប់​គ្រងហានិភ័យនៃគ្រោះមហន្ដរាយផងដែរ។

​លោក ស្រ៊ិន ពុទ្ធី ប្រធាននាយកដ្ឋានផ្គត់ផ្គង់ទឹកជនបទ នៃក្រសួងអភិវឌ្ឍន៍ជនបទ និងជានាយកគ​ម្រោង បានបញ្ជាក់ថា ដោយការអនុវត្តទទួលបានជោគជ័យ ដំណាក់កាលទី១ និងទី២ រួចមក ធនាគារ​អភិ​​វឌ្ឍន៍អាស៊ី បានឯកភាពផ្ដល់ថវិកាដល់រាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទ ដើម្បីបន្តការអនុវត្តគម្រោងផ្គត់ផ្គង់ទឹកស្អាត និងអនាម័យជនបទ ជំហានទី៣ ដោយផ្ដោតទៅ​លើខេត្ត​គោល​​ដៅចំនួន ៨ គឺ ខេត្តកំពង់ឆ្នាំង ពោធិសាត់ បាត់ដំបង សៀមរាប កំពង់ធំ បន្ទាយមានជ័យ កំពង់ស្ពឺ និងខេត្តកំពត ហើយក្រសួងកំពុងស្នើសុំបន្ថែមខេត្តចំនួន ២ទៀត គឺខេត្តព្រះវិហារ និងខេត្តឧត្ដរមាន​ជ័យ។
​
ឯកឧត្ដម អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានបញ្ជាក់ថា ​រាជរដ្ឋាភិបាលកម្ពុជា បានអនុ​​​ម័ត​ផែនការយុទ្ធសាស្រ្ដជាតិសម្រាប់វិស័យផ្គត់ផ្គង់ទឹកស្អាត និងអនាម័យជនបទ សម្រាប់ឆ្នាំ២០១៤-២០២៥​​ ដោយបានកំណត់ថា ការផ្គត់ផ្គង់ទឹកស្អាត សម្រាប់តំបន់ជនបទត្រូវគ្របដណ្ដប់ ឲ្យបាន ១០០% នៅឆ្នាំ២០២៥ និងបានកំណត់ចក្ខុវិស័យ ថា មនុស្សគ្រប់រូបនៅក្នុងសហគមន៍ជនបទ ត្រូវទទួលបានសេវាផ្គត់ផ្គង់ទឹកស្អាត និងអនាម័យប្រកបដោយនិរន្ដរភាព និងរស់នៅក្នុងបរិស្ថាន​ស្អាត​នៅឆ្នាំ ២០២៥។          

ឯកឧត្ដម បានបន្តថា តាមរយៈនៃកិច្ចសហប្រតិបត្តិការជាមួយដៃគូរនានា នៅឆ្នាំ២០១៨ ក្រសួង​អភិ​វឌ្ឍន៍ជនបទ បានផ្ដល់សេវាផ្គត់ផ្គង់ទឹកស្អាត និងប្រតិបត្តិអនាម័យជនបទបាន ៦០% និងឈានទៅ​សម្រេច​គោលដៅរបស់រាជរដ្ឋាភិបាល គឺនៅឆ្នាំ២០២៥។ ឯកឧត្ដមរដ្ឋមន្រ្ដី បានបញ្ជាក់ថា មូលនិធិ​ជប៉ុន​សម្រាប់កាត់បន្ថយភាពក្រីក្រមាន ១,៩៦ លានដុល្លារអាមេរិក ត្រូវបានផ្ដល់ជាជំនួយឥតសំណង​តាមរយៈធនាគារអភិវឌ្ឍន៍អាស៊ី ដើម្បីផ្ដល់ជាជំនួយបច្ចេកទេស សម្រាប់ការអភិវឌ្ឍសមត្ថភាពមន្រ្ដី អនុវត្តគម្រោងក្នុងខេត្តគោលដៅ។
​

ឯកឧត្ដម ក៏ថ្លែងអំណរគុណដល់រដ្ឋាភិបាលជប៉ុន និងធនាគារអភិវឌ្ឍន៍អាស៊ី ព្រមទាំងបានសុំឲ្យ​មន្រ្ដី​ពាក់​ព័ន្ធ និងការអនុវត្តគម្រោងទាំងអស់ ដើម្បីពិភាក្សាឲ្យបានផុលផុសពីតម្រូវការបច្ចេកទេស និងការសន្សាំ​នៃបម្រែបម្រួលអាកាសធាតុ ការគ្រប់គ្រងហានិភ័យនៃគ្រោះមហន្ដរាយ និងការរៀបចំផែនការ​ក្នុងវិស័យ​ទឹក​ស្អាត និងអនាម័យជនបទ សម្រាប់គម្រោងផ្គត់ផ្គង់ទឹកស្អាត និងអនាម័យជនបទ ជំហានទី៣ នៅ​កម្ពុជា ៕