រដ្ឋមន្រ្ដីក្រសួងអភិវឌ្ឍន៍ជនបទ ប្រជុំប្រកាសសមាសភាពក្រុមការងារថ្នាក់ជាតិ ចុះមូលដ្ឋាន ខេត្តកំពង់ ឆ្នាំង

ខេត្តកំពង់ឆ្នាំងៈ



ដោយ៖ ឌឹម គឹមហាក់

រដ្ឋមន្រ្ដីក្រសួងអភិវឌ្ឍន៍ជនបទ និងជាប្រធានក្រុមការងារថ្នាក់ជាតិ ចុះមូលដ្ឋានជួយខេត្តកំពង់ឆ្នាំង បាន​អញ្ជើញជាអធិបតីក្នុងពិធី ប្រកាសផ្សព្វផ្សាយសមាសភាពក្រុមការងារថ្នាក់ជាតិ ចុះមូលដ្ឋាន ដើម្បីត្រួត​ពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្រ្ដចតុកោណ ដំណាក់កាលទី៤ របស់រាជរដ្ឋា​ភិបាល នៅខេត្តកំពង់ឆ្នាំង កាលពីថ្ងៃទី​០៩ ខែឧសភា​ ឆ្នាំ២០១៩។


បន្ទាប់ពីអានរបាយការណ៍របស់ លោក ឈួរ ច័ន្ទឌឿន អភិបាលនៃគណៈអភិបាលខេត្តកំពង់ឆ្នាំង រួចមក លោក រាជ សុភទ្ទ អនុប្រធានលេខាធិការដ្ឋាន ក្រុមការងារថ្នាក់ជាតិចុះមូលដ្ឋានរាជធានី ខេត្ត បានអាន​សេចក្ដីសម្រេចរបស់រាជរដ្ឋាភិបាល ក្នុងនោះមានលោក អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ ជាប្រធាន​ក្រុមការងារថ្នាក់ជាតិ ចុះមូលដ្ឋាន ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្រ្ដចតុកោណដំណាក់កាលទី៤ របស់រាជរដ្ឋាភិបាល នៅខេត្តកំពង់ឆ្នាំង។


លោក ត្រាំ អីតឹក រដ្ឋមន្រ្ដីក្រសួងប្រៃសណីយ៍ និងទូរគមនាគមន៍ ជាអនុប្រធាន និងលោក ឈួរ ច័ន្ទ ឌឿន អភិបាលនៃគណៈអភិបាលខេត្តកំពង់ឆ្នាំង ជាអនុប្រធានអចិន្រ្ដៃ  ព្រមទាំងសមាជិក សមាជិកា ៨១ រូប​ទៀត​មកពីក្រសួងស្ថាប័នផ្សេងៗ របស់រាជរដ្ឋាភិបាល។



ក្នុងឱកាសនោះដែរ ក៏មានការអាននូវសេចក្ដីណែនាំស្ដីពី តួនាទី ភារកិច្ច និងរបៀបរបបបការ​ងារសម្រាប់​ក្រុមការងារថ្នាក់ជាតិ ចុះមូលដ្ឋានរាជធានី ខេត្ត ក្នុងការចុះបំពេញបេសកកម្ម ដោយ លោក ងី ច័ន្ទ្រផល រដ្ឋលេខាធិការក្រសួងមហាផ្ទៃផងដែរ។


លោក អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ បានសម្ដែងការអបអរសាទរចំពោះសេចក្ដីសម្រេចនេះ  និងថ្លែងអំណរគុណចំពោះសម្ដេចអគ្គមហាសរនាបតីតេជោ ហ៊ុន សែន នាយករដ្ឋមន្រ្ដីនៃកម្ពុជា ដែល​បាន​​សម្រេចឲ្យរូបលោក បានធ្វើជាប្រធានក្រុមការងារថ្នាក់ជាតិ ចុះមូលដ្ឋាន ជួយខេត្តកំពង់ឆ្នាំង ព្រម​ទាំង​​សមាជិ សមាជិកា ដែលត្រូវបានប្រកាសនាពេលនេះ។

តាមរយៈនៃសេចក្ដីសម្រេចនេះ ក្រុមការងារថ្នាក់ជាតិ ចុះមូលដ្ឋានតាមបណ្ដាស្រុក ឃុំ និងភូមិ​នឹងអាចចុះ​បេសកកម្មឆ្ពោះទៅមូលដ្ឋានរបស់ខ្លួន រៀបចំធ្វើវេទិកាសាធារណៈ ជាមួយប្រជាពលរដ្ឋ ដើម្បីបានដឹងពី​ការ​​លំបាក និងកង្វល់របស់គាត់ នឹងយកមកពិចារណាធ្វើការដោះស្រាយជូនបានទាន់ពេលវេលា ។                                                                    
     

លោករដ្ឋមន្ត្រី បានណែនាំដល់ក្រុមការគ្រប់លំដាប់ថ្នាក់ទាំងអស់ រាល់ការធ្វើវេទិកាសាធារណៈគ្រប់ឃុំ សង្កាត់ ភូមិ ត្រូវពន្យល់ប្រជាពលរដ្ឋ​ អំពីគោលនយោបាយរបស់រាជរដ្ឋាភិបាល​ស្របច្បាប់​ ដែលកើតចេញ​ពីការបោះឆ្នោតដោយសេរី ត្រឹមត្រូវ និងយុត្តិធម៌ស្របតាមគោលការណ៍នៃលទ្ធិប្រជាធិបតេយ្យ សេរីពហុ​បក្ស៕