រដ្ឋមន្រ្ដីក្រសួងអភិវឌ្ឍន៍ជនបទ​ ជួបឯកអគ្គរដ្ឋទូត សឹង្ហបូរី ប្រចាំនៅកម្ពុជា ដើម្បីពិភាក្សា​បច្ចេក​ទេសថ្មី​ក្នុងការថែទាំជួសជុល និងកសាងផ្លូវ

ភ្នំពេញៈ

ដោយ៖ ហុង ចំណាប់

រដ្ឋមន្រ្ដីក្រសួងអភិវឌ្ឍន៍ជនបទ​ បានអនុញ្ញាតឲ្យលោក Michael Tan Keng Siong ឯកអគ្គរដ្ឋទូត​នៃ​សាធារណរដ្ឋសឹង្ហបូរី ប្រចាំព្រះរាជាណាចក្រកម្ពុជា និងសហការីចូលជួបសម្ដែងការគួរសម និងពិភាក្សា​ការងារ។

ក្នុងជំនួបនេះ ឯកឧត្តម Michael Tan Keng Siong បានលើកឡើងពីចំណងមិត្តភាព ​រវាងប្រជាជន នៃប្រទេសទាំងពីរ និងបានជម្រាបជូនអំពីគោលបំណង គឺដើម្បីចែករំលែក និងធ្វើការផ្លាស់ប្ដូរនូវ បទ​ពិសោធន៍ នៃការអភិវឌ្ឍហេដ្ឋារចនាសម្ព័ន្ធជនបទ រវាងប្រទេសទាំងពីរ កម្ពុជា សឹង្ហបូរី ក្នុងនោះ​សហការី​របស់លោក ក៏បានធ្វើបទបង្ហាញអំពីបច្ចេកវិជ្ជាថ្មី ក្នុងការថែទាំជួសជុល និងកសាងផ្លូវជនបទ ដោយជ្រើសរើសយកការស្ថាប នាកម្រាលផ្លូវ ដែលមានភាពធនទៅនឹងបម្រែបម្រួលអាកាសធាតុ ដែល ធ្លាប់​ប្រើប្រាស់នៅប្រទេស សឹង្ហបូរី មកប្រើប្រាស់នៅកម្ពុជា។

លោក អ៊ុក រ៉ាប៊ុន រដ្ឋមន្រ្តី នៃក្រសួងអភិវឌ្ឍន៍ជនបទ បានសម្ដែងនូវការស្វាគមន៍យ៉ាងកក់ក្ដៅ​ និងអប​អរ​សាទរចំពោះទំនាក់ទំនងការទូត រវាងប្រទេសទាំងពីរ កាន់តែមានភាពស្និទ្ធស្នាល និងបន្តកិច្ចសហ​ប្រតិបត្តិការកាន់តែរឹងមាំថែមទៀត។ លោករដ្ឋមន្ត្រី បានជម្រាបជូនភ្ញៀវអំពីតួនាទី និងភារកិច្ចសំខាន់ៗ​របស់ក្រសួងអភិវឌ្ឍន៍ជនបទ ក្នុងការរួមចំណែកអនុវត្តន៍ គោលនយោបាយ និងយុទ្ធសាស្រ្ដចតុកោណ​ដំណាក់កាលទី៤ របស់រាជរដ្ឋាភិបាល ដើម្បីបង្ខិតគម្លាតរវាងប្រជាពលរដ្ឋរស់នៅទីក្រុង ទីប្រជុំជន និងប្រជាពលរដ្ឋរស់នៅតាមតំបន់ជនបទ ឲ្យកាន់តែមានភាពងាយស្រួល ដោយផ្ដោតការយកចិត្តទុក ដាក់ទៅលើការស្ដារ និងកសាងហេដ្ឋារចនាសម្ព័ន្ធ រួមមានផ្លូវ ស្ពាន ដែលត្រូវបានកែលម្អ ជាបណ្ដើរៗ​ពីផ្លូវក្រាលក្រួសក្រហម នៅជនបទ ឲ្យទៅជាផ្លូវក្រាលកៅស៊ូពីរជាន់ប្រភេទ DBST និងផ្លូវបេតុង។

ដោយឡែកក្រសួងអភិវឌ្ឍន៍ជនបទ បានយកចិត្តទុកដាក់ទៅលើវិស័យផ្គត់ផ្គង់ទឹកស្អាត និងអនាម័យ ធ្វើ​យ៉ាងណាឲ្យប្រជាពលរដ្ឋ ក្នុងសហគមន៍ មានទឹកស្អាតប្រើប្រាស់ និងមានអនាម័យល្អ ដោយបន្ត អនុវត្តកម្មវិធីលើកកម្ពស់អនាម័យ តាមបណ្ដាខេត្តគោលដៅ ​បំបាត់ជាបណ្ដើរៗ ការបន្ទោរបង់ពាសវាល​ពាសកាលជាដើម។

ចំពោះបច្ចេកវិជ្ជាថ្មី នៃការជ្រើសរើសយកការស្ថាបនាកម្រាលផ្លូវ នៅប្រទេសសឹង្ហបូរី លោក​រដ្ឋមន្រ្ដី បាន​ថ្លែងថា ក្រសួងអភិវឌ្ឍន៍ជនបទនឹងធ្វើការពិភាក្សា និងពីចារណាលំអិតបន្ថែមទៀត ដោយផ្ដោត​ទៅលើ​គុណភាពជាចំបង ព្រមទាំបានថ្លែងអំណរគុណ ចំពោះឯកអគ្គរដ្ឋទូតសឹង្ហបូរី ដែលបាននឹងកំពុង បន្តកិច្ច​សហ​ប្រតិបត្តិការជាមួយរាជរដ្ឋាភិបាលកម្ពុជា (ក្នុងជំនួបពិភាក្សានេះ នៅថ្ងៃទី២១ ខែមីនា ឆ្នាំ២០១៩ នៅទីស្ដីការក្រសួង)៕