រដ្ឋមន្រ្តីក្រសួងអភិវឌ្ឍន៍ជនបទ ទទួលជួបឯកអគ្គរដ្ឋទូតអូស្រា្តលីប្រចាំកម្ពុជា ដើម្បីពិភាក្សាលើ​កិច្ច​សហប្រតិ​បត្តិការ លើគ្រប់វិស័យ

  ភ្នំពេញៈ

 ដោយ៖ ហុង ចំណាប់

លោក អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ  បានអនុញ្ញាតឲ្យលោក Pablo Kang ឯកអគ្គរដ្ឋទូត​អូស្រា្ត​លីប្រចាំកម្ពុជា ចូលជួបសម្តែងការគួរសម និងពិភាក្សាការងារ នៅទីស្តីការក្រសួង នៅព្រឹកថ្ងៃទី២៥ ខែសីហា ឆ្នាំ២០២០។

 លោករដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅចំពោះ លោកឯកអគ្គរដ្ឋទូតថ្មី ក្នុងការងារបំពេញបេស​កម្ម​​ការទូតនៅកម្ពុជា និងរីករាយសហការយ៉ាងពេញទំហឹង ក្នុងការចូលរួមចំណែករឹតបណ្តឹងទំនាក់ទំនង នៃ​ប្រទេសទាំងពីរ ឲ្យកាត់តែរីកចម្រើន និងស៊ីជម្រៅបន្ថែមទៀត។

 ខណៈនោះដែលលោករដ្ឋមន្ត្រី  អ៊ុក រ៉ាប៊ុន  បានថ្លែងនូវអំណរគុណ ដល់រដ្ឋាភិបាលអូស្ត្រាលី ដែលបានចូល​រួមនឹងផ្តល់ការគាំទ្រ ចំពោះការអភិវឌ្ឍន៍របស់រាជរដ្ឋាភិបាលកម្ពុជា។

កន្លងមក រដ្ឋាភិបាលអូស្ត្រាលី បានរួមចំណែកយ៉ាងសំខាន់ក្នុងការអភិវឌ្ឍន៍សេដ្ឋកិច្ច និងសង្គមកិច្ចនៅកម្ពុជា តាមរយៈជំនួយផ្លូវការជាច្រើន ទៅលើវិស័យផ្សេងៗ ដូចជា វិស័យពាណិជ្ជកម្ម កសិកម្ម អភិវឌ្ឍន៍ជនបទ ហេដ្ឋា​រចនាសម្ព័ន្ធ សុខាភិបាល ការផ្តល់ជំនួយលើវិស័យបោសសំអាតមីន​ ជាដើម។

 លោករដ្ឋមន្រ្ដី បានជម្រាបជូនអំពីផែនការយុទ្ធសាស្រ្ដអភិវឌ្ឍន៍ជនបទឆ្នាំ ២០១៩-២០២៣ ដោយផ្ដោតទៅ​លើ​ការ​​ពង្រឹងស្ថាប័ន និងកសាងសមត្ថភាពមន្រ្ដីរាជការ កែលម្អលក្ខខណ្ឌនៃការរស់នៅ​របស់សហគមន៍​ជន​បទ ជំរុញសកម្មភាពសេដ្ឋកិច្ចជនបទ និងអភិវឌ្ឍនហេដ្ឋារចនាសម្ព័ន្ធគមនាគមន៍ ដោយធ្វើការកែលម្អ​ផ្លូវ​នៅជនបទជាបណ្ដើរៗ ពីផ្លូវក្រាលក្រួសក្រហម ឲ្យទៅជាផ្លូវក្រាលកៅស៊ូពីរជាន់ប្រភេទ DBST និងផ្លូវបេតុង ចំពោះតំបន់ដែលងាយរងគ្រោះនោះ។

 លោកឯកឧត្ដមឯកអគ្គរដ្ឋទូត បានសម្តែងនូវក្តីរីករាយ ដែលបានមកបំពេញបេសកម្មការទូតនៅកម្ពុជា និង​បានថ្លែងការកោតសរសើរ ដល់កិច្ចសហប្រតិបត្តិការដ៍ល្អ រវាងប្រទេសទាំងពីរលើគ្រប់វិស័យ។ លោកឯក​អគ្គ​រដ្ឋទូតក៏បានលើកឡើង ពីការផ្តល់ជំនួយលើវិស័យបោសសំអាតមីន និងនៅតែបន្តរួមចំណែកធ្វើឲ្យកម្ពុជា សម្រេចនូវគោលដៅរបស់ខ្លួនក្លាយជាប្រទេសដែលគ្មានមីនត្រឹមឆ្នាំ ២០២៥។

 លោករដ្ឋមន្រ្ដី ក៏បានស្នើសុំរដ្ឋាភិបាលអូស្រ្តាលីបន្តជួយគាំទ្របន្តទៀត។ ចំណែកលោកឯក​ឧត្ដមឯកអគ្គរដ្ឋទូ​តអូស្រ្ដាលី បានឆ្លើយ​តបមកវិញ​ថា គាំទ្រដល់កិច្ចសហប្រតិបត្តិការដ៏ល្អរវាងប្រទេសទាំងពីរ លើគ្រប់វិស័យ៕