រដ្ឋមន្រ្ដីក្រសួងអភិវឌ្ឍន៍ជនបទ ជួបលោកស្រីនាយិកាកម្មវិធីស្បៀងអាហារពិភពលោក WFP ប្រចាំកម្ពុជា

ភ្នំពេញ

ដោយ៖​ ហុង ចំណាប់

 

លោក អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ បានជួបសម្ដែងការគួរសម ​និងពិភាក្សាការងារ​ជាមួយ​លោក​ស្រី Francesca Erdelmann នាយិកាកម្មវិធី​ស្បៀងអាហារពិភពលោក ប្រចាំនៅកម្ពុជា កាលពីថ្ងៃ​​ទី​១៥ ខែកក្កដា ឆ្នាំ២០២០ នៅទីស្ដីការក្រសួង។

កម្មវិធីស្បៀងអាហារពិភពលោក​(WFP)នេះ ​បានធ្វើកិច្ចសហប្រតិបត្តិការជាមួយ​ក្រសួងអភិវឌ្ឍន៍ជនបទ ជា​ច្រើន និងយូឆ្នាំមកហើយ តាមរយៈកម្មវិធីផ្ដល់ស្បៀងពលកម្មសម្រាប់សាងសង់ហេដ្ឋរចនាសម្ព័ន្ធជនបទ។

លោករដ្ឋមន្រ្ដី​ បានថ្លែងអំណរគុណ និងសម្ដែងការស្វាគមន៍ចំពោះលោកស្រី Francesca Erdelmann​ និង​សហ​ការី ដែលបានឆ្លៀតពេលក្នុងជំនួបនេះ ​ដើម្បីស្វែងរកការគាំទ្រពីគ្នាទៅវិញទៅមក ​រវាងក្រសួងអភិវឌ្ឍន៍​ជនបទ និងកម្មវិធីស្បៀងអាហារពិភពលោក។ ជាមួយនេះ ក៏បានជម្រាបជូនភ្ញៀវអំពីយុទ្ធសាស្រ្ដ ៤ សំខាន់ៗ​របស់ក្រសួងអភិវឌ្ឍន៍ជនបទ គឺ ទី១ ការពង្រឹងស្ថាប័ន អភិវឌ្ឍន៍សមត្ថភាព និងធនធានមនុស្ស។​ ទី២ អភិ​វឌ្ឍន៍ហេដ្ឋរចនាសម្ព័ន្ធរូបវ័ន្ដ និងគមនាគមន៍។​ ទី៣ លើកកម្ពស់លក្ខខណ្ឌនៃការរស់នៅរបស់សហគមន៍ជន​បទ និងទី៤ ធ្វើពិពិតកម្មសកម្មភាពសេដ្ឋកិច្ចជនបទ។ ជាមួយនេះ​ ក្រសួងកំពុងរៀបចំគោល​នយោបាយ​ជាតិ​​អភិវឌ្ឍន៍ជនបទឆ្នាំ២០២១-២០២៣ ដើម្បីលើកកម្ពស់គុណភាព និងគុណតម្លៃនៃជីវិតរស់នៅ របស់​ប្រជា​ពលរដ្ឋ នៅជនបទប្រកបដោយបរិយាប័ន្នទាំងផ្នែក សេដ្ឋកិច្ច សង្គម និងវប្បធម៌។​

លោករដ្ឋមន្ត្រី បានបន្តទៀតថា ការងារផ្គត់ផ្គង់ទឹកស្អាត និងការលើកកម្ពស់អនាម័យជនបទ ជាទិសដៅដ៏​សំ​ខាន់​ ដើម្បីលើកកម្ពស់សុខមាលភាពរបស់ប្រជាពលរដ្ឋ ហើយក្រសួងនឹងខិតខំជម្រុញ យ៉ាងហោចណាស់ ក៏ធ្វើឲ្យខេត្តចំនួន៣ ក្លាយជាខេត្តដែលបានបញ្ឈប់ការបន្ទោបង់ពាសវាលពាសកាល ក្នុងឆ្នាំ២០២៣ ។

ទាក់ទិនទៅនឹងជំងឺកូវីដ ១៩ លោករដ្ឋមន្រ្ដី បានបន្តថា ក្រសួងបានសហការជាមួយដៃគូរ និងមន្រ្ដីនាយក​ដ្ឋាន​ជំនាញ បានចូលរួមធ្វើការផ្សព្វផ្សាយអប់រំទប់ស្កាត់ ការរីករាលដាលនៃជំងឺនេះផងដែរ។ ក្រៅពីនេះ​ក្រសួងអភិវឌ្ឍន៍ជនបទ បានទទួលហិរញ្ញប្បទាន ពីរាជរដ្ឋាភិបាល ដើម្បីបន្តដំណើរការគម្រោងសាច់ប្រាក់​ពល​កម្ម សម្រាប់ហេដ្ឋារចនាសម្ព័ន្ធរូបវ័ន្ដ និងគាំទ្រកសិករ ជំហានទី២ ដែលជាការផ្ដល់ឱកាសការងារ និងរក​ប្រាក់ចំណូលគ្រួសារនៅជនបទផងដែរ។

លោកស្រី Francesca Erdelmann បានបញ្ជាក់ប្រាប់ថា លោកស្រីបានសង្កេតឃើញថា ក្នុងរយៈពេល៥ ឆ្នាំចុងក្រោយនេះ ជីវភាពរបស់ប្រជាពលរដ្ឋ នៅតាមតំបន់ជនបទមានការរីកចម្រើនគួរឲ្យកត់សម្គាល់។ ជា​មួយ​​នេះ លោកស្រីបានរំលឹកអំពីប្រវត្តិនៃកិច្ចសហប្រតិបត្តិការ រវាងក្រសួងអភិវឌ្ឍន៍ជនបទ និងកម្មវិធីស្បៀង​អាហារពិភពលោក ដែលមានតាំងពីយូណាស់មកហើយតាមរយៈកម្មវិធីស្បៀងពលកម្ម ហើយបច្ចុប្បន្ន​កម្ម​វិធីស្បៀងអាហារពិភពលោក​​បាន នឹងកំពុងអនុវត្តន៍កម្មវិធីមួយទៀត ​គឺកម្មវិធីផ្គត់ផ្គង់អាហារនៅតាមសាលា រៀន និងកម្មវិធីសម្អាតនៅតាមសាលារៀន តាមរយៈការផ្គត់ផ្គង់ទឹកស្អាតផងដែរ។

ក្រៅពីនេះកម្មវិធីស្បៀងអាហារពិភពលោក​ បានសហការជាមួយកម្មវិធីវិមជ្ឈការ និងវិសហមជ្ឈការ ដែល​មានក្រុម​ប្រឹក្សាឃុំ នៅតាមបណ្ដាខេត្តអនុវត្តន៍គម្រោងតូចៗ រួមមាន ជីកប្រឡាយ សាងសង់ផ្លូវ និងកម្មវិធី ប្រែប្រួលអាកាសធាតុ ដោយសហការជាមួយគណៈកម្មាធិការជាតិ គ្រប់គ្រងគ្រោះមហន្ដរាយ ដោយផ្ដោតទៅ​លើទីទួលសុវត្ថិភាព។             

លោកស្រី Francesca Erdelmann បាន​ស្នើសុំឲ្យក្រសួងអភិវឌ្ឍន៍ជនបទ ពិនិត្យលទ្ធភាពពង្រឹង​កិច្ចសហ​ប្រតិបត្តិការបន្ថែមទៀត ជាមួយកម្មវិធីស្បៀងអាហារពិភពលោក​​ លើផ្នែកជំនួយបច្ចេកទេស៕