លោកធី ជាកសិករដាំចេក ថា កសិករយើង ចូលចិត្តដាំចេកពងមាន់ ច្រើនជាងដាំចេកណាំវ៉ា ព្រោះបានថ្លៃ

ខេត្តកណ្តាលៈ

ដោយ៖ សេង ស៊ីដារ៉ូ

ដំណាំចេក ជាដំណាំមួយយូរអង្វែង​ ដែលប្រជាពលរដ្ឋយើងតែងដាំលក់ជាប្រចាំ​ ប៉ុន្តែភាគច្រើនកសិករយើង

តែងតែនិយមដាំចេកពងមាន់ ច្រើនជាងដាំចេកណាំវ៉ា គឺដោយសារមកពីតម្លៃទីផ្សារ ចេកទាំងពីរប្រភេទនេះ​មានតម្លៃខុសគ្នាឆ្ងាយ តែក៏មានអ្នកនិយមដាំចេកណាំវ៉ា ជាលក្ខណៈគ្រួសារជាច្រើនផងដែរ។

លោក ធី ជាកសិករ រស់នៅក្នុងភូមិខ្ពបវែង សង្កាត់កំពង់សំណាញ់ ក្រុងតាខៅ្ម ខេត្តកណ្តាល បានរៀបរាប់​ពី​ការ​

ដាំចេកណាំវ៉ាថា រូបលោក បានដាំចេកទាំងនេះ លើផ្ទៃដីក្បាល២០ម៉ែត្រ បណ្តោយ១៥០ម៉ែត្រ ដោយដាំ​ឃ្លាត​ចន្លោះពីគ្នា ៣ទៅ៤ម៉ែត្រ។ លោក ធី បានបន្តថា ​ដំណាំចេកនេះ ក្នុងខេត្តកណ្តាល ដាំតិចតួចណាស់​តែបើចេកពងមាន់ ប្រជាកសិករយើង មានការដាំច្រើន ព្រោះដោយសារតែចេកពងមាន់នេះ​ បានថ្លៃខ្ពស់​ក្នុង​ទី​ផ្សារ។

ម៉្យាងទៀតចេកពងមាន់នេះ គេដាំតម្រូវទៅតាមថ្ងៃ​ចូលឆ្នាំចិន ​បានថ្លៃណាស់​ដោយក្នុង១ស្ទងមានតម្លៃចាប់ពី​

៤ម៉ឺន​​ទៅ​៦ម៉ឺនរៀល ម៉្លោះហើយចេកពងមាន់មានការដាំដុះច្រើន ​ចំពោះចេកណាំវ៉ាពុំសូវសំបូរច្រើនទេ​នៅ​ខេត្ត​កណ្តាលនេះ គឺភាគច្រើន​​នាំចូលពីខេត្តដទៃវិញ។

លោក ធី បានបញ្ជាក់ទៀតថា ត្បិតតែចេកណាំវ៉ា ​មិនសូវបានថ្លៃក៏ដោយ ក៏រូបលោក​ នៅតែបន្តដាំរហូត 

ជិត១០ឆ្នាំមកហើយ។ ចេកណាំវ៉ានេះ ផ្តល់ប្រយោជន៍ ដល់អ្នកដាំ ទាំងស្លឹកទាំងដើមទាំងផ្លែទាំង​ត្រយ៉ូងចេក​ផងដែរ។

បច្ចុប្បន្នចេកណាំវ៉ា អាចលក់បាន១ស្និត២ពាន់ទៅ៣ពាន់រៀល ហើយចេកណាំវ៉ា ដែលលោក ដាំនេះ​អាច​លក់

បានក្នុង១អាទិត្យ បាន៧ម៉ឺនទៅ៨ម៉ឺនរៀល។ ចាប់តាំងពីដាំចេកនេះមក បានធ្វើឲ្យជីវភាពគ្រួសារលោក ធូរធារច្រើន៕