មហាសង្ក្រានឆ្នាំថ្មី ឆ្នាំជូត ទោស័ក នឹងឈានចូលនៅពេលឆាប់ៗនេះ រយៈពេល ៣ថ្ងៃ

 ភ្នំពេញៈ

ដោយ៖ សេង ស៊ីដារ៉ូ

 

ពិធីបុណ្យចូលឆ្នាំខ្មែរប្រពៃណីជាតិ មហាសង្ក្រាន នឹងឈានចូលថ្ងៃចន្ទ ៦រោច ត្រូវនឹងថ្ងៃទី១៣ មេសា ឆ្នាំ២០២០ វេលាម៉ោង ២០:៤៨នាទី     រយៈពេល ៣ថ្ងៃ គឺថ្ងៃទី ១៤-១៥-១៦ ខែមេសា ព្រះពុទ្ធសករាជ ព្រះសាសនា អតិក្កន្តា កន្លងទៅបាន ២៥៦៣ ត្រឹមថ្ងៃ ១៥កើត ខែពិសាខ លុះដល់ថ្ងៃ១រោច ខែពិសាខ ឆ្នាំជូត ទោស័ក ទៅចូលពុទ្ធសករាជ ២៥៦៤។

នឹងគណានាឆ្នាំជូតអីឡូវនេះ សង្ក្រាន្តចូលមកនៅថ្ងៃចន្ទ ៦រោច ខែចេត្រ ត្រូវនឹងថ្ងៃទី១៣ ខែមេសា ឆ្នាំ​២០២០ វេលាម៉ោង ២០:៤៨នាទី។ ពេលនោះព្រះអាទិត្យចេញពីមីនរាសី ទៅឋិតនៅឯមេសរាសី តាមផលូវ​គោ​វិថីផ្លូវកណ្តាលមានទេវធីតាមួយព្រះអង្គ ជាអគ្គនាយិកា ព្រះនាមគោរាគៈទេវី ជាបុត្រីទី២ កបិលមហា​ព្រហ្ម គង់នៅចាតុម្មហារាជិកា ទ្រង់អម្ពរពណ៌ លឿង លម្អរនៅព្រះកាល៌ដោយផ្កា អង្គារបុស្ស អភរណ កែវ​មុក្តា ភក្សាហារទ្រង់តេលំ ព្រះហស្តស្តាំទ្រង់ព្រះខន្ធ ព្រហស្តឆ្វេង ឈើច្រត់ ទ្រង់គង់អង្គុយបើកព្រះនេត្ររំពៃ​លើ​ខ្នង ព្យាគ្ឃៈ (ស្តេចខ្លា) ជាពាហនៈ។ ទើបនាំអស់ទេវបុត្រ ទេវធីតា ទាំងមួយសែនកោដិ ហោះទៅ​កាន់​គុហាកែវធម្មមាលី នាទីភ្នំកៃលាសខេត្តហិមពាន្ត ជាទីតំកល់ទុកនូវព្រះសិរលា កបិលមហាព្រហ្ម ដែលតំកល់​ឈើពានមាស ​នាមកដង្ហែប្រទក្សិណភ្នំព្រះសុមេរុរាជ តាមផ្លូវព្រះអាទិត្យចរចំនួន ៦០នាទី ២៤ម៉ោង ទើបនាំ​យកទៅតម្កល់ទុកកន្លែងដើមវិញ ហើយប្រជុំទេវបុត្រ ទេវធីតា ទាំងមួយសែនកោដិចូលទៅស្រង់ទឹក អនោត​ត្តមហាស្រះ ដែលមានទឹកហូរចេញពីបំពង់ថ្មកែវ ដែលជាមាត់គោឧសភរាជទាំង៧ ត្រជាក់ក្សេមក្សាន្ត​ព្រះរាជ​ហឫទ័យ ហើយនាំគ្នាចូលសមាទានរក្សាសីល ដោយសោមនស្សរីករាយគ្រប់ៗព្រះអង្គ ក្នុងភគវតី​សភា​​សា​លា ដែលព្រះវិស្សកម្មទេវបុត្រនិមិត្តថ្វាយ ដើម្បីបន្ទោបង់អពមង្គលឲ្យជ្រះស្រឡះ ហើយចម្រើននូវសិរីសួស្តី ជ័យមង្គលជន្មាសុខក្សេមក្សាន្តតរៀងទៅ ។

ថ្ងៃច័ន្ទ ៦រោច ខែចេត្រ ត្រូវនឹងថ្ងៃទី១៣ ខែមេសា ឆ្នាំ២០២០ វេលាម៉ោង ២0:៤៨នាទី ជាថ្ងៃចូលឆ្នាំជូត ទោស័ក (ជាវារៈមហាសង្ក្រាន្ត) ។

ថ្ងៃអង្គារ ៧រោច ខែចេត្រ ត្រូវនឹងថ្ងៃទី១៤ ខែមេសា ឆ្នាំ២០២០ ​ជាវារៈវ័នបត ។

ថ្ងៃពុធ ៨រោច ខែចេត្រ ត្រូវនឹងថ្ងៃទី១៥ ខែមេសា ឆ្នាំ២០២០ ជាវារៈវ័នបត ។

ថ្ងៃព្រហស្បតិ៍ ៩រោច ខែចេត្រ ត្រូវនឹងថ្ងៃទី១៦ ខែមេសា ឆ្នាំ២០២០ នៅវេលាម៉ោង ១ និង ២៤នាទី ៣៦​វិនា​ទី ជាវារៈឡើងស័ក គម្រប់ជាសង្រ្កាន្តបីថ្ងៃ ស្រេចបរិបូរណ៌ចូលជាសកលឆ្នាំជូត ទោស័ក ម.ស ១៩៤២ ចុ.ស ១៣៨២ តទៅ។

នៅក្នុងឱកាសសង្ក្រាន្តទាំងបួនថ្ងៃ សូមអស់ប្រជាពលរដ្ឋប្រុសស្រីទាំងឡាយ រៀបចំពលិការ គ្រឿងសក្ការបូជា អុចប្រទីបជ្វាលា ថ្វាយព្រះរតនត្រ័យ និងទទួលស្វាគមន៍ ទេវបុត្រ ទេវធីតា ឆ្នាំថ្មី ហើយខំលះបង់ចិត្ត​អាក្រក់​អន្យតិរ្ថិយ ជាចិត្តអប្រិយ៍ជាប់ដោយគំនុំគុំគួនព្យាបាទ ឈ្នានីស ដែលកើតមានក្នុងឆ្នាំចាស់ឲ្យជ្រះស្រឡះ តាំង​​​​ចិត្ត​ប្រព្រឹត្តល្អប្រកប​ដោយ មេត្តា ករុណា ទុទិតា ឧបេក្ខា និង បញ្ញា ធ្វើបុណ្យសុន្ធរ៍ទានតាមប្រពៃណី រក្សា​​​​​សីលប្រាំឲ្យបានជាប់ជានិច្ច នោះទេវតា និងឲ្យពរសព្ទសាធុការ លោកអ្នកនឹងមានសិរីសួស្តី សុភមង្គល វិបុលសុខគ្រប់ប្រការតាំងពីឆ្នាំថ្មីនេះតរៀងទៅ៕