លោក ភិរម្យ ជាម្ចាស់សិប្បកម្មផលិតខ្ទះ ថា ខ្ទះ​ចាក់ពុម្ពដោយម៉ាស៊ីន មានភាពស្រួលឆាប់បាក់បែកច្រើន ជាង​ការផលិតដោយពុម្ពចាក់ដៃ

 ខេត្តកណ្តាលៈ

ដោយ៖ សេង ស៊ីដារ៉ូ

 

សិប្បកម្មផលិតខ្ទះ ពីដេរ៉ា នៅក្នុងឃុំទំនប់ធំ ស្រុកពញាឮ ខេត្តកណ្តាល ពីមុនមកផលិតចាក់ពុម្ពដោយដៃ ជាឆ្នាំងដាំបាយ ជាលក្ខណៈគ្រួសារប៉ុណ្ណោះ តែក្រោយមកសិប្បករឈ្មោះ ​ភិរម្យ ក៏បានចាប់ផ្តើមផលិតពុម្ព​ដោយ​​ដៃផ្ទាល់ ដើម្បីចាក់នៅខ្ទះត្នោត ដែលភាពសាមញ្ញបំផុត។ សិប្បកម្មផលិតខ្ទះនេះ ក្នុងមួយថ្ងៃៗអាច​ផលិត​បានចំនួនពី ៨  ទៅ១០ខ្ទះ

លោក ភិរម្យ បានលើកឡើងថា ក្នុងសម័យឆ្នាំ៧៩ សិប្បកម្មរបស់លោកផលិតខ្ទះនេះ ដោយការដូរអង្ករ ឬស្ករ ទៅតាមលទ្ធភាពរបស់ប្រជាពលរដ្ឋ ពេលខ្លះចំណេញតិច ពេលខ្លះចំណេញច្រើន  ដោយសម័យនោះ​ពុំទាន់មានការចាយលុយនៅឡើយទេ ហើយក៏មានតម្រូវការអ្នកប្រើប្រាស់ច្រើនផងដែរ។

បើប្រៀបធៀបមកដល់ពេលបច្ចុប្បន្ននេះ គឺមានការវិវត្តច្រើន ហើយការលក់ចេញ ​ក៏បានចំណេញច្រើន​ ព្រោះ​តម្រូវការប្រើប្រាស់ច្រើនរាល់ថ្ងៃ។ ប្រភេទខ្ទះទំហំ ១ម៉ែត្រ ត្រូវលក់គិតជាគីឡូ ដោយក្នុងមួយគីឡូតម្លៃ ១២០០០៛ ទៅ ២០០០០៛។ លោក ភិរម្យ ម្ចាស់សិប្បកម្មផលិតខ្ទះ បានបញ្ជាក់ឡើងវិញថា ប្រភេទខ្ទះ​ត្នោត​របស់គាត់នេះ មានគុណភាពជាប់ស្វិតបានយូរ ដោយយកពូថៅវាយក៏មិនបែកដែរ ដោយឡែកចំពោះខ្ទះ​ចាក់ពុម្ព ដោយម៉ាស៊ីនមានភាពស្រួលឆាប់បាក់បែកច្រើន ជាងការផលិតដោយពុម្ពចាក់ដៃនេះ៕