រដ្ឋមន្រ្ដីក្រសួងអភិវឌ្ឍន៍ជនបទ បានខួបលើកទី១០៩ ទិវាអន្ដរជាតិនារី០៨មីនា ​«មានសន្តិភាពមាន​ការលើក​​កំពស់សមភាពយេនឌ័រ»

ខេត្តកំពង់ឆ្នាំងៈ


ដោយ៖ ឌឹម គឹមហាក់

ដោយសារនយោបាយឈ្នះ ឈ្នះ ឆ្នាំ១៩៩៨ របស់នាយករដ្ឋមន្រ្ដី ហ៊ុន សែន ទើបបានបញ្ចប់នូវសង្រ្គាមរាំរ៉ៃ នាំមកនូវសុខសន្តិភាព សិទ្ធិសេរីភាព និងសមភាពយេនឌ័រ ។


ថ្លែងក្នុងពិធីសំណេះសំណាលអបអរសាទរខួបលើកទី ១០៩ ទិវាអន្ដរជាតិនារី ០៨ មីនា នៅខេត្តកំពង់ឆ្នាំង កាលពីថ្ងៃទី ០២ ខែមីនា ឆ្នាំ ២០២០ លោក  អ៊ុក រ៉ាប៊ុន  រដ្ឋមន្រ្ដីក្រសួងអភិវឌ្ឍន៍ជនបទ និងជាប្រធានក្រុម​ការងាររាជរដ្ឋាភិបាល ចុះមូលដ្ឋានខេត្តកំពង់ឆ្នាំង បានបញ្ជាក់ថា ដោយសារនយោបាយឈ្នះ ឈ្នះ ឆ្នាំ ១៩៩៨ របស់សម្ដេចតេជោនាយករដ្ឋមន្រ្ដី ទើបបានបញ្ចប់នូវសង្រ្គាមរាំរ៉ៃ នាំមកនូវសុខសន្តិភាព សិទ្ធិសេរី​ភាព និងសមភាពយេនឌ័រ នេះ ជាកត្តាសត្យានុម័ត បើគ្មានសន្តិភាព ក៏គ្មានការអភិវឌ្ឍ ហើយបើគ្មានសន្តិ​ភាព ក៏គ្មានលទ្ធិប្រជាធិបតេយ្យ ហើយក៏គ្មានការគោរពសិទ្ធិមនុស្សដែរ។

លោក រដ្ឋមន្ត្រី បានលើកឡើងទៀតថា ​ទិវាអន្តរជាតិនារី ៨មីនា ខួបលើកទី១០៩ ឆ្នាំ២០២០ ក្រោមប្រធាន​បទ «មានសន្តិភាពមានការលើកកំពស់សមភាពយេនឌ័រ»  ដែលជាប្រធានបទ បានផ្តោតសំខាន់ទៅលើអត្ថ​ន័យខ្លឹមសារយ៉ាងជ្រាលជ្រៅ ទៅលើតម្លៃនៃសន្តិភាព ដែលប្រជាជននៅទូទាំងពិភពលោកទទូចចង់បាន។ ដោយឡែកប្រជាពលរដ្ឋកម្ពុជា នៅទូទាំងប្រទេសបានចាត់ទុកថា ជាការលះបង់ដ៏ធំធេងទាំងកម្លាំងកាយ កម្លាំង​​ចិត្ត និងប្ដូរអាយុជីវិតរបស់ថ្នាក់ដឹកនាំគឺ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដី​នៃ​ព្រះរាជាណាចក្រកម្ពុជា ដែលជាស្ថាបនិកនយោបាយឈ្នះ ឈ្នះ។

លោករដ្ឋមន្រ្ដី បានអំពាវនាវដល់ស្រ្ដីដែលជាមន្រ្ដីរាជការ និវត្តន៍ជន ជនមានពិការភាពដែលបានអញ្ជើញ​មកពីបណ្ដាមន្ទីរជំនាញជុំវិញខេត្តកំពង់ឆ្នាំង ក៏ដូចជាប្រជាពលរដ្ឋនៅទូទាំងប្រទេស ត្រូវរួមគ្នាការពារ​សន្តិ​ភាព​ដែលបានកើតមានឡើងអស់រយៈកាលជាង២០ឆ្នាំកន្លងមកនេះ ឲ្យបានស្ថិតស្ថេរគង់វង្ស ដើម្បីបន្ត​អភិ​វឌ្ឍន៍ប្រទេសជាតិយើងឲ្យកាន់តែសំបូររ៉ុងរឿងថែមទៀត។  
                  
អត្ថន័យនៃទិវាអន្តរជាតិនារី ៨មីនា គឺដើម្បីរំលឹកវីរភាពនៃការតស៊ូរបស់នារីទូទាំងសកលលោក ក្នុងការទាម​ទារឲ្យមានការលើកកម្ពស់សិទ្ធិសេរីភាព និងការអនុវត្តសិទ្ធិស្មើភាពរវាងបុរស និងស្រ្តី និងម្យ៉ាងទៀតក៏ដើម្បី​បង្ហាញឲ្យឃើញពីការយកចិត្តទុកដាក់របស់ប្រមុខរាជរដ្ឋាភិបាលកម្ពុជា ក្នុងការលើកកម្ពស់តម្លៃស្រ្តី តាមរយៈ​ការ​ផ្តល់ក្របខណ្ឌ ឋានៈ តួនាទី ក៏ដូចជាការគិតគូរពីការបណ្ដុះបណ្ដាលវិជ្ជាវីវៈជាដើម។​

ឯកឧត្ដមប្រធានក្រុមការងាររាជរដ្ឋាភិបាល ចុះមូលដ្ឋានខេត្តកំពង់ឆ្នាំង បានសម្តែងនូវការកោតសរសើរ និង​វាយតម្លៃខ្ពស់ចំពោះមន្រ្ដីរាជការជានារី ដែលបានចូលរួមចំណែកយ៉ាងសកម្ម ក្នុងកិច្ចការសង្គម ជាពិសេស​ការ​​បំពេញតួនាទីជាមេគ្រួសារប្រកបដោយព្រហ្មវិហាធម៌ ៕