លោក សឿង សួគ៌ា ជាម្ចាស់សិប្បកម្មកែច្នៃសំបកកង់ឡាន និងម៉ូតូ កំពុងមានការចំណាប់អារម្មណ៍ និងធ្វើ​ការកម្មង់ច្រើន ពីអតិថិជន

 ខេត្តព្រៃវែងៈ

ដោយ៖ សេង ស៊ីដារ៉ូ

 

សិប្បកម្មកែច្នៃពីសំបកកង់ឡាន ម៉ូតូ ចាស់ៗ បានបង្ហាញស្នាដៃក្នុងការច្នៃប្រឌិតសំបកកង់ម៉ូតូ ឡាន ឲ្យ​ទៅ​ជា​គ្រឿង​​សង្ហារឹមស្អាតៗ សម្រាប់ប្រើប្រាស់លំអរ នៅក្នុងក្រុមហ៊ុន នៅផ្ទះ តាមហាង តាមសាលារៀន និង​មរណី​ដ្ឋាននានា​​ ហើយក៏ជា​ឱកាសមួយ ​ដែល​បាននាំយកផលិតផលនេះ មកតាំងពិពណ៌ផលិផល នៅកោះ​ពេជ្រ​​នាពេលថ្មីៗនេះ។

សិប្បកម្មកែច្នៃកង់ឡាន ម៉ូតូនេះ ទើបបើកឲ្យដំណើរការប្រហែលជាមួយឆ្នាំប៉ុណ្ណោះ ដែលមានប្រយោជន៍​ដ៏​សំខាន់ចំពោះសង្គម ដូចជា ជួយសម្អាត បរិស្ថាន ធ្វើឲ្យមានបរិយាកាសល្អ ងាយស្រួលក្នុងការរស់នៅ ជាង​នេះ​ទៅទៀត វាចំណេញយ៉ាងច្រើនក្នុងការចំនាយថវិការបស់ជាតិ។

លោក សឿង សួគ៌ា ជាម្ចាស់សិប្បកម្មកែច្នៃសំបកកង់ឡាន និងម៉ូតូ បានឱ្យដឹងថា មុខរបររកស៊ីក្នុងការកែច្នៃ​នេះ ជាការសាកល្បងដំបូងរបស់រូបលោក ប្រសិនបានជោគជ័យ គឺ រូបលោក នឹងបន្តទៅទៀត តែបើបរាជ័យ​វិញនោះ រូបលោកនឹងប្តូរមុខរបរថ្មីជាបន្តទៀត ប៉ុន្តែរកមុខរបរណាទាក់ទងនឹងសំបកកង់ឡាន និងម៉ូតូនេះ ព្រោះវាចំណេញដ៏សង្គមច្រើន។

លោក សឿង សួគ៌ា រៀនចប់ផ្នែកថ្នាក់បរិញ្ញាបត្រគណនេយ្យ ប៉ុន្តែតែដោយសារ រូបលោកចង់ជួយសង្គម ទើប​​បែកគំនិតចង់រកស៊ីរបៀបកែច្នៃសំបកកង់ឡាន ម៉ូតូនេះ ដើម្បីក្នុងការចូលរួមជួយសំអាតបរិស្ថាន និងឲ្យមាន​បរិយាកាសល្អផង​​ ក៏រូបលោក ចាប់ផ្តើមទិញសំបកកង់ឡាន ម៉ូតូ មកកែច្នៃធ្វើការរូបសត្វ តុ កៅអី ផើងផ្កា និងបន្តោងរូបសត្វផ្សេងៗ សម្រាប់ដាក់តាំងលំអរផ្ទះ តាមហាង តាមសាលារៀន និងមរណីដ្ឋាននានា​ផង​ដែរ។

លោក សឿង សួគ៌ា បន្តទៀតថា ក្នុងការកែច្នៃសំបកកង់ឡាន ម៉ូតូចាស់ៗនេះ មានធ្វើជាតុ និងកៅអីនេះ មានពីរប្រភេទ គឺខ្នាតតុ កៅអីទាប អាចលក់បានថ្លៃ ១២០ដុល្លារ ចំពោះតុ និងកៅអីខ្ពស់ លក់បានថ្លៃ ១៥០​ដុល្លារ ក្រៅពីនោះបានយកសំបកកង់ឡាន កែច្នៃទៅជាផើងដាំផ្កា ផើងចិញ្ចឹមត្រី ដាំបន្លែ ហើយនាពេលថ្មីនេះ​មានការចំណាប់អារម្មណ៍ និងធ្វើការកម្មង់យ៉ាងច្រើន ពីអតិថិជន ដោយក្នុងនោះភាគច្រើនមកពីភ្នំពេញ និងខេត្តកំពង់ស្ពឺ៕