រដ្ឋមន្រ្តីក្រសួងអភិវឌ្ឍន៍ជនបទ ប្រគេនទៀនវស្សា និងទេយ្យទាន ដល់ព្រះសង្ឃទាំង ៣២ វត្ត ក្នុងស្រុកសាមគ្គីមាន​ជ័យ

 ខេត្តកំពង់ឆ្នាំងៈ

ដោយ៖ កញ្ញា ទេព សុវ៉ាត

លោក អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ និងជាប្រធានក្រុមការងារថ្នាក់ជាតិចុះមូលដ្ឋាន ជួយខេត្ត​កំ​ពង់​ឆ្នាំង ព្រមទាំងសហការី បាននាំយកទៀនព្រះវស្សា  ទេយ្យទាន និងបច្ច័យ មួយចំនួន ទៅវេរប្រគេនព្រះ​សង្ឃ​​នឹងគង់ចាំព្រះវស្សា ចំនួន៦វត្ត ស្ថិតនៅក្នុងស្រុកសាមគ្គីមានជ័យ ខេត្តកំពង់ឆ្នាំង   កាលពីថ្ងៃទី១៣ ខែកក្កដា ឆ្នាំ ២០១៩។

វត្តទាំង ៦ ដែលទទួលបានទៀនព្រះវស្សា ទេយ្យទាន និងបច្ច័យ មានវត្តបឹងខ្នា ស្ថិតនៅក្នុងភូមិ វត្ត , វត្តកេរ រស្មី  ភូមិខ្នាកណ្ដាល  ក្នុងឃុំខ្នាឆ្មារ , វត្តឈូក ភូមិឈូក  វត្តធ្លកវៀន ភូមិធ្លកវៀន និងវត្តទស្សពិត ភូមិធ្លក វៀន វត្តសុរិយា ភូមិប្រក្លូត ស្ថិតនៅក្នុងឃុំធ្លកវៀន ស្រុកសាមគ្គីមានជ័យ ដោយវត្តនីមួយៗ ទទួលបានទៀន ព្រះវស្សា ១គូរ  ស្លាដក់ អង្ករ មីម៉ាម៉ា ទឹកផ្លែឈើ ទឹកបរិសុទ្ធ នំធុង ទឹកដោះគោ តែ ស្ករស ទឹកត្រី ទឹកស៊ីអ៊ីវ បច្ច័យសម្រាប់ព្រះសង្ឃ និងបច្ច័យសម្រាប់កសាង  ព្រមទាំងឧបត្ថម្ភដល់ប្រជាការពារផងដែរ។ ​    

នៅរសៀលថ្ងៃដែលនោះដែរ លោករដ្ឋមន្ត្រី​ និងសហការីជាច្រើនរូបទៀត បានអញ្ជើញទៅ វត្តត្រពាំងម៉ទេស ឃុំស្វាយជុក ស្រុកសាមគ្គីមានជ័យ ដើម្បីប្រារព្ធពិធីវេរ និងប្រគេនទៀនព្រះវស្សា ទេយ្យទាន និងបច្ច័យមួយ​ចំនួន ដល់ព្រះសង្ឃនិមន្ដមកពី ២៦វត្ត ក្នុងនោះមាន ឃុំឈានឡើង ២វត្ត , ឃុំពាម ៥វត្ត , ឃុំស្វាយជុក ៥ វត្ត​ , ឃុំត្បែងខ្ពស់ ៥ វត្ត ,  ឃុំស្វាយ ៤វត្ត , ឃុំសេដ្ឋី ២វត្ត និងឃុំក្រាំងល្វា ចំនន ៣វត្ត ។

លោករដ្ឋមន្ត្រី បានពាំនាំនូវបណ្ដាំផ្ញើសាកសួរសុខទុក្ខ ពីសំណាក់សម្ដេច នាយករដ្ឋមន្រ្ដី និងសម្ដេចកិត្តិព្រឹទ្ធ​បណ្ឌិត ជូនចំពោះបងប្អូនប្រជាពលរដ្ឋនៅទីនោះ និងជម្រាបជូនអំពីអត្ថន័យ និងប្រវត្តនៃពិធីបុណ្យ​ចូលព្រះ​វស្សា​ដែលមានរយៈពេលបីខែ ចាប់ពីថ្ងៃ១រោច ខែអាសាឍ រហូតដល់ទី១៥កើត ខែអស្សុជ (ចូលព្រះវស្សា គឺជាព្រះវិន័យដែលព្រះសម្មាសម្ពុទ្ធទ្រង់បញ្ញត្តិឡើង)។

ប្រជាពុទ្ធបរិស័ទតែងតែនាំយកនូវ ទៀនវស្សា ទេយ្យទាន អង្ករ ទៀន ធូប ប្រេង ស្បង់ ចីវរ សំពត់ ស្លាដក់ និងគ្រឿងឧបភោគបរិភោគដ៏ទៃទៀត ទៅប្រគេនព្រះសង្ឃតាមទីវត្តអារាម ដើម្បីឲ្យព្រះភិក្ខុសង្ឃ និងសាម​ណេ ​សិក្សាព្រះធម៌វិន័យ និងប្រតិបត្តិតាមពុទ្ធបញ្ញត្តិ ក្នុងរយៈបីខែនេះ​។

លោករដ្ឋមន្ត្រី បានជម្រាបជូន អំពីការអភិវឌ្ឍរីកចំរើនរបស់ប្រទេសជាតិ បន្ទាប់ពីទទួលបាននូវសុខសន្តិភាព​ពេញលេញ​ទាំងវិស័យពុទ្ធចក្រ និងអាណាចក្រ  ដោយផ្ដោតសំខាន់ទៅលើការស្ដារ និងកសាងហេដ្ឋារចនា​សម្ព័ន្ធជនបទ ដែលជាចលករមួយជួយជំរុញកំណើនសេដ្ឋកិច្ចជាតិ  ដែលសមិទ្ធផលទាំងអស់នេះ បានមកពី​ការ​​ខិតខំប្រឹងប្រែង របស់ថ្នាក់ដឹកនាំរាជរដ្ឋាភិបាល ដែលមានសម្ដេច ហ៊ុន សែន ជាប្រមុខដឹកនាំ៕