ស្វែងយល់ៈ អំពីប្រវត្តិសាក់លើខ្លួនប្រាណ នៃជនជាតិខ្មែរ
ភ្នំពេញៈ
ដោយ៖ សេង ស៊ីដារ៉ូ
នៅចុងសម័យថ្មរំលីង ដើមសម័យលោហធាតុ (២៥០០-៥០០ឆ្នាំមុន គ.ស) គឺជាសម័យកាលមួយ ដែលបុព្វការីជនខ្មែរ រស់នៅជាកុលសម្ព័ន្ធកសិករនៅឡើយ បាននិយមការសាក់លើខ្លួនប្រាណ រួចទៅហើយ។ ពួគេក៏ចេះស្លលោហធាតុសម្រាប់ធ្វើឧបករណ៍ប្រើប្រាស់ ក្នុងសង្គម និងបានទទួលនូវការលូតលាស់ខាងវប្បធម៌គ្រប់វិស័យរួចទៅហើយ។ ប៉ុន្តែគេត្រូវរងចាំដល់ ស.វទី ៣-៤ មុន គ.ស ទើបមានការកត់ត្រាដោយជនជាតិចិន អំពីការសាក់ ការស៊ីម្លូ ស្លា ការប្រើធ្នូររបស់បុព្វការីជនខ្មែរ ដែលនាជំនាន់នោះ នៅស្លៀកប៉ឹង និងលែងខ្លួននៅឡើយ។
ដូចនេះ ការលើកយកមកបង្ហាញខាងលើនេះ ដែលផ្អែកតាមឯកសារចិន ជាលាយល័ក្ខណ៍អក្សរ គឺជា ភស្តុតាងស្តីពីការសាក់ខ្លួនរបស់ដូនតាខ្មែរ ដែលជាខ្មែរដើមយ៉ាងប្រាក ដោយឥតប្រកែកបាន។
កាលពីឆ្នាំ ១៩៦៨ យើងបានរកឃើញរូបចម្លាក់មនុស្សស្រី មួយនៅក្នុងបរិវេណនៃភ្នំល្អាង ស្ពាន នៅខេត្តកំពត ហើយថ្មីៗនេះ បានរកឃើញសត្វគោមួយចំនួននៅភូមិស្នាយ ស្រុកព្រះនេតព្រះ ខេត្តបន្ទាយមានជ័យ ពាក់ព័ន្ធទៅនឹងប្រពៃណី សាក់ខ្លួនដ៏គួឲ្យចាប់អារម្មណ៍បំផុត។
បុរាណវត្ថុទាំងនោះ ដែលមានស្នាមរង្វង់នៅជុំវិញយោនីមនុស្ស ឬក៏នៅលើដងខ្លួនសត្វ ជាពិសេសសត្វគោ ពុំមែនឥតមានហេតុផលនោះឡើយ។ ពិតណាស់ស្លាកស្នាមទាំងនោះ គឺជានិមិត្តសញ្ញាប្រកបដោយ អត្ថន័យច្បាស់ណាស់ និងជាក់លាក់របស់វា។ លើសពីនេះ ទៅទៀត គឺជាភស្តុតាងមួយបង្ហាញនូវចំណាស់នៃការនិយមចាក់សាក់តាំពីបុរាណកាល ដ៏យូរលងណាស់មកហើយ របស់ជនជាតិខ្មែរ ។
រូបស្រ្តី ដែលប្រហែលជាតំណាងឲ្ម្តាយដើមនោះ មានអាយុយ៉ាងតិចណាស់ក៏ ២៥០០ ឆ្នាំ មុន គ.ស ដែរ រីឯដងខ្លួនសត្វគោរវិញនោះ មានអាយុត្រឹមតែ ស.វទី ៥ ដល់ ស.វទី៣ មុន គ.ស តែប៉ុណ្ណោះ។ ស្ថានីយទាំងពីរនេះ មានអាយុកាលខុសគ្នា ដោយហេតុថា ស្រទាប់ដីវប្បធម៌នៅភ្នំល្អាងស្ពាន មានអាយុប្រមាណជា ៤២៩០ឆ្នាំ មុនគ.ស រីឯស្ថានីយភូមិស្នាយ នៅបន្ទាយមានជ័យមានអាយុតិចជាង។
ការសាក់នេះ ពុំមែនគ្រាន់តែជាសញ្ញាសម្រាប់ទាក់ទាញ នូវឥទ្ធិពលធម្មជាតិ ឬព្រលឹងនៃបុព្វការីជន ដែលចែកឋានទៅហើយ ឬក៏សម្រាប់អ្នកចម្បាំង ក្នុងគោលបំណងសុំការបីបាច់ថែរក្សាខ្លួនប្រាណ តែប៉ុណ្ណោះទេ ប៉ុន្តែក៏ជាកត្តមួយបង្ហាញនូវអំណាចបារមី មហិទ្ធិរិទ្ធិ ឬឋានៈ នៃភាពអង់អាចក្លាហាន អស្ចារ្យរបស់អ្នកដែលមានសាក់នៅលើដងខ្លួនផងដែរ ហើយភាពល្បីល្បាញ នៃសាក់ គឺបណ្តាលមកពីភាពស័ក្តិសិទ្ធិ នៃសញ្ញាទាំងនោះ ដែលគេចាត់ទុកថា សញ្ញាបង្កប់នូវថាមពលពិសិដ្ឋអមតៈ ដែលបុព្វបុរសបានផ្តល់ជូនកូនចៅ។
សូមរំលឹកឡើងវិញផងដែលថា រហូតមកដល់សព្វថ្ងៃនេះ កុលសម្ព័ន្ធខ្មែរលើ ឬខ្មែរដើមដែលរស់នៅតាមព្រៃភ្នំ ឬខ្ពង់រាបមួយចំនួន នៅតែពេញនិយមប្រពៃណីសាក់ របស់ពួកគេដែរ ដែលជាភស្តុតាងបង្ហាញ នូវភាពចាស់ជរានៃវប្បធម៌សាក់នេះ។ ជារួមគេអាចនិយាយបានថា ប្រពៃណីសាក់ខ្លួនខាងលើនេះ ដើមឡើយជាសិល្បៈចម្បាំងផងដែរ គឺជាការបង្ហាញបញ្ជាក់ ឬការសម្គាល់អត្តសញ្ញាណ នៃពួកកុលសម្ព័ន្ធខ្មែរ លើទាំងនោះ ដែលរស់ជាក្រុមៗ ក្នុងសហគមន៍តូចធំទាំងឡាយ។ មានន័យថា សញ្ញាពិសិដ្ឋទាំងនោះ គឺជាលក្ខណៈវិនិច្ឆ័យអត្តចរិត ឬលក្ខណៈសម្បត្តិផ្ទាល់ របស់ក្រុមនីមួយៗ។
សរុបមក ការប្រសូតឡើងតាំងពីសម័យបុរេប្រវត្តិសាស្ត្រ នៃប្រពៃណីសាក់នេះ គឺជាមរតកវប្បធម៌អរូបី ត្រូវបានបន្តរហូតដល់សព្វថ្ងៃនេះ ហើយកំពុងតែពេញនិយម ដោយជនជាតិខ្មែរ និងខ្មែរលើ។ រីឯការឆ្លាក់ព្រះគាថាជាអក្សរមូល ឬបាលី ឬការគូរយន្តលើខ្លួនប្រាណ នៃសាសនាព្រហ្មណ៍ និងពុទ្ធនិយមវិញ គឺជាសមិទ្ធផលនាជំនាន់ក្រោយតែប៉ុណ្ណោះ៕
Post a Comment