ពូជស្វាយកែវរមៀត នៅតែមានក្នុងទីផ្សារ ព្រោះមានគេកម្មង់ទិញច្រើន

ខេត្តកណ្តាលៈ

ដោយ៖ ពិន ភក្តី

 ពូជស្វាយកែវរមៀត ដែលកន្លងមកស្ងាត់ការប្រមូលទិញ ដោយគ្មានអ្នកកម្ម៉ងទិញ ពូជស្វាយមួយនេះ ដែលជាក្តី​បារម្ភចំពោះ អ្នកដែលបណ្តុះកូនស្វាយនេះ។

តាមរយៈសកម្មភាព របស់អ្នកដែលមានមុខរបរជាអ្នកកាប់ប្រលះគ្រាប់ស្វាយកែវរមៀតប្រចាំថ្ងៃ បានឲ្យដឹងថា បណ្តាឆ្នាំកន្លងមក ក្នុងការកាប់ប្រលះគ្រាប់ស្វាយកែវរមៀតនេះ ស្ងាត់ដោយគ្មានអ្នកកម្ម៉ង ក៏ប៉ុន្តែឆ្នាំចុងក្រោយនេះ ស្រាប់តែមានការកម្ម៉ងឡើងវិញ ហើយនាំគ្រាប់ពូជទុំតាមបណ្តាទីផ្សារនានា យកមកកាប់ប្រលះយកពូជគ្រាប់​ស្វាយនេះ។

អ្នកស្រី នី ជាអ្នកចំណាកស្រុកមកពីខេត្តព្រៃវែង ដែលមានរបរដើរកាប់ប្រលះគ្រាប់ស្វាយកែវរមៀត តាមភូមិព្រែក​អញ្ចាញ សង្កាត់ព្រែកឬស្សី ក្រុងតាខ្មៅ ខេត្តកណ្តាល បាននិយាយថា ឆ្នាំទៅស្ងាត់អ្នកកម្ម៉ងគ្រាប់ស្វាយ ក៏ប៉ុន្តែឆ្នាំ​នេះ មានការកម្ម៉ងគ្រាប់ពូជស្វាយនេះឡើងវិញ ដែលក្នុងមួយថ្ងៃអាចកាប់ប្រលះយកគ្រាប់ បានចាប់បី៣០០០-៤០០០​​គ្រាប់ និងក្នុង១ថ្ងៃអាចរកចំណូលបានចាប់ពី២០០០០-៣០០០០រៀល នេះក៏ដោយសារគាត់វ័យចាស់​ទៅ​ហើយផង បើចំពោះក្មេងៗ គេអាចកាប់ប្រលះបានគ្រាប់ស្វាយបាន ចាប់ពី៥០០០-១០០០០គ្រាប់។ នៅក្នុង​ការ​កាប់​​ប្រលះ​គ្រាប់ស្វាយពូជកែវរមៀតនេះ ក្នុង១០០០គ្រាប់ទទួលបានកម្រៃ ៨០០០រៀល៕