ឯកឧត្តម ប្រាជ្ញ ចន្ទ ប្រធានក្រុមប្រឹក្សាជំនុំជម្រះ នៃ គ.ជ.ប បានបើកសវនាការជំនុំជម្រះ លើបណ្តឹងតវ៉ារបស់គណបក្សភ្លើងទៀន ចំនួន៥ករណី
ភ្នំពេញ
ដោយៈ សេង ស៊ីដារ៉ូ
ការបើកសវនាការជំនុំជម្រះនេះ មានក្រុមប្រឹក្សាជំនុំជម្រះ នៃគ.ជ.ប ដែលមានសមាសភាពសំខាន់ៗចំនួន ៩រូប ដឹកនាំដោយ ឯកឧត្តម
ប្រាជ្ញ ចន្ទ ជាប្រធាន គ.ជ.ប និងជាប្រធានក្រុមប្រឹក្សាជំនុំជម្រះ នៃ
គ.ជ.ប បានបើកសវនាការជាសាធារណៈ ដើម្បីដោះស្រាយដោយយុត្តិធម៌បំផុត លើពាក្យបណ្តឹងតវ៉ារបស់គណបក្សភ្លើងទៀន ចំនួន៥ករណី ក្នុងសំណុំរឿងលេខ ០៧១,លេខ ០៧២, លេខ ០៧៣, លេខ០៧៤, លេខ ០៧៥ ដែលតំណាងគណបក្សភ្លើងទៀន ឈ្មោះ វ៉ាត់ ធារិត បានប្តឹងសុំតវ៉ាទៅនឹងសេចក្តីសម្រេចរបស់គណៈកម្មការរៀបចំការបោះឆ្នោតខេត្តកំពង់ចាម ដែលបានបដិសេធបញ្ជីបក្ខជននៃគណបក្សភ្លើងទៀន។
នៅក្នុងសវនាការនេះផងដែរ ក៏មានការចូលរួមពីគ្រប់សំណាក់ប្រធាននាយកដ្ឋាន និងសមាជិក គ.ជ.ប ថែមទាំងអ្នកសារព័ត៌មានជាតិ និងអន្តរជាតិ និងអង្គការក្រៅរដ្ឋាភិបាលជាច្រើនរូបបន្ថែមទៀត ជាពិសេសប្រ
ធាននាយកដ្ឋានព័ត៌មាន និងទំនាក់ទំនងសាធារណៈ បានខិតខំប្រឹងប្រែងតាមដានអង្កេត និងស្តាប់ ដើម្បីប្រមូលយកបានព័ត៌មានសំខាន់ៗ ទាំងក្នុងនឹងទាំងក្រៅសវនាការនេះ ដើម្បីផ្សព្វផ្សាយយ៉ាងទូលំទូលាយជូនសាធារណៈ និងរដ្ឋាភិបាល ដោយអព្យាក្រឹត្យ។
លោក វ៉ាត់ ធារិត ភេទប្រុស កើតនៅថ្ងៃទី៥ ខែមិថុនា ឆ្នាំ១៩៧២ មានទីលំនៅ ភូមិស្ពឺកើត ឃុំស្ពឺ ស្រុកចំការលើ ខេត្តកំពង់ចាម ជាតំណាងដើមបណ្តឹងនៃគណបក្សភ្លើងទៀន ក្នុងសំណុំរឿងទាំងប្រាំខាងលើ រូបលោកបានស្នើសុំក្រុមប្រឹក្សាជំនុំជម្រះ សូមមេត្តាអនុគ្រោះ និងពិនិត្យទៅលើបញ្ជីចុះឈ្មោះបោះឆ្នោតបក្ខជនថ្មី ដែលបានដាក់ជំនួសបញ្ជីចុះឈ្មោះបោះឆ្នោតបក្ខជនចាស់ ដើម្បីមានឱកាសក្នុងការប្រកួតប្រជែងនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ នាថ្ងៃទី៥ ខែមិថុនា ឆ្នាំ២០២២ ខាងមុខនេះ។
ក្រោយពីបានស្តាប់ការឆ្លើយបំភ្លឺរបស់លោក វ៉ាត់ ធារិត តំណាងគណបក្សភ្លើងទៀត និងក្រោយពីបានពិភាក្សា ស្របតាមច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ បទបញ្ជា និងនីតិវិធីសម្រាប់ជ្រើសរើស ក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នេះរួច ក្រុមប្រឹក្សាជំនុំជម្រះបានសម្រេចដូចតទៅ៖
- យល់ព្រមចុះបញ្ជីបេក្ខជននៃគណបក្សភ្លើងទៀន នៅឃុំចំការអណ្តូង សង្កាត់វាលវង់ នៅសង្កាត់សំបួរមាស សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ លើសំណុំរឿងលេខ ០៧១, លេខ០៧២, លេខ ០៧៥។
- គណៈកម្មាធិការជាតិរៀបចំការបោះឆ្នោត ឃុំចំការអណ្តូង សង្កាត់វាលវង់ សង្កាត់សំបួរមាស ត្រូវផ្តល់ការ យល់ព្រមលើពាក្យសុំចុះបញ្ជីបេក្ខជន ជូនគណបក្សភ្លើងទៀន និងសេចក្តីសម្រេចរបស់គណៈកម្មការឃុំ សង្កាត់រៀបចំការបោះឆ្នោត (ទម្រង់បែបបទ ១០០៨) និងត្រូវចុះបញ្ជីបេក្ខជនជូនគណបក្សភ្លើងទៀន នៅ ឃុំចំការអណ្តូង ស្រុកចំការលើ សង្កាត់វាលវង់ និងសង្កាត់សំបួរមាស ក្រុងកំពង់ចាម ខេត្តកំពង់ចាម។
គណៈកម្មការរៀបចំការបោះឆ្នោត ឃុំ សង្កាត់ ខាងលើត្រូវចាត់ចែងបិទផ្សាយបញ្ជីបេក្ខជនដំបូងស្របតាម មាត្រា ៥៧ នៃច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់។
- តម្កល់សេចក្តីសម្រេចរបស់គណៈកម្មាការរៀបចំការបោះឆ្នោត ខេត្តកំពង់ចាម ទុកជាបានការ ដោយបដិ សេធការចុះបញ្ជីបេក្ខជនគណបក្សភ្លើងទៀន នៅសង្កាត់កំពង់ចាម សង្កាត់បឹងកុក ក្រុងកំពង់ចាម ក្នុងសំណុំរឿងលេខ ០៧៣, លេខ ០៧៤។
សេចក្តីសម្រេចរបស់ក្រុមប្រឹក្សាជំនុំជម្រះ ចំនួន៥ករណី ដែលពាក់ព័ន្ធនឹងសំណុំរឿងខាងលើនេះ ត្រូវបាន ក្រុមប្រឹក្សា នៃគ.ជ.ប ជំនុំជម្រះ និងប្រកាសជាសាធារណៈនៅចំពោះមុខដើមបណ្តឹង និងមេធាវីតំណាងជា សេចក្តីសម្រេចស្ថាពរ បិទផ្លូវតវ៉ា៕
https://kronglungvek.com.kh
Post a Comment