សម្តេចតេជោ ហ៊ុន សែន អញ្ជើញសម្ពោធជាផ្លូវការ អគាររដ្ឋបាល និង សាលប្រជុំទីស្តីការក្រសួងការពារជាតិ នេះ គឺចំខួបលើកទី២៣ឆ្នាំ នៃ ភាពជោគជ័យនូវសន្តិភាពពេញលេញ នៃនយោបាយឈ្នះ!ឈ្នះ! របស់ សម្តេច (២៩ ធ្នូ ១៩៩៨ និង ២៩ ធ្នូ ២០២១)

ភ្នំពេញ

ដោយៈ សេង ស៊ីដារ៉ូ

សម្តេចតេជោ ហ៊ុន សែន អញ្ជើញសម្ពោធដាក់ឱ្យប្រើប្រាស់ជាផ្លូវការ អគារ​រដ្ឋបាល និងសាលប្រជុំទីស្តីការក្រសួងការពារជាតិថ្មី ថ្ងៃទី២៩ ខែធ្នូ ឆ្នាំ២០២១នេះ ចំខួបលើកទី២៣ឆ្នាំនៃភាពជោគជ័យនូវសន្តិភាព​ពេញលេញតាមរយៈនយោបាយឈ្នះ!ឈ្នះ! របស់សម្តេច (២៩ ធ្នូ ១៩៩៨ និង ២៩ ធ្នូ ២០២១)។

នៅព្រឹកថ្ងៃទី៣០ ខែធ្នូ ឆ្នាំ២០២១ នៅវិមានឈ្នះឈ្នះក៏នឹងមានពិធីអប​អរ​សាទរខួបទី២៣ឆ្នាំ នៃការបញ្ចប់សង្គ្រាមស៊ីវិលនៅកម្ពុជា និងមាន​ការ​អនុវត្តប្រកបដោយជោគជ័យនយោបាយឈ្នះ ឈ្នះ របស់សម្តេច​តេជោ ហ៊ុន សែន នឹងប្រព្រឹត្តទៅក្រោមអធិបតីភាព សម្តេចពិជ័យសេ

នា ទៀ បាញ់ ឧបនាយករដ្ឋមន្ត្រីក្រសួងការពារជាតិ តំណាងដ៏ខ្ពង់ខ្ពស់​សម្តេចតេជោ ហ៊ុន សែន ផងដែរ។

អគាររដ្ឋបាល និងសាលប្រជុំទីស្តីការក្រសួងការពារជាតិថ្មីនេះ ត្រូវបាន​សាងសង់នៅលើទីតាំងចាស់ដែលមានទទឹងប្រវែង២៨ម៉ែត្រ បណ្តោយ​ប្រវែង ១៩១ម៉ែត្រ និងកម្ពស់ ៣២ម៉ែត្រ មានចំណតរថយន្តនៅជាន់​ក្រោ​មដីមួយជាន់ដែលអាចចតរថយន្តបានចំនួន១៥០គ្រឿង សរុបផ្ទៃក្រឡា​ប្រើប្រាស់រួម ទូទាំងអគារមាន ៣០,៩៧៩ម៉ែត្រការ៉េ (ស្មើនឹង១០ដង​នៃ​ទំហំអគារចាស់)។

អគាររដ្ឋបាល និងសាលប្រជុំទីស្តីការក្រសួងការពារជាតិថ្មី បានបើកការ​ដ្ឋាន​សាងសង់ កាលពីថ្ងៃទី៣០ ខែ មិថុនា ឆ្នាំ២០១៨ ក្រោមអធិបតី​ភាព​សម្តេចពិជ័យសេនា ដែលតាមគម្រោងផែនការសាងសង់មានរយៈពេល​៣៦ខែ និងបញ្ចប់ការដ្ឋាននៅថ្ងៃទី៣០ ខែមិថុនា ឆ្នាំ២០២១។

ដោយសារវិបត្តិកូវីដ១៩ ការសាងសង់ត្រូវបានស្នើសុំពន្យាកិច្ចសន្យា​រយៈ​ពេល៤ខែ ដូច្នេះការដ្ឋានត្រូវពន្យារហូតដល់ថ្ងៃទី៣០ ខែតុលា ឆ្នាំ២០២១ ទើបបានបញ្ចប់។

អគាររដ្ឋបាល និងសាលប្រជុំទីស្តីការក្រសួងការពារជាតិថ្មី ត្រូវបាន​បញ្ចូល​រចនាបទខ្មែរទៅក្នុងសោភ័ណភាពនៃសំណង់ ដែលមានរចនា​រៀបចំឱ្យមានស្លាបឆ្វេង ស្លាបស្តាំ និងតួកណ្តាលដែលយកដើមជ្រៃធ្វើ​ជាអ័ក្សដូចបណ្តាសំណង់បុរាណតែងតែកសាងមានអ័ក្សដូច្នោះដែរ។

អគាររដ្ឋបាល សាលប្រជុំទីស្តីការក្រសួងការពារជាតិថ្មីចែកចេញ​ជា៣​ផ្នែករួមមាន៖

១. ផ្នែកខាងកើត ឬ (ស្លាបឆ្វេង ) រៀបចំជាតំបន់ធានា និងការពារជាពិសេស (ពេលមានភ្លៀង) រៀបចំធ្វើជាបន្ទប់ប្រជុំតូច ធំ រៀបចំជាបន្ទប់សវនាការតូចធំ, រៀបចំទីធ្លាសន្និសីទកាសែត និងសាល​ប្រជុំធំដែលមានសមត្ថភាពធានារៀបចំអង្គប្រជុំចំណុះបាន ១,០០០នាក់ ដែលអាចធានាឱ្យរាល់ពិធីការ និងការប្រជុំថ្នាក់ជាតិ អន្តរជាតិនានា។

២. ផ្នែកកណ្តាល រៀបចំជាទីធ្លាបដិសណ្ឋារកិច្ច និងរង់ចាំទទួលភ្ញៀវ (Lobby) នៅជាន់ផ្ទាល់ដី, នៅទីធ្លាជាន់ទី១ រៀបចំជាទីធ្លាសម្រាប់ពិធីត្រួតពល កងកិត្តិយស ។

៣. ផ្នែកខាងលិច ឬ (ស្លាបស្តាំ) រៀបចំជាសាលពិព័រណ៍, ជាបន្ទប់រក្សាឯកសារ, ជាទីកន្លែងបម្រើការធានាសន្តិសុខ​សុវត្ថិភាពជា​កា​រិយាល័យធ្វើការថ្នាក់ដឹកនាំ ក្រសួងការពារជាតិ និងបណ្តាការិយា​ល័យ​សំខាន់ចាំបាច់មួយចំនួនផ្នែកខាងលិចនេះ មានចំនួន៦ជាន់ (គិតទាំងជាន់ផ្ទាល់ដីផង)។

នាយឧត្តមសេនីយ៍ ឈុំ សុផាត រដ្ឋលេខាធិការ និងជាអ្នកនាំពាក្យក្រ​សួ​ង​​ការពារជាតិ បញ្ជាក់ប្រាប់ឱ្យដឹងថា ពិធីសម្ពោធនេះត្រូវបាន​ប្រារព្ធ​ឡើ​ងចំនឹងខួបលើកទី២៣ឆ្នាំ នៃការបញ្ចប់សង្គ្រាមស៊ីវិលនៅកម្ពុជា និងការ​អនុ​វត្តប្រកបដោយជោគជ័យនូវនយោបាយឈ្នះ ឈ្នះ របស់សម្តេច​តេ​ជោ ហ៊ុន សែន ដែលក្រោមនយោបាយ ឈ្នះ ឈ្នះ នេះបានធ្វើឱ្យមាតុ​ភូមិ​កម្ពុជាទទួលបាននូវសន្តិភាព និងការឯកភាពជាតិពេញលេញរហូត​មកដល់សព្វថ្ងៃ ហើយសម្រាប់នៅយប់ថ្ងៃទី ២៩ ខែ ធ្នូ ឆ្នាំ ២០២១ ក្រ​សួងការពារជាតិក៏នឹងមានកម្មវិធីបាញ់កាំជ្រួចជាកិច្ចអបអរសាទរខួបទី២៣ឆ្នាំ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកប​ដោ​យ​​​ជោគ​ជ័យនយោបាយ ឈ្នះ ឈ្នះ របស់សម្តេចតេជោ ហ៊ុន សែន នៅ​វិមានឈ្នះឈ្នះផងដែរ៕

https://kronglungvek.com.kh