ឯកឧត្តម ហ៊ុន ម៉ានី បានលើកឡើងថា តាមរយៈរណសិរ្សសាមគ្គី​សង្រ្គោះ​ជាតិកម្ពុជានេះហើយ ដែលកម្ពុជាអាចឆ្លងផុតពីនរកអវចិយ៍ ពីរបប ៣ឆ្នាំ ៨ខែ ២០ថ្ងៃ (ជាកំណើតទី២)

ភ្នំពេញ

ដោយៈ សេង ស៊ីដារ៉ូ

កាលពីពេលថ្មីៗនេះ ឯកឧត្តម ហ៊ុន ម៉ានី បានលើកឡើងថា ការចូល​រួមគ្រប់ទិដ្ឋភាពនាពេលកន្លងមករបស់សហភាពសហព័ន្ធយុវជនកម្ពុជា គឺជា គុណតម្លៃរបស់សមាជិក សមាជិកា ទូទាំងប្រទេស ប្រមាណជាង ១៩ម៉ឺននាក់ នាពេលបច្ចុប្បន្នសម្រាប់បំរើសង្គមជាតិ។

យើងទាំងអស់គ្នាគឺជាសំឡេង និងជាកម្លាំងចលករមួយផ្នែកដ៏ខ្លាំង​ក្លា​របស់​ប្រជាជាតិកម្ពុជា។

សំឡេងយើងទាំងអស់គ្នានេះ ជាសំឡេងដែលបង្ហាញពីការជឿជាក់​លើ​ភាពវិជ្ជមាន និងអនាគតរុងរឿងនៃប្រទេសកម្ពុជា ដែលជាសក្តានុពល​របស់​យុវជនកម្ពុជា ក្រោមការដឹកនាំរបស់រាជរដ្ឋាភិបាលនាពេល​បច្ចុ​ប្បន្ន​ ដើម្បីឆ្ពោះទៅរកអនាគតដ៏ល្អ។

ឯកឧត្តម ហ៊ុន ម៉ានី បានលើកឡើងបន្តទៀតថា ការតាំងចិត្ត ការពុះពារ និងពលិកម្មរបស់អតីតយុវជនកម្ពុជានាពេលនោះ ជាពិសេស សម្តេច​តេជោ ហ៊ុន សែន ប្រធានស្ថាបនិករបស់យើង បានបង្កើត​សមាគម​យុ​វ​ជនសាមគ្គីសង្រ្គោះជាតិកម្ពុជា ដែលជាផ្នែកដ៏សំខាន់មួយ នៃរណសិរ្ស​សាមគ្គីសង្គ្រោះជាតិកម្ពុជា ក្រោមការដឹកនាំជារួមរបស់ សម្ដេច ជា ស៊ីម សម្ដេច ហេង សំរិន និងសម្ដេច ហ៊ុន សែន ក្នុងបេសកកម្មតែមួយគត់គឺ រំដោះជាតិ និងប្រជាជនកម្ពុជាចេញពីរបប ៣ឆ្នាំ ៨ខែ ២០ថ្ងៃ។

តាមរយៈរណសិរ្សសាមគ្គីសង្រ្គោះជាតិកម្ពុជានេះហើយ ដែលកម្ពុជា​អាច​​ឆ្លងផុតពីនរកអវចិយ៍ ហើយផ្ដល់កំណើតទី២ ដល់ប្រជាជនកម្ពុជា​គ្រប់ស្រទាប់វណ្ណៈ និងអាចអនុញ្ញាតឲ្យកម្ពុជាងើបឡើងពីចំណុចសូន្យ ដោយខិតខំស្តារ កសាង និងអភិវឌ្ឍន៍ គ្រប់វិស័យ ឲ្យមានភាពរីកចំរើន​រុងរឿងឡើងវិញ។

https://kronglungvek.com.kh