ក្រសួងអភិវឌ្ឍនជនបទ បើកព្រឹត្តិការណ៍រៀនសូត្រថ្នាក់ជាតិ ស្តីពីការចែករំលែក និងដកស្រង់បទពិសោធន៏ ការអនុវត្តកម្មវិធី​ផ្ទេរ​មុខងារ តាមបែបវិមជ្ឈការ

ភ្នំពេញៈ

ដោយ៖ ហុង ចំណាប់

 

លោក អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ និងលោក សួស គង់ រដ្ឋលេខាធិការប្រចាំការ បានអញ្ជើញ ចូលរួមបើកព្រឹត្តិការណ៍រៀនសូត្រថ្នាក់ជាតិស្តីពី ការចែករំលែក និងដកស្រង់បទពិសោធន៏ ការអនុវត្តកម្មវិធី​ផ្ទេរ​មុខងារ ផ្តល់សេវាអនាម័យជនបទតាមបែបវិមជ្ឈការ ដល់រដ្ឋបាលថ្នាក់ក្រោមជាតិ នៅសណ្ឋាគារសាន់វេ ។

កម្មវិធីនេះ មានកការចូលរួមពីលោកស្រី  Inga Elizabeth Hawley នាយិកាអង្គការអភិវឌ្ឍន៍ហូឡង់​ ប្រចាំ​ប្រទេស (SNV) ជាពិសេមានមន្រ្តីផ្ទេរមុខងារអនាម័យជនបទ មកពី​ខេត្តត្បូង​ឃ្មុំ កំពង់ស្ពឺ ​និងខេត្តកំពង់​ឆ្នាំង ចំណែកថ្នាក់ដឹកនាំមន្ទីរអភិវឌ្ឍន៏ជនបទ ខេត្តត្បូងឃ្មុំ កំពង់ស្ពឺ កំពង់ឆ្នាំង កែប ស្វាយរៀង និង​ខេត្ត​ព្រៃវែង ព្រមទាំងអាជ្ញាធរស្រុក ទទួលបន្ទុកជាថ្នាក់ដឹកនាំគណៈកម្មការគ្រប់គ្រងទឹកស្អាត និងអនាម័យស្រុក សរុប​ចំនួន ៧២នាក់ភ្នំពេញ ថ្ងៃទី០៧ ខែសីហា ឆ្នាំ២០១៩ ។

លោកស្រី Inga Elizabeth Hawley នាយិកានៃអង្គការអភិវឌ្ឍន៍ហូឡង់ មានចំណាប់​អារម្មណ៍ និងផ្តល់នូវ​យុទ្ធសាស្រ្តគន្លឹះ ពាក់ព័ន្ធនឹងព្រឹត្តិការណ៍រៀនសូត្រថ្នាក់ជាតិ​ ស្តីពីការចែករំលែក និងដកស្រង់​បទ​ពិសោធន៏​ការអនុវត្តកម្មវិធីផ្ទេរមុខងារ ផ្តល់សេវាអនាម័យជនបទ តាមបែបវិមជ្ឈការដល់រដ្ឋបាលថ្នាក់ក្រោមជាតិនេះ។

លោក សួស គង់ បានថ្លែងនូវអំណរគុណ ចំពោះវត្តមានរបស់សិក្ខាកាមទាំងអស់ ក្នុងអង្គសិក្ខា​សាលា នាថ្ងៃ​នេះ ដែលបានចូលរួម ក្នុងគោលបំណង​ចែករំលែក និងដកស្រង់មេរៀន បទពិសោធន៏ តាមរយៈជំនួយការ​បច្ចេកទេស ក្នុងការអនុវត្តគម្រោងផ្ទេរមុខងារអនាម័យជនបទ តាមបែបវិមជ្ឈការ​ដល់ថ្នាក់ក្រោមជាតិ​ ទាំង​ដំណាក់​​​កាលទី១ និងទី២​ ដើម្បីរកឲ្យឃើញនូវភាពជោគជ័យ បញ្ហាប្រឈម ព្រមទាំងយន្តការសម្រប​សម្រួ​ល​​របស់ក្រុមការងារវិមជ្ឈការ និងវិសហមជ្ឈការរបស់ក្រសួង​អភិវឌ្ឍន៍​ជនបទ អង្គភាព​វិភាគ​និងអភិវឌ្ឍន៍​គោល​នយោបាយ នៃលេខាធិការដ្ឋានគណៈកម្មាធិការជាតិ សម្រាប់ការអភិវឌ្ឍតាមបែបប្រជា​​ធិបតេយ្យ​នៅថ្នាក់ក្រោមជាតិ (គ.ជ.អ.ប) និងអគ្គនាយកដ្ឋានរតនាគារជាតិ នៃក្រសួងសេដ្ឋកិច្ច និង​ហិរញ្ញវត្ថុ។

លោក សួស គង់ រដ្ឋលេខាធិការប្រចាំការ បានបញ្ជាក់ថា​ ការអនុវត្តការផ្តល់សេវាអនាម័យជនបទ​ តាមបែប​វិមជ្ឈការ​នេះ គឺផ្តើមចេញពីយុទ្ធសាស្រ្តចតុកោណ ដំណាក់កាលទី៣ និងទី៤ ដើម្បីកំណើន ការងារ សមធម៌ និងប្រសិទ្ធភាព របស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត របស់សម្តេចតេជោ ហ៊ុន សែន ដើម្បីកសាងមូលដ្ឋានឆ្ពោះទៅសម្រេចចក្ខុវិស័យកម្ពុជា ឆ្នាំ​២០៥០។​ ផ្តើម​ចេញ​ពីយុទ្ធសាស្រ្ត ដែល​មាន​​​លក្ខណៈគ្រប់ជ្រុងជ្រោយនេះ នៅក្នុងឆ្នាំ២០១៤ រាជរដ្ឋាភិបាលនៃព្រះរាជា​ណាចក្រ​កម្ពុជា បានអនុម័ត​ផែន​ការយុទ្ធសាស្រ្តជាតិ សម្រាប់ការផ្គត់ផ្គង់ទឹកស្អាត និងអនាម័យជនបទ ​ឆ្នាំ២០១៤-២០២៥ ដែលបាន​កំណត់​ថា នាឆ្នាំ២០២៥ ការគ្របដណ្តប់វិស័យអនាម័យជនបទ ត្រូវធានាឲ្យបាន ១០០% ​ដល់​ប្រជា​ពល​រដ្ឋ​ទូទាំងប្រទេស។         

ក្រសួងអភិវឌ្ឍន៍ជនបទ ដែលមានក្រុមការងារ​វិមជ្ឈការ និងវិសហ​មជ្ឈការ ទទួលស្គាល់ថា ​គោលនយោបាយ​កំណែទម្រង់វិមជ្ឈការ និងវិសហមជ្ឈការ​របស់​រាជ​រដ្ឋាភិបាល ពិតជាមានរបៀបវារៈ​ដ៏សំខាន់ក្នុងការពង្រឹង និង​បង្ខិតការផ្តល់សេវាជូនដល់ប្រជាពលរដ្ឋ ឲ្យ​កាន់​​​តែមានប្រសិទ្ធភាព មានគុណភាព ទាន់ពេលវេលា មាន​តម្លាភាព និងមានគណនេយ្យភាព តាមរយៈ​ការ​ធ្វើ​ប្រតិភូកម្ម​មុខងារ ពីក្រសួងសា្ថប័នថ្នាក់ជាតិ ទៅឲ្យរដ្ឋ​បាល​ថ្នាក់ក្រោមជាតិ។

ការកំណែទម្រង់វិមជ្ឈការនៅកម្ពុជា ពាក់ព័ន្ធនឹងការផ្ទេរតួនាទី ភារកិច្ច និង​ធន​ធានទៅថ្នាក់ស្រុក និងឃុំ ដើម្បីឲ្យរដ្ឋបាលថ្នាក់ក្រោមជាតិ អាចអនុវត្តមុខងារសមស្រប ឆ្លើយតប​នឹង​តម្រូវ​ការ​​ជាអាទិភាពរបស់​ប្រជា​ពលរដ្ឋ នៅក្នុងដែនសមត្ថកិច្ចរបស់ខ្លួន។ វិមជ្ឈការមុខងារ នៃការផ្តល់សេវា​អនាម័យ​ជនបទ ត្រូវបានសាក​ល្បង ពីរដំណាក់កាល ដោយទទួលបាននូវការគាំទ្រ​មូលនិធិពីធនាគារពិភពលោក គឺ  ដំណាក់​​កាលទី១​ នៅ​ឆ្នាំ​២០១៦-២០១៧ និងដំណាក់កាលទី២ ក្នុងឆ្នាំ២០១៨-២០១៩ ដោយ​មាន​ការ​គាំទ្រ​ជំនួយ​​បច្ចេកទេស​ពីអង្គការអភិវឌ្ឍន៏ហូឡង់ SNV។

លោក សួស គង់ បានបញ្ជាក់បន្ថែមទៀតថា ចក្ខុវិស័យលើការលើកកម្ពស់​វិស័យ​ទឹក​ស្អាត និងអនាម័យជន​បទ​នៅកម្ពុជា និងសម្រេចឲ្យបាន ១០០% ត្រឹមឆ្នាំ២០២៥ ដូច្នេះ ដើម្បីសម្រេចបាន​នូវ​គោល​ដៅនេះសូមឲ្យ តំណាងរដ្ឋបាលខេត្ត មន្ទីរ​អភិវឌ្ឍន៍​​ជនបទខេត្ត គណៈកម្មការគ្រប់គ្រង​ទឹក​ស្អាត និងអនាម័យជនបទ​ស្រុក និងក្រុមប្រឹក្សាឃុំទាំងអស់ ត្រូវ​បន្ត​អនុវត្តយន្តការអនាម័យ ដែលមានស្រាប់​ឲ្យទទួលជោគជ័យសំដៅពង្រីក និងបង្កើនចំនួន​ភូមិ ឃុំ ស្រុក និងខេត្ត ដែលបាន​បញ្ឈប់​ការបន្ទោរបង់ ពាសវាស​ពាស​កាល ​ឲ្យបានទូទាំង​ប្រទេស៕