កសិករ​ ក្នុងខេត្តមណ្ឌលគីរី បានដាំត្រសក់ផ្អែមជប៉ុន និងក៏ជាពូជ​មានតម្លៃខ្ពស់ ក្នុងទីផ្សារទំនើប

ខេត្តមណ្ឌលគីរីៈ


ដោយ៖ សេង ស៊ីដារ៉ូ

មានប្រជាកសិករ ក្នុងខេត្តមណ្ឌលគីរី បានដាំពូជត្រសក់ផ្អែម ដែលធ្វើការនាំចូលពីប្រទេសជប៉ុន ​និងគឺជាពូជ​មានតម្លៃខ្ពស់ ក្នុងទីផ្សារទំនើប។

លោក រ៉ាដូ អ្នកបច្ចេកទេសដាំដំណាំកសិកម្ម នៅខេត្តមណ្ឌលគីរី បានឲ្យដឹងថា ក្នុងការដាំត្រសក់ផ្អែមពូជ​របស់​ជប៉ុន ហើយក៏ជាពូជធម្មតា បើយើងដាំនៅក្នុងផ្ទៃ ១ហិកតា អាចទទួលផលបានពី ២៥តោន ទៅ៣០​តោន និងទទួលផលបានក្នុងរយៈពេល៦០ថ្ងៃ។

លោក រ៉ាដូ បានបន្តថា ត្រសក់ផ្អែមនេះ លក់ចេញបានតម្លៃក្នុង១គីឡូថ្លៃ ៥០០០រៀល ទៅ៦០០០រៀល។ ចំពោះការដាំដុះត្រសក់ផ្អែម ពូជពីជប៉ុននេះ វាអាស្រ័យទៅលើបច្ចេកទេស និងមួយទៀត ​នៅក្នុងរដូវវស្សា​ត្រូវការថែទាំ មិនឲ្យមានសត្វល្អិតបំផ្លាញឡើយ។ លោក រ៉ាដូ បានបញ្ជាក់ទៀតថា មានពូជត្រសក់ផ្អែមមួយ​ទៀត ​​ដែលជាពូជឈ្មោះថា ត្រសក់ផ្អែមសំណាញ់ មានតម្លៃខ្ពស់ក្នុងទីផ្សារទំនើប ដោយក្នុងមួយផ្លែ (១.៥គីឡូ) បាន​ថ្លៃចាប់ពី១៥ដុល្លារទៅ២០ដុល្លារ តែបើឈ្មួយយកទៅលក់បន្តអាចបានថ្លៃរហូតដល់១ផ្លែ ៣៩ដុល្លារទៅដល់៤០ដុល្លារ ដោយសារតែពូជត្រសក់ផ្អែមនេះ មានរស់ជាតិផ្អែមឈ្ងុយឆ្ងាញ់​ទើបមានការ​ចំណាប់​អារម្មណ៍ពីអតិថិជនច្រើន ក្នុងការទទួលទាន៕