លោកបណ្ឌិត លី រស្មី បានបោះពុម្ពផ្សាយសៀវភៅពុទ្ធវចនាធិប្បាយ ភាគ១ មុនគេនៅកម្ពុជា

ភ្នំពេញៈ

ដោយ៖ សេង ស៊ីដារ៉ូ

សៀវភៅពុទ្ធវចនាធិប្បាយ ជាវចនានុក្រមដំបូងគេ ដែលបកស្រាយលើការពុទ្ធធិប្បាយ និងបង្ហាញពាក្យ លំបាក​ក្នុង​វេយ្យាករណ៍ដើម្បីអោយងាយអានសម្រាប់ព្រះសង្ឃ និងពុទ្ធបរិស័ទ្ធ បានបោះពុម្ពចេញផ្សាយហើយ។

ពុទ្ធវចនាធិប្បាយភាគ១នេះ ចងក្រងឡើងដោយស្នាដៃ លោកបណ្ឌិត លី រស្មី ដែលប្រើរយៈពេលអស់ ១០ឆ្នាំ​ទម្រាំ​​បានចេញជារូបរាងសៀវភៅនេះឡើង ដោយចំណាយពេលដ៏យូរ រួមទាំងថវិកាផ្ទាល់ខ្លួនជិត៣ម៉ឺន​ដុល្លារ​ផង​ដែរ ក្នុងការបោះពុម្ពសៀវភៅពុទ្ធវចនាធិប្បាយនេះឡើង។

លោកបណ្ឌិត លី រស្មី បានបញ្ចប់បណ្ឌិតផ្នែកស្ថាបត្យកម្ម ១១ឆ្នាំ តែដោយសារការចូលចិត្តស្រលាញ់ ​បានចង ក្រងសៀវភៅពុទ្ធវចនាធិប្បាយអស់រយៈពេល១០ឆ្នាំ តាំងពីរនៅរៀនដំបូងមកម្លេះ។

សៀវភៅនេះ​មានកំរាស់​១៨៨១ទំព័រ អាចមានទំព័រច្រើនជាងវចនានុក្រម ខ្មែររបស់សម្តេចសង្ឃរាជ ជួន ណាត ទៅទៀត ដោយក្នុង​នោះ​​មាន​បែងចែកចេញពីអក្សរ ក ដល់អក្សរ ម ជាភាគ១ សិន ចំពោះអក្សរ យ រហូតដល់អក្សរ អ ជាភាគ២ មិនទាន់បោះពុម្ពផ្សាយបានទេ ព្រោះមិនទាន់មានលទ្ធភាពគ្រប់គ្រាន់នៅឡើយ។

លោកបណ្ឌិត បានបន្តទៀតថា វចនាធិប្បាយនេះ ប្រមូលផ្តុំទៅដោយគ្រូមានបទពិសោធន៍ ក្នុងពុទ្ធកៈសីហនុរាជ​ មានគណៈកម្មការត្រួតពិនិត្យ១០នាក់ មុននឹងចេញបោះពុម្ពផ្សាយ។ នៅក្នុងការបោះពុម្ពផ្សាយលើកទី១នេះ មាន​ចំនួន​៣០០០ក្បាល ក្នុងតម្លៃលក់ចេញ ១ក្បាល ២០ដុល្លារ។


លោកបណ្ឌិត លើឡើងទៀតថា សៀវភៅនេះមានអត្ថប្រយោជន៍ច្រើន ដល់ព្រះសង្ឃ និងពុទ្ធបរិស័ទ្ធ​ដែលអាច​ឲ្យយល់នូវពាក្យបាលីវេយ្យករណ៍លំបាកៗ និងពិសេស ដល់ព្រះសង្ឃក្នុងការទេសនា រៀនសូត្រពីផ្លូវព្រះធម៌។ នៅពេលរូបលោក ធ្វើការបោះពុម្ពផ្សាយចេញភ្លាម មានការគាំទ្រច្រើនចេញពីព្រះសង្ឃ និងពុទ្ធបរិស័ទ្ធ ហើយក៏​មាន​ការកម្ម៉ង់ពីប្រជាពលរដ្ឋ ដែលរស់នៅក្រៅប្រទេសជាច្រើនទៀត៕