សិប្បកម្មផលិតពពុះសណ្តែក ក្នុងស្រុកស្ទឹងត្រង់ កំពុងល្បីលើទីផ្សារ

 ខេត្តកំពង់ចាម

ដោយ៖ ឌឹម គឹមហាក់

 

សិប្បកម្មផលិតពពុះសណ្តែក ស្រុកស្ទឹងត្រង់ បានបង្កើតឡើងដើម្បីបង្ហាញនូវការផលិតរបស់ខ្លួននៅក្នុងទីផ្សារ នៃប្រទេសកម្ពុជា ហើយពីមុនពពុះសណ្តែក ភាគច្រើនតែងតែនាំចូល ពីក្រៅប្រទេស​ ទើបតែរយៈពេលថ្មីៗនេះ មានសិប្បកម្មជាលក្ខណៈគ្រួសារ បានបង្កើតឡើងដើម្បីលើកស្ទួយពីស្នាដៃរបស់ខ្មែរស្រុក សុទ្ធសាធ​ និងកាត់​បន្ថយ​ការនាំចូលពីប្រទេសជិតខាង។

សិប្បកម្មពពុះសណ្តែកនេះ ផលិតចេញមកពីសណ្តែកសៀងសុទ្ធៗ ដោយការចំអិនគ្មានប្រើជាតិគីមីនោះឡើយ ដោយក្នុងមួយថ្ងៃៗ អាចផលិតបានចំនួន២០គីឡូក្រាម ដោយប្រើប្រាស់សណ្តែកអស់ ចំនួន៦០គីឡូ។

លោក ថែន ភា ម្ចាស់សិប្បកម្មផលិតពពុះសណ្តែក ជាលក្ខណៈគ្រួសារ​ រស់នៅភូមិព្រះអណ្តូង ស្រុកស្ទឹងត្រង់ ខេត្តកំពង់ចាម ដែលទើបតែផលិតពពុះសណ្តែកដំបូងក្នុងទីផ្សារក្នុងស្រុក។ ពពុះសណ្តែកនេះ​ ផលិតចេញ​មក​ពីសណ្តែកសៀង ដោយការចំអិនគ្មានប្រើជាតិគីមីនោះឡើយ ដោយក្នុងមួយថ្ងៃៗ​ សិប្បកម្មផលិត​ពពុះសណ្តែក​គឺផលិតបានចំនួន២០គីឡូ ដោយប្រើប្រាស់សណ្តែកអស់ ចំនួន៦០គីឡូ។

លោក ថែន ភា បានបន្តថា ការចំអិនពពុះសណ្តែកនេះ ក៏ត្រូវការៀនពីជំនាញនេះឲ្យបានច្បាស់លាស់ (គឺត្រូវ ការចំណាយពេលវេលា និងថវិកា រៀនសូត្រអស់៥០០ដុល្លារ ដើម្បីបង្កើតមុខរបរមួយនេះ)។ ការផលិតពពុះ សណ្តែកគ្រាដំបូង គឺការដាក់សណ្តែកសៀងក្នុងខ្ទះ ដើម្បីរំងាស់ដងយកតែពពុះសណ្តែកសៀងរួច ទើបយើង​យក​ទៅ​ហាល១ព្រឹក ជាការស្រេច ដោយនៅពេលដែលពពុះសណ្តែកស្ងួតជាផ្ទាំងៗ។ ពពុះសណ្តែក​ក្លាយ​ជា​គ្រឿង​ផ្សំសម្លរដូចជាឆា សម្លរចាប់ឆាយ ឬដាក់ក្នុងស៊ុបធ្វើឲ្យម្ហូបអាហារ​មានរស់ជាតិមួយកំរិតថែមទៀត ​ដោយ​សារ​​​ពពុះសណ្តែក​នេះដែរ។ តាមរយៈជនជាតិចិន គេច្រើនហៅពពុះសណ្តែក ថាហុកគី ដែលបងប្អូនយើង​និយម​​ទទួលទានច្រើន។ ពពុះសណ្ដែកក្នុងស្រុកលក់ចេញ ១៦០០០​៛ ក្នុង១Kg ហើយឈ្មួញលក់បន្តថ្លៃ ១៧០០០៛ ឬ ២០០០០៛ ។

ហុកគី ឬពពុះសណ្តែក ជាត្រូវការលើទីផ្សារខ្ពស់ ហើយលំហូរមកពីប្រទេសជិតខាង មានប្រទេសវៀតណាម ថៃ និងចិន ហើយបច្ចុប្បន្នតំរូវការច្រើនក្នុងម្ហូបអាហារស៊ុប ដែលមានអ្នកទទួលទានច្រើន។

ទើប លោក ថែន ភា បង្កើត​​នូវ​សិប្បកម្មផលិតពពុះសណ្តែកនេះឡើង ពុំមែនបំរើចំពោះតែ ស្រុកស្ទឹង​ត្រង់​នោះទេ ពោលគឺមានមហិច្ឆិតា ចង់ពង្រីកមុខរបរនេះចូលដល់រាជធានីភ្នំពេញតែម្តង។ លោក ភា បានបន្តទៀត​ថា គោលបំណង​​ នៃការបង្កើតសិប្បកម្មពពុះសណ្តែកនេះ​ សំដៅវាយលុកទីផ្សារទី២​ កាត់បន្ថយ​លំហូរចូល​ផលិតផល​ពីក្រៅប្រទេស ទី៣ជួយកាត់បន្ថយពពុះសណ្តែក​ពីក្រៅ ដែលប្រើជាតិ​គីមីច្រើនពិសេសការពារផល​ប្រយោជន៍សុខភាពដល់កុមារដែលទទួលទាន ទី៤ជួយឲ្យប្រជាពលរដ្ឋយើង ក្នុងមូលដ្ឋានមានការងារធ្វើ មិន​​​ធ្វើ​ចំណាកស្រុក ទី៥ បានជួយទិញកសិផលសណ្តែកសៀង ដែលប្រជាកសិករយើង ក្នុងមូលដ្ឋានផលិតបាន និង​មាន​តម្លៃសមរម្យ៕