រដ្ឋមន្ត្រីក្រសួងអភិវឌ្ឍន៍ជនបទ បាននាំយកអំណោយរបស់សម្តេច ហ៊ុនសែន ចែកជូន​ប្រជាពលរដ្ឋ ក្នុងវិធីបញ្ចុះសីមាព្រះវិហារ វត្តសិរីវង្សារាម

ខេត្តកំពង់ឆ្នាំងៈ


ដោយ៖ ឌឹម គឹមហាក់

 លោក អ៊ុករ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ តំណាងដ៍ខ្ពង់ខ្ពស់សម្ដេច ហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតី ក្នុងពិធីបុណ្យបញ្ចុះខ​ណ្ឌ​សីមាព្រះវិហារ និង សម្ភោធ​​ដាក់ឲ្យប្រើប្រាស់សមិទ្ធិផលនានា ក្នុងវត្តសិរីវង្សារាម (ហៅវត្ត ត្រពាំងវែង) ស្ថិតក្នុងភូមិមាន​កកើត ឃុំត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង នាព្រឹកថ្ងៃទី៣១ ខែមិនា ឆ្នាំ២០១៩។

ឯកឧត្តម ឈួរ ចាន់ឌឿន អភិបាលខេត្តកំពង់ឆ្នាំង បានឲ្យដឹងថា វត្តសិរីវង្សារាមនេះ បានចាប់ផ្តើម​កសាងតាំងពីឆ្នាំ១៩១២ មកម្លេះ ដែលដើមឡើយមានឈ្មោះថា វត្តត្រពាំងវែង។ នៅក្នុងសម័យ កាល​នោះ​ទីអារាមនេះ មានតែកុដិ៣ខ្នងប៉ុណ្ណោះ។ មកដល់ឆ្នាំ១៩៤៥ ព្រះសង្ឃ និងពុទ្ធបរិស័ទ រួម​គ្នា​កសាង​បានកុដិ ៥ខ្នង និងសាឡំមួយ សំរាប់បំបួសព្រះសង្ឃ និងធ្វើឧបោសថកម្ម។ សមិទ្ធផល​ក្នុងវត្តនេះ ត្រូវបានបំផ្លាញ និងបោះបង់ចោល ក្នុងរបបលន់ណុល និងរបបខ្មែរក្រហម។

រយៈពេល៥ឆ្នាំ បន្ទាប់ពីប្រទេសជាតិ ត្រូវបានរំដោះចេញពីរបបប្រល័យពូជសាសន៍ គឺនៅឆ្នាំ១៩៨៤​វត្តនេះ ត្រូវបានផ្តើមកសាងឡើងវិញ ជាបន្តបន្ទាប់។ ដោយឡែក ព្រះវិហារ និងសមិទ្ធិផលនានា ក្នុង​វត្ត ដែលត្រូវធ្វើពិធីបញ្ចុះខណ្ឌសីមា និងសម្ពោធដាក់ឲ្យប្រើប្រាស់នៅពេលនេះ បានចំណាយ ថវិកាស​រុប ក្នុងការសាងសង់អស់ចំនួន​ ១២ ១៥៨៦ ដុល្លាអាមេរិក ក្នុងនោះព្រះវិហារ មានទំហំ១២ គុណនឹង​១៩ម៉ែត្រ ត្រូវបានចាប់សាងសង់នៅឆ្នាំ២០០៨ និងរួចរាល់ជាស្ថាពរ នៅឆ្នាំ២០១៧ ដោយចំណាយ​អស់ ៨ ២៤៤៤ ដុល្លអាមេរិក។

លោក អ៊ុករ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានកោតសរសើរចំពោះការខិតខំប្រឹងប្រែង របស់​អាជ្ញាធរ គ្រប់លំដាប់ថ្នាក់ ព្រះចៅអធិកាវត្ត សប្បុរសជន និងពុទ្ធបរិស័ទទាំងអស់ ដែលបានរួមសាម​គ្គីគ្នា ក្នុងការកសាងព្រះវិហារ និងសមិទ្ធផលនានា ក្នុងវត្តនេះឡើង សំរាប់ជាទីសក្ការៈ នៃពុទ្ធសាស​និកជន​ទូទៅ ហើយសមិទ្ធផលនេះ គឺបានបង្ហាញឲ្យឃើញពីការរីកចំរើនលើវិស័យ ព្រះពុទ្ធសាសនា ដែលជាសាសនារបស់រដ្ឋ។ ទាំងផ្នែកពុទ្ធចក្រ និងអាណាចក្រអាចរីកចំរើន ទៅបានដោយសារ​តែ​ប្រទេស​ជាតិយើង មានសុខសន្តិភាពពេញលេញ តាមរយៈការអនុវត្តនយោបាយឈ្នះៗ របស់សម្ដេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

លោក រដ្ឋមន្ត្រី បានបញ្ជាក់ជូនប្រជាពលរដ្ឋដែរថា នៅក្នុងវេទិការាជរដ្ឋាភិបាល-ផ្នែកឯកជន​ កាលពី​ពេលថ្មីនេះ សម្តេចតេជោ បានសម្រេចធ្វើការកែប្រែការងារមួយចំនួន របស់ស្ថាប័នរដ្ឋ ដើម្បីជួយ​សម្រួល​ដល់អ្នក​វិនិយោគ ក្នុងការបណ្តាក់ទុនរកស៊ីនៅកម្ពុជា ក្នុងន័យបន្តរក្សាកំណើនសេដ្ឋកិច្ច កម្ពុ​ជា ដើម្បីរួមចំណែកកាត់បន្ថយ ភាពក្រីក្រ របស់ប្រជាពលរដ្ឋ។

លោករដ្ឋមន្ត្រី បានណែនាំដល់អាជ្ញាធរគ្រប់លំបាប់ថ្នាក់ត្រូវមានវិធាន ការក្នុងការគ្រប់គ្រងរក្សាទឹកទុក ទាំងសំរាប់ទទួលទាន និងប្រើប្រាស់ក្នុងរដូវប្រាំងនេះ និងចូលរួមអនុវត្តន៍ នូវកម្មវិធីរបស់ក្រសួង​អភិវឌ្ឍ​​​ជន​បទ គឺកម្មវិធីលប់បំបាត់ការបន្ទោបង់ពាសវាលពាសកាល ដើម្បីកាត់បន្ថយបាននូវជំងឺ​ផ្សេង​ៗ ​ ព្រមទាំងរួមចំណែកលើកកំពស់សុខមាលភាព និងកិត្តិយសសង្គមជាតិទាំងមូល។

បន្ទាប់ពីបានបំពាក់មេដាយស្ថាបនាជាតិ ប្រគេនព្រះសង្ឃ និងសប្បុរសជននានា ដែលបានរួមចំណែក​ជាវិភាគទាន ជួយកសាងសមិទ្ធិផលក្នុងវត្តនេះរួចមក លោករដ្ឋមន្ត្រី បាននាំយកអំណោយរបស់ សម្ដេច នាយករដ្ឋមន្ត្រី និងសម្តេចកិតិ្តព្រឹទ្ធបណ្ឌិត ប្រគេនព្រះសង្ឃ៣០អង្គ ក្នុង១អង្គសាដក១​និងបច្ច័យ៥ម៉ឺនរៀល ជូនលោកគ្រូ អ្នក គ្រូ៥៤នាក់ ម្នាក់ៗ ថវិកា២ម៉ឺនរៀល​ សិស្សានុសិស្ស៣៨៩​នាក់ យុវជនកាកបាទក្រហមកម្ពុជា និងយុវជន កាយរិទ្ធិ ចំនួន៤០នាក់​ម្នាក់ៗ​សៀវភៅ២ក្បាល ប៊ិច១ដើម ថវិការ១ម៉ឺនរៀល សិស្សសាលាបឋមសិក្សាចំនួន ១៧៥៧នាក់ម្នាក់ សៀវភៅ១ក្បាល ថវិកា១ពាន់រឿល ជូនតាជីយាយជី២០០នាក់ម្នាក់ៗ ក្រណាត់ស១ដុំថ វិកា១ម៉ឺនរៀល កងកំលាំង សម្ថកិច្ចនគរបាលស្រុក៤៥នាក់ ប៉ុស្តិ៍នគរបាលរដ្ឋបាលត្បែងខ្ពស់ ៦នាក់ កងរាជអាវុធហត្ថ១៥នាក់ យោធាសឹករង ៥នាក់ និងប្រជាការពារឃុំ៤៥នាក់ ក្នុងម្នាក់ៗ២ម៉ឺនរៀល ពិធីកាស្រុក៦នាក់ ម្នាក់ៗ២​ម៉ឺនរៀល ក្រុមពេទ្យ៥នាក់ម្នាក់ៗ២ម៉ឺនរៀល និងប្រគេនបច្ច័យឧបត្ថមទិសទាំង៨ ក្នុងទិសនីមួយៗ​ថវិកា៣០ម៉ឺនរៀល ដោយឡែកទិសឥន្ធកិល​ ថវិកា២លានរៀល។

ក្នុងឱកាសនេះដែរ លោករដ្ឋមន្ត្រី បានប្រគេនបច្ច័យ ដែលជាសុទ្ធាជ្រះថ្លា របស់លោកផ្ទាល់ និងក្រុម​គ្រួសារ រួមជាមួយសប្បុរសជនសរុបចំនួន ៤៥លាន ៩៨០០០០រៀល​ប្រគេនដល់ព្រះសង្ឃ​វត្ត​​សិរីវង្សា​រាម​សំរាប់កសាងសមិទ្ធិផលនានា​ក្នុងវត្តបន្តទៀត។​


បន្ទាប់មកគណអធិបតី បានបន្តអញ្ជើញកាត់ខ្សែបូរ និងឡើងលើព្រះវិហារប្រារព្ធកិច្ចតាមប្រពៃណី ព្រះ​​​ពុទ្ធសាសនា និងកាត់ឬស្សសីមាបើកឲ្យប្រើប្រាស់ ជាផ្លូវការនូវព្រះវិហារ និងសមិទ្ធិផលនានា​ចាប់​ពី​​ពេលនេះតទៅ៕