ដំណាំល្ហុង ងាយស្រួលដាំ ចំណាយរយៈពេលខ្លី និងបានផលច្រើន ទីផ្សារពេញនិយមទទួលទាន

ខេត្តកណ្តាលៈ

ដោយ៖សេងស៊ីដារ៉ូ

រាល់ថ្ងៃផ្លែល្ហុង មានតម្រូវការជាចាំបាច់នៅក្នុងទីផ្សារ ទើបកសិករយើងខិតខំដាំដុះគ្រប់រដូវកាល ព្រោះតែដំណាំ​ល្ហុងនេះងាយស្រួលដាំ ចំណាយរយៈពេលខ្លី និងបានផលច្រើន។

លោក ទូច លី កសិករដាំដំណាំល្ហុងនៅស្រុកកោះធំ ខេត្តកណ្តាល បានរៀបរាបថា កន្លងមក​ដំណាំ​ល្ហុងដាំ​ក្នុង​មួយហិកតា ទទួលបានផលពី២០តោន ទៅ ២៥តោន ក៏ប៉ុន្តែមកដល់បច្ចុប្បន្ននេះ មានការប្រែប្រួលច្រើន ដោយ​​​ដាំក្នុង១ហិកតាបានផលតែ ១០ទៅ១៥តោនប៉ុណ្ណោះ។ ដោយឡែកទីផ្សារផ្លែល្ហុង បើលក់ពីដើមដៃ បាន​ថ្លៃ​​១០០០រៀល ក្នុង១គីឡូ ហើយពេលដែលសម្បូរអាចធ្លាក់ថ្លៃបន្តិចបន្តួច។


ការបណ្តុះកូនល្ហុងត្រូវប្រើរយៈពេល១ខែឡើងទៅ ទើបអាចយកមកដាំបាន ហើយត្រូវធ្វើការថែទាំដោយបោច ស្មៅ ថែរក្សាគល់ និងស្រោចទឹកដាក់ជីប្រចាំ។ ជាទម្លាប់ទូទៅនៅតំបន់ខ្លះ គេដាំតាមវាលទំនាប់​ដោយចាប់ផ្តើម​ដាំតាំងពីខែវិច្ឆិកា រហូតដល់ខែមេសា ទើបដើមល្ហុងទទួលបានផលផ្លែ ជាលើកដំបូងរហូតដល់ទឹកលិចចំការវិញ ឬបើទឹកទន្លេមិនឡើងមិនលិចទេ ក៏ដើមល្ហុងនៅតែផ្តល់ផលដដែល៕