ត្រប់មានប្រភពកំណើតនៅតំបន់អាស៊ីដូចជា៖ នៅប្រទេសចិន ឥណ្ឌា និង​ទ្វិបអាហ្រិ្វក ប៉ុន្តែ ក្រោយមករីករាលដាលដល់ទ្វិបអាមេរិក និង​ពេញពិ​ភពលោក

 ដោយៈ សេង ស៊ីដារ៉ូ

ត្រប់ជាដំណាំមួយ ដែលប្រជាជននៅលើពិភពលោកតែងតែបានស្គាល់ និងប្រើប្រាស់ធ្វើម្ហូបអាហារប្រចាំថ្ងៃ យ៉ាងប្រជាប្រិយបំផុតចាប់តាំង​ពី​សតវត្សទី១៦មកម្លេះ។

នៅឆ្នាំ១៧៥៣ ក្រុមអ្នកវិទ្យាសាស្រ្ដជាច្រើនបានកំណត់ ប្រភេទរុក្ខជាតិ​នេះ​នៅក្នុង​គ្រួសារ (សូឡាណាសេ) លំដាប់សូឡានូម។ ហើយមាន​ឈ្មោះ​​​វិទ្យាសាស្រ្តហៅថា Solanum Melongena L. ប៉ុន្តែវាក៏មាន​ឈ្មោះ​ផ្សេងៗទៀតជាច្រើនដូចជា នៅឆ្នាំ ១៧៧៥ អ្នកវិទ្យាសាស្រ្ត ឈ្មោះ Forsskal បានអោយឈ្មោះថា Solanum Caglans និងនៅឆ្នាំ១៨៥២ អ្នក​ប្រាជ្ញឈ្មោះ Dun Dunal បានអោយឈ្មោះថា Solanum Pressum។

នៅក្នុងប្រភេទដំណាំត្រប់មានច្រើនប្រភេទដូចជា៖

១ ត្រប់ពុតញង៖ ឈ្មោះវិទ្យាសាស្រ្ដហៅថា Solanum Tovum Swarte ឈ្មោះធម្មតាហៅថា Bitter Egg Plant ។

២ ត្រប់ស្រួយត្រប់ខារ ឬ ត្រប់ពងមាន់ ៖ ឈ្មោះអ្នកវិទ្យាសាស្រ្ដហៅថា Macrocarpon ឈ្មោះធម្មតាអាចហៅថា Bitter Egg plant បានដែរ ។

៣ ត្រប់ក្រាំងរមាស ឬ ត្រប់សណ្ដាយ ៖ មានឈ្មោះវិទ្យាសាស្រ្ដហៅថា Solanum melongena មានឈ្មោះធម្មតាហៅថា Egg plant ឬត្រប់សណ្ដាយ ឬត្រប់ក្រាំងរមាស ដែលមានផ្លែសំប៉ែត ឬមូលតែពណ៌ប្រផេះ ឬ បៃតង។ ជាទូទៅគេពិនិត្យឃើញមានចំនួន ២២ប្រភេទនៃក្រុម Solanum នៅក្នុងប្រទេស ឥណ្ឌា ។

តាមការស្រាវជ្រាវបានបង្ហាញថា ក្រុមនេះមានប្រភពកំណើតនៅ​តំបន់​អាស៊ីដូចជា៖ នៅប្រទេសចិន ឥណ្ឌា និងទ្វិបអាហ្រិ្វក។ ប៉ុន្ដែក្រោយមក​រីករាលដាលដល់ទ្វិបអាមេរិក និងពេញពិភពលោក ជាពិសេសនៅតាម​តំបន់សីតុណ្ហភាពក្ដៅ។

នៅប្រទេសកម្ពុជាយើង ត្រប់ជាប្រភេទបន្លែមួយ៉ាងសាមញ្ញ ដែលប្រជា​ជនគ្រប់គ្នាតាមបណ្ដោយទន្លេមេគង្គ និងតំបន់ផ្សេងៗទៀតជាច្រើនតែ​ដាំជាលក្ខណះសួនបន្លែចំរុះ។

https://kronglungvek.com.kh