កូរ៉េខាងជើង ពឹងពាក់ចិន ដើម្បីទប់ទល់និងបស្ចឹមលោក ពិសេសអាមេរិក និងដើម្បីទ្រទ្រង់សេដ្ឋកិច្ចនៃប្រទេសខ្លួន
ដោយៈសេង ស៊ីដារ៉ូ
នៅចុងឆ្នាំ២០០៧នេះ បញ្ហានុយក្លេអ៊ែរកូរ៉េខាងជើងហាក់ដូចជាជិតចេញរួចហើយពីភាពទាល់ច្រកគឺ
ទីមួយ ពីព្រោះអាមេរិកដកខ្លួនចេញមិនរួចពីសង្គ្រាមអាហ្គានីស្ថាន និងពីសង្គ្រាមអ៊ីរ៉ាក់ មិនអាចទៅធ្វើសឹករំលំ របបកូរ៉េខាងជើងបានឡើយ។
ទីពីរ ពីព្រោះសមត្ថភាពនុយក្លេអ៊ែររបស់កូរ៉េខាងជើងបង្ខំអាមេរិឲ្យបន្ទន់គោលជំហរ។
ទីបី ចិនបង្ខំឲ្យកូរ៉េខាងជើងទទួលសម្បទានរបស់អាមេរិក និងឈប់បង្កបញ្ហាតទៅទៀត។ ចង់ឬមិនចង់ របប នយោបាយកូរ៉េខាងជើងគ្មានជម្រើសអ្វីផ្សេងក្រៅពីបន្តពឹងពាក់ប្រទេសចិនតែប៉ុណ្ណោះ។
កូរ៉េពឹងពាក់ចិន ដើម្បីបន្តទប់ទល់នឹងអរិភាពពីសំណាក់បស្ចឹមលោក ពិសេសអាមេរិក។ ពឹងពាក់ចិន ដើម្បីទ្រ ទ្រង់សេដ្ឋកិច្ចនៃប្រទេស ពីព្រោះកូរ៉េខាងជើងត្រូវការជំនួយថវិកា ស្បៀងអាហារ និងថាម ពល ពីចិន។ ពឹងពាក់ចិន ពីព្រោះតទៅថ្ងៃមុខកូរ៉េខាងជើង និងច្បាស់ជាជ្រើសយកគំរូអភិវឌ្ឍន៍របស់ចិន នោះគឺបើកជំហរសេរីភាពសេដ្ឋកិច្ច ផ្ទុយទៅវិញបំបិទសិទ្ធិនយោបាយ និងបន្តឲ្យមានគណបក្សតែមួយ គឺបក្សកុម្មុយនីស្ត។
តាំងពីឆ្នាំ២០០៣មក ចិនបន្តបង្កើតទំនាក់ទំនងសេដ្ឋកិច្ច និងពាណិជ្ជកម្មជាមួយកូរ៉េខាងជើង។ ប្រទេសជិត ខាងទាំងពីរចុះហត្ថលេខាទទួលកិច្ចសន្យាមួយចំនួន ដែលគិតជាទឹកប្រាក់មានប្រមាណ ៣០០០លានដុល្លារ ក្នុងឱកាសទស្សនកិច្ចរបស់ប្រធានាធិបតីចិន ហ៊ូ ជិនតាវ ទៅកូរ៉េខាងជើង នៅខែតុលា ឆ្នាំ២០០៦។ ទន្ទឹមជាមួយគ្នានេះ ចិនបន្តសាងសង់ឲ្យកូរ៉េខាងជើង ហេដ្ឋារចនាសម្ព័ន្ធ ដូចជាថ្នល់កៅស៊ូ និងផ្លូវដែក ជាពិសេសនៅ តំបន់បណ្តោយជាយដែន។
បើសិនជាពិភពលោកនៅតែស្អប់ និងខ្លាចកូរ៉េខាងជើងដូចសព្វថ្ងៃតទៅទៀត ប្រទេសនេះ នឹងនៅតែមិនអាចលូតលាស់ទៅមុខលឿនរហ័សបានឡើយ។ ក៏ប៉ុន្តែឥរិយាបថវិជ្ជមាន ឬអវិជ្ជមានរបស់ពិភពលោក ក៏អាស្រាយទៅលើមារយាទរបស់ថ្នាក់ដឹកនាំកូរ៉េខាងជើងដែរ។
ឧទាហរណ៍ៈ ចិនក៏ជាកុម្មុយនីស្ត វៀតណាមក៏ជាកុម្មុយនីស្ត ហើយកូរ៉េខាងជើងក៏ជាកុម្មុយនីស្តដូចគ្នា តែហេ តុអ្វីបានជាសហគមន៍អន្តរជាតិរាប់រកចិន និងវៀតណាម តែបែរខ្នងដាក់កូតរ៉េខាងជើង?
នៅចុងឆ្នាំ២០០៧ នេះ នាពេលដែលបញ្ហានុយក្លេអ៊ែរកំពុងឃ្លាតចេញបណ្តើរៗពីឧបទ្វីបកូរ៉េខាងជើង ថ្នាក់ដឹកនាំកូរ៉េខាងជើង បានបង្រឹងទំនាក់ទំនងជាមួយមិត្រ ចិន វៀតណាម និងកម្ពុជា។
ឯកសារយោង ភូមិសាស្ត្រនយោបាយប្រទេសចិន ដោយលោក ហ្សង់ ហ្វ្រង់ស័រ តាន់។
Post a Comment