ស្ដេចពញាច័ន្ទរាជា ឈ្នះសង្គ្រាមស្តេចកន ដោយសារអ្នកម្នាងខៀវ និងលោកតាឃ្លាំងមឿង បូជាជីវិតកេណ្ឌទ័ពខ្មោច ដើម្បីកម្ចាត់ទ័ពស្តេចកន
ដោយៈ សេង ស៊ីដារ៉ូ
កាលដែលស្ដេចកនធ្វើគុតព្រះបាទស្រីសុគន្ធបទ ហើយឡើងសោយរាជនោះ រាជវង្សានុវង្សបានបាក់បែក ព្រាត់ប្រាស់អស់ ក្នុងនោះស្ដេចពញាច័ន្ទរាជា បុត្រព្រះធម្មរាជាក៏បានភៀសព្រះកាយទៅសុំជ្រក កោនកាលដែលស្ដេចកនធ្វើគុតព្រះបាទស្រីសុគន្ធបទ ហើយឡើងសោយរាជនោះ រាជវង្សានុវង្សបានបាក់បែក ព្រាត់ប្រាស់អស់ ក្នុងនោះស្ដេចពញាច័ន្ទរាជា បុត្រព្រះធម្មរាជាក៏បានភៀសព្រះកាយទៅសុំជ្រកកោននឹងស្ដេចសៀម។
ដោយក្ដៅក្រហាយនឹងស្ដេចកនពេក ៧ឆ្នាំក្រោយមក ព្រះអង្គច័ន្ទរាជា ប្រើឧបាយកលបោកស្ដេចសៀមបានកងទ័ពសៀម៥.០០០នាក់ និងស្បៀងគ្រប់គ្រាន់នាំចូលមកស្រុកខ្មែរវិញ ។
កាលនោះចៅហ្វាយខេត្តបាត់ដំបងបានថ្វាយទាហាន និងការគាំទ្រទាំងស្រុងទូទាំងខេត្ត។ មកដល់ពោធិ៍សាត់ ចៅហ្វាយខេត្តនេះរឹងទទឹងរាយការណ៍សុំជំនួយពីស្ដេចកនទើបពញាមឿង ដែលជាមេស្មឹងក្នុងខេត្តមានការស្មោះស្ម័គ្រនឹងព្រះអង្គច័ន្ទរាជារៀបចំគម្រោងការវាយឆ្មក់ ហើយក៏សម្លាប់ចៅហ្វាយខេត្ត រួចបញ្ចុះបញ្ចូលប្រជារាស្ត្រក្នុងខេត្តឲ្យមកចូលរួមជាមួយព្រះអង្គច័ន្ទរាជា ព្រមទាំងថ្វាយសេះ ដំរីជាច្រើនដល់ព្រះអង្គសម្រាប់ធ្វើសឹកផង។
ដូច្នេះហើយទើបព្រះអង្គច័ន្ទតែងតាំងគាត់ជា«ចៅពញាសួគ៌ាលោក» គឺជាចៅហ្វាយខេត្តពោធិ៍សាត់និងជាមេទ័ព«សម្រេចកិច្ចការរាជាគ្រប់ប្រការ»។ ឯកូនរបស់តាមឿង៤នាក់ទៀតក៏សុទ្ធតែទទួលឋានន្តរស័ក្កិខ្ពង់ខ្ពស់ជាចៅពញាមុខងារផ្សេងៗគ្នា។
ដឹងដំណឹងដូច្នេះស្ដេចកនបានចាត់តាំងឲ្យលើកទ័ពប្រមាណជាង១២ម៉ឺននាក់ដើម្បីវាយកម្ទេចទ័ពរបស់ព្រះអង្គច័ន្ទរាជា។ ទ័ពស្ដេចកនលើកទៅដល់ខេត្តក្រគរ ស្រុកក្រគរ ក៏ប្រយុទ្ធគ្នាជាមួយទ័ពព្រះអង្គច័ន្ទរាជា ដែលមានតាមឿងដឹកនាំ។ ដោយឃើញស្ដេចកនលើកទ័ពទៅច្រើនពេក តាមឿនបានបញ្ជាទ័ពដកថយចូលបន្ទាយវិញទាំងអស់ដើម្បីទប់ទល់។
ទ័ពស្ដេចកនចំនួន១០ម៉ឺននាក់ទៅព័ទ្ធបន្ទាយរបស់ព្រះអង្គច័ន្ទរាជានៅឃុំបាក់នឹម ឈ្មោះបន្ទាយជ័យ ដែលមានទ័ពតែ២ម៉ឺននាក់ អស់រយៈពេល១២ខែធ្វើឲ្យហោចស្បៀង យ៉ាងខ្លាំងពុំអាចចេញទៅរកស្បៀងនិងពុំអាចវាយទំលាយរបាំងហ៊ុមព័ទ្ធបាន ទើបពញាសួគ៌ាលោកមឿង ផុសគំនិតសុំព្រះអង្គច័ន្ទធ្វើពិធីពលីជីវិតទៅកេណ្ឌពលទ័ពខ្មោចឱ្យជួយ។
ដំបូងព្រះអង្គច័ន្ទសោកស្ដាយតាមឿងពេក ពុំព្រមឲ្យតាមឿងធ្វើដូច្នេះឡើយ តែដោយតាមឿងប្រុង អារ.កសម្លាប់ខ្លួនមុខព្រះភ័ក្ត្រព្រះអង្គ ទើបព្រះអង្គបណ្ដោយតាមចិត្តតាមឿង។តាមឿងត្រេកអរក៏ឲ្យទាហានជីករណ្ដៅទំហំ៨ហត្ថបួនជ្រុង ហើយក្នុងរណ្ដៅដាំសុទ្ធតែលំពែង រួចធ្វើពិធីបួងសួងយ៉ាងម៉ត់ចត់ និងផ្ដាំថា បើយប់ថ្ងៃពេញបូណ៌មីខែពិសាខស្អែកនេះ មានឮសន្ធឹកខ្ទរខ្ទារមេឃ និងដីឲ្យលើកទ័ពទៅវាយសត្រូវភ្លាម។
អ្នកម្នាងខៀវ ដោយឈឺឆ្អាលចង់ជួយទឹកដីក៏ថ្វាយបង្គំលាព្រះអង្គច័ន្ទរាជាលោតសម្លាប់ខ្លួន ជាមួយតាមឿងដែរ។ ឯកូនតាមឿងទាំង៤នាក់ ឃើញឪពុកស្លាប់ក៏ស្ទុះទៅលោតសម្លាប់ខ្លួនដែរ តែគេចាប់ទាន់២នាក់ គឺចៅពញាវិបុលរាជទេព និងចៅពញាតេជៈសុខ។
ចំណែកចៅពញាវង្សាអគ្គរាជកែវ និងពញាបរទេសរាជ ដែលជាកូនទី១ និងកូនទី២ គេចាប់ពុំទាន់ក៏បានលោតទៅជាមួយឪពុក និងអ្នកម្នាងទៅ។ ដូចតាមបណ្ដាំតាមឿងមែន នៅយប់ពេញបូណ៌មីមានអព្ហូតហេតុអស្ចារ្យឮខ្ទរខ្ទារលើអាកាស និងលើដី ទើបព្រះអង្គច័ន្ទរាជាបញ្ជាឲ្យលើកទ័ពទៅវាយសត្រូវធ្វើឲ្យពួកវាភិតភ័យរត់ខ្ចាត់ខ្ចាយ ខ្លះត្រូវសម្លាប់ ហើយរឹបអូសបានស្បៀងអាហារ និងអាវុធយុទ្ធភណ្ឌជាច្រើនថែមទៀត។
Post a Comment