បឹងរាំងពេន៣ត នឹងក្លាយជាតំបន់ទេសចរណ៍ដ៏ស្រស់ត្រកាល

ខេត្តបាត់ដំបងៈ

ដោយ៖ សេង ស៊ីដារ៉ូ

បឹងរាំងពេន៣ត ស្ថិតនៅក្នុងដែនគ្រប់គ្រងសហគមន៍នេសាទស្តី​ក្រោម​រហាលសួង ក្នុងឃុំព្រែកហ្លួង ស្រុកឯកភ្នំ ខេត្តបាត់ដំបង មានចម្ងាយ​ប្រមាណ៣០គីឡូម៉ែត្រ ពីទីរួមខេត្តបាត់ដំបង ដែលមានផ្ទៃព្រៃលិច​ទឹកជាង៥០ហិកតា និងបឹងចំនួន៥ គឺ បឹងរាំងពេន បឹង៣ត បឹងតាមាក បឹងទទឹង និងបឹង តាអួ មានការអភិរក្ស និងកែរប្រែបឹងទាំងនេះឲ្យក្លាយ​ទៅ​​ជាតំបន់អេកូទេសចរណ៍ធម្មជាតិ និងជលផល។

លោក ភី ហឿត ប្រធានសហគមន៍នេសាទស្តីក្រោមរហាលសួង បាន​លើក​ឡើងថា បឹងអភិរក្សរាំងពេន ៣តនេះ ភ្ញៀវទេសចរអាចចូលមក​កម្សាន្ត​តាមផ្លូវទឹក ជិះកាណូតនារដូវវស្សា ដោយចេញពីទីរួមខេត្តបាត់​ដំបង បើក្នុងរដូវប្រាំងអាចធ្វើដំណើរតាមរថយន្តចូលដល់បឹង​នេះតែម្តង​។ លោក ភី ហឿត បានបន្តថា ក្នុងការទា ក់ទាញភ្ញៀវទេសចរចូលមក​កម្សាន្ត​ក្នុងតំបន់រាំងពេន៣តនេះ មានដូចជា ព្រៃលិចទឹកដែលពោរ​ពេញ​ទៅ​ដោយដើមរំដេញ មើលហ្វូងសត្វ​និងស្ទួចត្រីកម្សាន្តក្នុងបឹង​ជាដើម។

លោក ហោ សំអាត អនុប្រធានសហគមន៍ទទួលបន្ទុកអភិរក្សបឹង​រាំង​ពេន​៣តនេះ បានបញ្ជាក់ប្រាប់ ថា រាំងពេន៣ត បានបង្កើតឡើងនៅឆ្នាំ​២០០៧ ដោយមានការទទួលស្គាល់ និងឯកភាព ពីអាជ្ញាធរភូមិ ឃុំ ស្រុក ខេត្ត រដ្ឋបាលជលផល និងក្រសួងកសិកម្មរុក្ខាប្រមាញ់និងនេសាទ​ហើយ​​​​ការដាក់ឈ្មោះ រាំងពេន៣តនេះគឺសហគមន៍យកតាមឈ្មោះបឹង​ចំនួនពីរ គឺបឹងរាំងពេន និងបឹង៣ត ដែលជាក

ន្លែងអភិរក្សមច្ឆជាតិនា​ពេល​​បច្ចុប្បន្ន។

ចំពោះឈ្មោះបឹងរាំងពេន តាមការរៀបរាប់របស់ចាស់ៗបានឲ្យដឹងថា ដោយនៅមាត់បឹងនោះមានដើមរាំងពត់ពេន ទើបបានគេឲ្យឈ្មោះបឹង​នោះ​ថា រាំងពេន ឯបឹង៣តពុំដឹងថាហេតុអ្វីបានចាស់ៗជំនាន់មុនហៅ​ឈ្មោះបឹងនេះថា៣តទេ។

លោក ហោ សំអាត បានបន្តទៀតថា ការទាក់ទិននឹងប្រវត្តិបឹងរាំង​ពេន​៣ត​នេះ លោកតា ស៊ន ដែលរស់នៅក្នុងសហគមន៍បាននិយាយប្រាប់​ឲ្យដឹងថា កាលពីដើមមកតំបន់បឹងទាំងពីរនេះ ជាភូមិសាស្ត្រព្រៃរនាម មានអ្នកយកឃ្មុំបានតាមដានមេឃ្មុំដោយរាយគ្នាជា៣ក្រុម ដោយអ្នក​ទី១ នៅពេលដែលឃើញមេឃ្មុំហើរទៅ ក៏ស្រែកប្រកូកទៅអ្នកទី២​ដែល​ឈរចាំមើលឃ្មុំដែរ ក្នុងបឹង១ផ្សេងទៀត ហើយអ្នកទី២នៅពេល​ដែល​ឃើញ​​ឃ្មុំក៏ស្រែកបន្តទៅអ្នកទី៣ អញ្ចឹងហើយគេកំណត់អ្នក​ឈរទី៣​ដែលជាចំណុចបឹង៣តនោះឯង នេះគ្រាន់តែជារឿងនិទានតៗគ្នា​ប៉ុណ្ណោះហើយបានប្រែក្លាយជាឈ្មោះបឹងរាំងពេន៣តរៀងរហូតដល់បច្ចុប្បន្ន៕