អ្នកស្រី ណារី រស់នៅក្នុងស្រុកក្រូចឆ្មា ថា ពោតក្រហម រក្សាតម្លៃលក់ចេញបានល្អ មានទីផ្សារនាំចេញទៅក្រៅប្រទេស
ខេត្តត្បូងឃ្មុំៈ
ដោយ៖ សេង ស៊ីដារ៉ូ
កសិករនៅស្រុកក្រូចឆ្មា ខេត្តត្បូងឃ្មុំ កំពុងមានការចំណាប់អារម្មណ៍យ៉ាងខ្លាំង ក្នុងការដាំពោតក្រហម ហើយពោតក្រហមនេះ អាចកែច្នៃទៅជាចំណីសត្វ និងនំផ្សេងៗបានច្រើន។
ពោតក្រហមអាចរក្សាតម្លៃលក់ចេញថេរ ហើយធ្វើឲ្យកសិករយើងដាំដុះរៀងរាល់ឆ្នាំ សម្រាប់ទីផ្សារនាំចេញវិញ គឺទៅប្រទេសវៀតណាម និងប្រទេសថៃ។
អ្នកស្រី ណារី រស់នៅក្នុងស្រុកក្រូចឆ្មា ខេត្តត្បូងឃ្មុំ បានឲ្យដឹងថា រៀងរាល់ឆ្នាំរូបគាត់ តែងតែដាំពោតក្រហម នេះ និងកសិករក្នុងស្រុកនេះ ជាង ៥០ភាគរយ ក៏ដាំពោតក្រហមនេះដែរ ក្នុងនោះពោតក្រហមចាប់ផ្តើមដាំពីចុងខែវិច្ឆិកា រហូតដល់ខែមីនា ឬខែមេសា ទើបចាប់ផ្តើមប្រមូលផល។
លើផ្ទៃដី២ហិកតា របស់អ្នកស្រី អាចប្រើពូជចំនួន២៥គីឡូក្រាមក្នុងការដាំ ហើយក្នុង១ហិកតាបើដាំមិនល្អអាចទទួលផលបានពី៥ទៅ៦តោន បើទិន្ន ផលបានខ្ពស់វិញអាចបាន៧តោនឬ៨តោន ក្នុង១ហិកតា។
អ្នកស្រី បានបន្តទៀតថា ក្នុងពេលប្រមូលផលក៏ត្រូវចំណាយលើម៉ាស៊ីនប្រលះគ្រាប់ ក្នុង១បេថ្លៃ១ពាន់រៀល ដោយក្នុង១ហិកតា អាចបានចំនួន៥០បេ។
ពោតក្រហម ចែកចេញជាពីរប្រភេទ ដោយពោតសើមអាចលក់បាន៨០០រៀល ក្នុង១គីឡូក្រាម និងពោតស្ងួតអាចបានថ្លៃក្នុង១គីឡូក្រាមថ្លៃ១០០០រៀល។
ពោតក្រហមគេយកទៅកែច្នៃទៅជាចំណីសត្វ នំផ្សេងៗជាច្រើនដោយមានឈ្មួញមកប្រមូលទិញរៀងរាល់ឆ្នាំ ដើម្បីធ្វើការនាំចេញទៅប្រទេសវៀតណាម និងប្រទេសថៃ៕
Post a Comment