រដ្ឋមន្ត្រីក្រសួងអភិវឌ្ឍន៍ជនបទ ចុះចែកអំណោយជូនប្រជាពលរដ្ឋ ដែលរងគ្រោះជំនន់ទឹកភ្លៀង៣០០គ្រួសារ

ខេត្តពោធិ៍សាត់ៈ

ដោយ៖ ហុង ចំណាប់

លោក អ៊ុក រ៉ាប៊ុន​ រដ្ឋមន្ត្រីក្រសួងអភិវឌ្ឍន៍ជនបទ អមដំណើរដោយ លោក ម៉ៅ ធនិន អភិបាលនៃគណៈ​អភិ​បាលខេត្តពោធិ៍សាត់ បាន នាំយកអំណោយទៅចែកជូនប្រជាពលរដ្ឋចំនួន៣០០គ្រួសារ​ ដែល មានជីវភាពខ្វះ​ខាត​​បណ្តាលមកពីរងផលប៉ះពាល់ ដោយសារជំនន់ទឹកភ្លៀង នៅឃុំកញ្ជរ ស្រុកកណ្តៀង ខេត្តពោធិ៍សាត់​កាលពីថ្ងៃ ២២ ខែតុលា ឆ្នាំ២០២០។

អំណោយទាំងនោះ ក្នុង១គ្រួសារទទួលបានអង្ករ​១០គីឡូក្រាម មី១ កេស ធុងជ័រចំណុះ២០លីត្រចំនួន១ ពី​ដុងចំណុះ២០លីត្រចំនួន១ ថ្នាំក្លរសម្រាប់ដាក់ទឹកប្រើប្រាស់ សាប៊ូប្រូតិចចំនួន២ដុំ និងសាប៊ូ ម្សៅ២កញ្ចប់​ផង​ដែរ។

លោករដ្ឋមន្ត្រី ​និងប្រតិភូរួមដំណើរក៏បានអញ្ជើញ​ទៅពិនិត្យស្ថានភាព ផ្លូវក្រាលក្រួសក្រហមមួយខ្សែ ប្រវែង​២៣០០ម៉ែត្រ អណ្តូងទឹក បង្គន់ អនាម័យដែលខូចខាតដោយសារជំនន់ទឹកភ្លៀងនៅភូមិផ្លូវលួង ឃុំកញ្ជរ ស្រុក​កណ្តៀង ខេត្តពោធិ៍សាត់។​

ដោយឡែកផ្លូវក្រាលក្រួសក្រហមប្រវែង២៣០០ម៉ែត្រដែលខូច លោក រដ្ឋមន្ត្រី​ បានណែនាំឲ្យប្រធានមន្ទីរ​អភិ​វឌ្ឍ​ន៍ជនបទខេត្តពោធិ៍សាត់ ដាក់បញ្ចូលទៅក្នុងគម្រោងជួសជុលបន្ទាន់ ដើម្បីធ្វើការជួសជុលក្នុង ពេលឆាប់ៗ​ខាងមុខនេះ៕