មានអ្នកគាំទ្រច្រើន នូវកាំរទេះ និងតួរទេះគោ ដែលធ្វើការកែច្នៃឡើងវិញ ព្រមទាំងមានសមរម្យ

 ខេត្តត្បូងឃ្មុំនិងកំពង់ធំៈ

ដោយ៖សេងស៊ីដារ៉ូ

កាំរទេះនិងតួរទេះគោ ដែលប្រជាកសិករយើងលែងប្រើប្រាស់វា​ទៅហើយនោះ ឥឡូវ​ស្រាប់តែមានឈ្មួញក្នុង​ស្រុកចាប់ផ្តើមដើរប្រមូលទិញកាំរទេះ និងតួរទេះគោចាស់ៗនេះ ​យកមកកែច្នៃឡើងវិញយ៉ាងស្អាត ដើម្បីដឹក​លក់​តាម ទីប្រជុំជននានា ពិសេស​គឺ រាជធានីភ្នំពេញ​តែម្តង។

ហើយ​ក៏មានហាង  ​ឬក្រុមហ៊ុនផ្សេងៗ ធ្វើការកម្ម៉ង់ទិញយកទៅតាំងលម្អតាមរបងផ្ទះ តាមមុខហាង​ និងចូល​រួម

​អភិរក្សផងដែរ។

លោក​ រតនា ដែលជាអ្នកប្រមូលទិញរទេះ ​និងកាំរទេះគោនេះ ​ដែលរស់នៅក្នុងខេត្តត្បូងឃ្មុំ ​បានឲ្យដឹងថា​មូល​ហេតុដោយសារប្រជាកសិករយើង ធ្វើការបោះបង់រទេះគោ ​ដែលជាមធ្យោបាយដឹកជញ្ជូននេះទុកចោ​ល​អត់មាន​​ប្រយោជន៍ ព្រោះដោយសារសម័យនេះ វាមានបច្ចេកវិទ្យាទំនើបពេក ដូច្នេះហើយទើបរូបលោក ​ក៏មាន​គំនិតចង់​កែ​​​ច្នៃ​កាំរទេះ និងតួរទេះគោនេះឡើងវិញ និងចង់ចូលរួមក្នុងការអភិរក្សរទេះគោពីបុរាណកាលនេះ ​ឲ្យ​គង់​វង្សផង​ដែរ​​​​។​ ព្រោះថាកាំរទេះ និងតួរទេះគោទាំងនោះ សុទ្ធតែធ្វើអំពីឈើធ្នង់ ​អាចទ្រាំទ្រនឹងអាកាស​ធាតុ​​ក្តៅ ​ត្រជាក់បាន មិន​ត្រឹមប៉ុណ្ណោះ​អាចប្រើប្រាស់បានយូរអង្វែងថែមទៀតផង។

រូបលោក បានធ្វើការប្រមូលទិញរទេះគោនេះ តាមបណ្តាលខេត្តកំពង់ចាម និងខេត្តព្រៃវែង ដោយក្នុងនោះតួរ​​ទេះ​​គោមួយ ថ្លៃ៨០ម៉ឺនរៀល និងកាំរទេះគោមួយគូ ថ្លៃ២០ម៉ឺនរៀល។ រទេះគោ​នេះ មានផលប្រយោជន៍​ច្រើន​ក្នុងការ​ដឹកជញ្ជូនសម្ភារៈ និងស្បៀងឆ្លងពីខេត្តមួយទៅខេត្តមួយ តាំងពីសម័យអង្គរមកម៉្លេះ ក៏ប៉ុន្តែប្រើពេលវេលាយូរ​ខុស​ប្លែកពីសម័យ​បច្ចុប្បន្ននេះ គេបានទុករទេះគោចោល ដោយងាកមកប្រើគោយន្ត ឬតា្រក់ទ័រវិញ ព្រោះមាន​ភាព​រហ័សទាន់ចិត្ត។​

លោក រតនា ​បានបញ្ជាក់ថា​ អ្នកលក់រទេះគោកែច្នៃរួចហើយ ធ្វើការដឹកជញ្ជូនពីខេត្តកំពង់ធំ មកកាន់រាជធានី​ភ្នំពេញ និងក្រុងតាខ្មៅ អាចបានថ្លៃក្នុង១គ្រឿង ​៤៥០ដុល្លារ៥០០ដុល្លារ ដោយក្នុងមួយលើកៗ​អាច​ដឹក​យក​មកលក់បានត្រឹមតែ២គ្រឿងប៉ុណ្ណោះ។ តួរទេះគោដែលកែច្នៃយ៉ាងស្អាតនេះ ភាគច្រើនគឺ អតិថិជនជាម្ចាស់ក្រុម​ហ៊ុន​ និង​​ម្ចាស់ផ្ទះធំៗ គេកម្ម៉ង់ទិញយកទៅតាំងលម្អមុខក្រុមហ៊ុន ឬតាំងលម្អតាមរបងផ្ទះរបស់ពួកគេ៕