ចិញ្ចឹមអន្ទង់ បានថ្លៃខ្ពស់

ខេត្តកំពង់ឆ្នាំងៈ

ដោយ៖ សេង ស៊ីដារ៉ូ

អន្ទង់មានច្រើនប្រភេទ ដូចជា អន្ទង់ដំណើប អន្ទង់គ្រាយ និងអន្ទង់​ព្រ័ត្រ ជាពូជក្នុងស្រុក បើចិញ្ចឹមតាមស្តង់ដាអន្ទង់ទទួលបានផលល្អ ហើយមានទម្ងន់ក្នុង១ក្បាលចាប់ពី ២ទៅ៣ខាំ។

អ្នកចិញ្ចឹមអន្ទង់ក្នុងស្រុករលាប្អៀរ ខេត្តកំពង់ឆ្នាំង ដែលមានបទ​ពិសោធន៍​​យូរឆ្នាំមកហើយ ក្នុងការចិញ្ចឹមអន្ទង់នេះ បានលើកឡើង​ថា នៅក្នុងឆ្នាំទី១ និងឆ្នាំទី២ មុខរបរចិញ្ចឹមអន្ទង់ខាតច្រើន តែនៅពេលរកឃើញចន្លោះខ្វះខាតនៃរបៀបចិញ្ចឹមនេះ បានធ្វើឲ្យ​អន្ទង់រស់១០០ភាគរយ គឺដំបូងយើងត្រូវតែពិនិត្យទៅលើ​ទឹក​ស្អាតជាមុនសិន ទើបយើងឃើញថា ការចិញ្ចឹមនោះមានការរីកចំរើន ចំណែកតម្លៃក្នុងទីផ្សារវិញ ១គីឡូក្រាមថ្លៃ២ម៉ឺនរៀល។

លោកវណ្ណា អ្នកចិញ្ចឹមអន្ទង់ក្នុងស្រុករលាប្អៀរ ខេត្តកំពង់ឆ្នាំង បានបន្តថា ពូជអន្ទង់នេះទទួលទិញពីប្រជាពលរដ្ឋ ដែលចាប់​តាមបឹងក្រោមកំប្លោក យកមកប្រស់ក្នុងអាងចិញ្ចឹមរយៈពេល១៥ថ្ងៃដោយអាងនោះមានប្រវែង២ម៉ែត្រ គុណ នឹង៣ម៉ែត្រ ដោយដាក់ចូលក្នុងបន្ទះឫស្សីបីជាន់ចងឲ្យណែន ដើម្បីសង្កត់​ពីលើមិនអាចឲ្យអន្ទង់ចេញបាន។

ក្នុងអាងនីមួយៗ អាចដាក់អន្ទង់បាន១៥០គីឡូក្រាម ហើយចិញ្ចឹម​ក្នុងរយៈពេល៧ទៅ៨ខែ ទើបអាចចាប់លក់បាន ហើយលក្ខណៈ​​​កត់ចំណាំរបស់វា ក្នុងការចិញ្ចឹមត្រូវការទឹកស្អាត និងធ្វើការផ្លាស់​ប្តូរទឹក ២ថ្ងៃម្តង។ បើទឹកមិនស្អាតឬស្អុយវាមិនស៊ីចំណី អាចឲ្យវា​ងាប់ក្នុងរយៈពេល៣ថ្ងៃ។ ចំពោះចំណីអន្ទង់ គឺយកកូនត្រីមកចិញ្ច្រាំ​ពូតដុំៗជាមួយជន្លេន។

អាងចិញ្ចឹមអន្ទង់របស់លោកវណ្ណា មានចំនួន៣៤អាង ដែលក្នុង​នោះ​អាងនីមួយៗ ទទួលបានផល​អន្ទង់​ចំនួន៥០០គីឡូក្រាម៕