លោក ស៊ុំ រ៉ា ប្រធានការិយាល័យកសិកម្មស្រុកក្រូចឆ្មា ថា កសិករ ៣៤៦គ្រួសារ ​ដាំបន្លែចំរុះជាង ៣០០​ហិកតា ស្ថិតលើផ្ទៃដីតែមួយ

 ខេត្តត្បូងឃ្មុំៈ

ដោយ៖ សេង ស៊ីដារ៉ូ

 

ប្រជាកសិករ នៅព្រែកអាជី ស្រុកក្រូចឆ្មា ខេត្តត្បូងឃ្មុំ ភាគច្រើនប្រកបមុខរបរដាំ​បន្លែចំរុះ​មុខ ​មានតាំងពី​ប៉េងបោះ ល្ពៅ ម្ទេស ត្រាប់វែង ត្រាប់ស្រួយ ឆៃថាវ ដំឡូង ស្ពៃ ការ៉ុត ឪឡឹក ពោត… នៅតាមមាត់ទន្លេ ដែលមានរយៈពេលខ្លី ងាយរកចំណូលដើម្បីផ្គត់ផ្គង់ជីវភាពប្រចាំថ្ងៃ។

លោក ស៊ុំ រ៉ា ប្រធានការិយាល័យកសិកម្មស្រុកក្រូចឆ្មា បានឲ្យដឹងថា ប្រជាកសិករ ចំនួន ៣៤៦គ្រួសារ ដែល​ប្រកបមុខរបរដាំបន្លែចំរុះ នៅលើកផ្ទៃដីជាង ៣០០ហិកតា  ដែល​កសិករ​ក្នុងតំបន់នេះ ប្រកបការងារដាំ​បន្លែលើផ្ទៃដីតែមួយ។ ក្នុងរដូវប្រមូលផលបន្លែចំរុះនេះ គឺចាប់ពីខែវិច្ឆិកា ដល់ខែធ្នូ មានរយៈពេលតែមួយខែ ដោយ​ក្នុងមួយថ្ងៃៗ កសិករយើងប្រមូលផលលក់បាន ១៥តោន។

លោក ភិន ជាកសិករដាំបន្លែចំរុះ បានប្រាប់ឲ្យដឹងថា រដូវផ្លែត្រប់វែងបានតម្លៃ ៣០០រៀល តម្លៃប៉េងបោះបាន ៤០០រៀល និងម្ទេសបាន ១០០០រៀល តែប៉ុណ្ណោះ។

លោក ស៊ុំ រ៉ា បានបញ្ជាក់ឲ្យដឹងទៀតថា ផលិតផលបន្លែចំរុះទាំងនេះ ភាគច្រើនលក់ក្នុងស្រុក និងធ្វើការនាំ​ចេញ​ទៅ​ទីផ្សាររាជធានីភ្នំពេញ ដោយតម្លៃបន្លែទាំងនេះ ចុះថោក ក្នុងគ្រាដែលសំបូរច្រើន ហើយនៅខែកុម្ភៈ ទើបផ្លែទាំងនេះ អាចឡើងថ្លៃបន្តិចវិញ នៅពេលដែលផលិតផលនេះ ស្បោយក្នុងការប្រមូលផល៕