អ្នកស្រីសល់ ថា អ្នកទិញ បន្លែ ត្រី សាច់ ពីមូលដ្ឋានរបស់គាត់ យកទៅបរិភោគ នឹងមានសុខភាពល្អ គ្មាន​ជាតិ​គីមី

ខេត្តកណ្តាល

ដោយ៖ សេង ស៊ីដារ៉ូ

 

អ្នកស្រីសល់ មានទីលំនៅព្រែកតាម៉ាក់ ខេត្តណ្តាល បានរៀបរាប់រាល់សកម្មភាពលក់ដូរបន្លែ ​ត្រី សាច់​ តាមរយៈ​ការដឹកកងជិះលក់ទៅតាមខ្នងផ្ទះ របស់ប្រជាពលរដ្ឋ នៅតំបន់ផ្សេងៗ​នេះ ថា អ្នកស្រី ប្រកបមុខរបរនេះ អស់​រយៈ​​ពេលជាច្រើនឆ្នាំមកហើយ ប៉ុន្តែ​​​ក្នុងការលក់បន្លែ ត្រី សាច់នេះ នៅតែមានការជួយទិញពីប្រជាពលរដ្ឋជានិច្ច ព្រោះវាចំណេញពេលវេលា និងថវិកាបានច្រើន​ ដល់ពួកគាត់ ហើយពួកគាត់អាចប្រកបការងារអ្វីៗផ្សេងទៀត​ក៏បានដែរ។

អ្នកស្រី បានបញ្ជាក់បន្ថែមទៀតថា នៅក្នុងការទិញបន្លែ ត្រី សាច់ នេះ ​គឺទិញនៅក្នុងមូលដ្ឋាន​នេះតែម្តង ​ទាំង​បន្លែ​​ចម្រុះ មានដូចជា ល្ពៅ ត្រឡាច ត្រកួន ជី ត្រប់ ត្រាវ ននោង ត្រី និងសាច់ផ្សេងៗជាច្រើនទៀត។ ហើយ​ក្នុង​ការ​ទិញបន្លែ ត្រី សាច់នេះ ​​ម្តងៗ ​ត្រូវចំណាយដើមទុនជាង៣០ម៉ឺនរៀល​ ក្នុងមួយថ្ងៃៗ ​ហើយអ្នកស្រី ត្រូវ​ចេញ​មក​​លក់​តាំងពីព្រលឹមម៉ោង៧ព្រឹក រហូតដល់ ម៉ោង៣រសៀល ទើបត្រឡប់ទៅផ្ទះវិញ។ បន្ទាប់មកអ្នកស្រី លក់​រហូត​ដល់​​ភ្នំពេញ ទៅតាមខ្នងផ្ទះរបស់ប្រជាពល​រដ្ឋ ​មធ្យោបាយដឹកជញ្ជូន​ត្រូវដាក់កងលើឡានឈ្នួល ពេលមក​ដល់​ភ្នំពេញ ទើបដាក់កងចុះ និងរៀបចំបន្លែដាក់លើកង រួចធាក់លក់តែម្តង។

នាបច្ចុប្បន្ននេះ មុខរបរលក់បន្លែ ​ត្រី ​សាច់​ តាមរយៈកង់នេះ​ ក្នុងមួយថ្ងៃៗ អាចចំណេញបានពី២ម៉ឺន ទៅ៣​ម៉ឺន​រៀលតែប៉ុណ្ណោះ។ មុខរបរនេះ​ បានចូលរួមចំណែកជួយក្នុងគ្រួសារបានមួយកម្រិត ​បន្ទាប់ពីមុខរបរធ្វើស្រែ ចំការ​ របស់​ប្តីគាត់​ និងបានជួយឲ្យកូនទាំង៤នាក់របស់ពួកគាត់មានសិក្សា។ ត្បិតតែរបរនេះ​ មានការហត់នឿយច្រើន ក៏ពិត​មែន​​ តែបានជួយដល់អ្នកទិញយកធ្វើម្ហូបទទួលទាន មានសុខភាពល្អ គ្មានជាតិគីមី ព្រោះដោយសារ​តែប្រភេទ​បន្លែ ត្រី និងសាច់ ទាំងនោះ ទិញចេញពីមូលដ្ឋានតែម្តង​ តាមបែបធម្មជាតិពិតៗ៕