ក្រុមនិស្សិត គឺម វ៉ាង បានសិក្សាស្រាវជ្រាវ ការកែច្នៃ មីផ្លែល្ពៅ បានជោគជ័យ

 ខេត្តបាត់ដំបងៈ

ដោយ៖ ឌឹម គឹមហាក់

 

ផលិតផលមីល្ពៅ ដែលនិស្សិតខ្មែរយើងបានធ្វើការសិក្សាស្រាវជ្រាវកែច្នៃ ពីវត្ថុធាតុដើមពីផ្លែល្ពៅ ដែល​មាន​រសជាតិដើមពីធម្មជាតិ និងមានការភ្ញាក់ផ្អើរពេញសង្គមហ្វេសប៊ុកតែម្តង។ ​

និស្សិតខ្មែរឈ្មោះ គឹម វ៉ាង ដែលបានបញ្ចប់ការសិក្សាលើជំនាញវិជ្ជាសាស្ត្រ ចំណីអាហារ ពីសាកល​វិទ្យា​ល័យបាត់ដំបង កាលពីឆ្នាំ២០១៧ ហើយបានសម្រេចគោលដៅ លើការផលិតសសៃមីពីផ្លែល្ពៅ ដែល​មានរសជាតិដើមពិតៗ ដូចផ្លែល្ពៅ ដោយចំណាយពេលវេលា ធ្វើការសិក្សាស្រាវជ្រាវកែច្នៃ​ចំណីអាហារ​នេះ​​ជិត ២ឆ្នាំ។

និស្សិត គឹម វ៉ាង បានរៀបរាប់ថា បានរៀនជំនាញវិជ្ជាសាស្ត្រ ចំណីអាហារ​ នៅសាកលវិទ្យាល័យបាត់​ដំបង អស់​រយៈពេល០៤ឆ្នាំ ក្នុង២០១៧ រូបខ្ញុំបានមើលឃើញពីអត្ថប្រយោជន៍ពីផ្លែល្ពៅ ដែលប្រជាពល​រដ្ឋ​យើង នៅខេត្តឧត្តរមានជ័យ តែងនាំយកផលិតផលនេះទៅ លក់ឯព្រំដែនខ្មែរថៃ ហើយមានឈ្មួញទិញ​ជារៀង​រាល់​ឆ្នាំ រាប់រយតោន ក៏ប៉ុន្តែប៉ុន្មានឆ្នាំនេះ នៅពេលដែលប្រជាកសិករយកទៅលក់ច្រើនពេក បែរ​ជា​លក់​មិន​​ដាច់ ហើយក៏នាំគ្នាយកផ្លែល្ពៅទាំងនោះបោះ​ចោល ហើយក្រុមនិស្សិតយើង ឃើញដូច្នេះ ក៏​មាន​គំនិត​ផ្តួចផ្តើមធ្វើការកែច្នៃផ្លែល្ពៅ ទៅជាសសៃមី ដែលមានរសជាតិដើមដូចផ្លែល្ពៅ។

ការផលិតមីល្ពៅនេះ ក្រុមនិស្សិតយើង មានគោលបំណងលើកស្ទួយ ការដាំដុះ​ប្រជាកសិករខ្មែរទូទាំង​ប្រទេស មិនឲ្យមានតំលៃថោក និងមានទីផ្សារ និងជួយលើកស្ទួយមុខមាត់ប្រទេសជាតិយើងផង។​

ភាពជោគជ័យរបស់ក្រុមនិស្សិត គឹម វ៉ាង ដែលបានធ្វើការកែច្នៃផ្លែល្ពៅទៅជាមីសសៃ ដែលបានជួយ​សម្រួល​ដល់កសិករយើង នៅតាមព្រំដែន ឲ្យមានទឹកចិត្តដាំដុះ ព្រមទាំងមានតំលៃ ឡើងវិញផង។